ގާނޫނާ ހިލާފުވާ ވަކިވަކި ފުލުހުންނާ މެދު ފިޔަވަޅު އަޅަން އިއްތިހާދުން އެދެނީ

ޣައިރު ގާނޫނީ އަމުރުތަކަށް ތަބާވާ ފުލުހުންނާ މެދު ފިޔަވަޅު އަޅަން ނެޝަނަލް އިންޓެގްރިޓީ ކޮމިޝަނާއި (އެންއައިސީ) ހިއުމަން ރައިޓްސް ކޮމިޝަން (އެޗްއާރުސީއެމް) އަށް ހުށަހަޅަން އިދިކޮޅު އިއްތިހާދުން މިއަދު ނިންމައިފި އެވެ.

އިދިކޮޅު އިއްތިހާދުން ވަނީ އެންއައިސީ އާއި އެޗްއާރުސީއެމްގެ އިސް ބައެއް ބޭފުޅުންނާ މިއަދު ބައްދަލުކޮށް، އިއްތިހާދުގެ ކަންބޮޑުވުންތައް ހިއްސާކޮށް، އެ މައްސަލަތައް ވީހާ ވެސް އަވަހަށް ބަލައި ދިނުމަށް އެދިފަ އެވެ. އެ ގޮތުން، ހުށަހެޅި ކަންބޮޑުވުންތަކުގެ ތެރޭގައި ގަވާއިދާ ހިލާފަށް ފުލުހުން ޕެޕަ ސްޕްރޭ ބޭނުން ކުރާ މައްސަލަ އާއި އިސްލާމީ މަރުކަޒުގެ ބޭރުގައި ދުއާ ކުރުން ހުއްޓުވާތީ އެކަމުގެ ޝަކުވާ ހިމެނެ އެވެ.

"މީގެ ފަހުން، ޣައިރު ގާނޫނު އަމުރުތަކަށް ތަބާވާ ފުލުހުންނާ މެދު ފިޔަވަޅު އަޅައި ދިނުމަށް އެދި ކޮމިޝަންތަކަށް ހުށަހަޅާނަން،" މަހުލޫފް ވިދާޅުވި އެވެ.

މީގެ އިތުރުން، ސިޔާސީ އެއްވެސް ހަރަކާތެއް ހިންގުމަށް ޖާގަ ނުދޭ މައްސަލަ އާއި ކުރީގެ ޑިފެންސް މިނިސްޓަރު މުހައްމަދު ނާޒިމަށް އިންސާފު ލިބުމުގެ ކަންކަމާއި މަޖިލީހުގެ ކުރީގެ މެމްބަރު އަފްރާޝީމް އަލީގެ ގާތިލް ހުސެން ހުމާމްގެ މަރުގެ މައްސަލާގައި ވެސް ވަނީ މަޝްވަރާކޮށްފަ އެވެ.

މުލިއާގެ ކައިރީގައި ނޫސްވެރިންނާ ވާހަކަ ދައްކަވަމުން އިއްތިހާދުގެ ތަރުޖަމާނު އަހުމަދު މަހްލޫފް ވިދާޅުވީ ދެ ކޮމިޝަނުން ފުލުހުންގެ މައްސަލަތައް ނުބެލިޔަސް، ކޮމިޝަންތައް މިނިވަން ތަންތަނަށް ހަދައިގެން މައްސަލަތައް ބެލެނޭ ގޮތް އިދިކޮޅު އިއްތިހާދުން ރާވަމުންދާ ކަމަށެވެ.

"ވަކިވަކި ފުލުހުން ވެސް ހިންގާ ޣައިރު ގާނޫނީ އަމަލުތަކާ މެދު ފިޔަވަޅު އަޅައި އެ މީހުން ޒިންމާ ދާރުކޮށްގެން ނޫނީ މި މައްސަލަ ހައްލު ނުކުރެވޭނެ،" ގަލޮޅު ދެކުނު ދާއިރާގެ މެމްބަރު ވިދާޅުވި އެވެ.

މަހްލޫފް ވަނީ ފުލުހުންގެ އިސް މަގާމުތަކުގައި ތިއްބެވި ބޭފުޅުން ކުރައްވާ ޣައިރު ގާނޫނީ އަމުރުތަކަށް ތަބާ ނުވުމަށް ފުލުހުންނަށް ގޮވާލައްވާފަ އެވެ. އަދި ޣައިރު ގާނޫނީ އަމުރުތަކަށް ތަބާނުވުމުގެ ހައްގު ގާނޫނު އަސާސީން ވެސް ލިބިދޭކަން އޭނާ ފާހަގަކުރެއްވި އެވެ.

މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވީ ފުލުހުންގެ ގަވާއިދުގައި ޔުނިފޯމްގައި ނަން ޖަހާފައި ޓެގް ހުންނަން ޖެހޭ ކަމަށް ބުނެފައި އޮންނައިރު، ސިޔާސީ ހަރަކާތްތައް ހުއްޓުވަން ފުލުހުން ނުކުންނަނީ ޓެގް ނުޖަހާ ކަމަށެވެ. އެހެންވެ، އެކަން ވެސް ދެ ކޮމިޝަންގެ ސަމާލު ކަމަށް ގެންނެވި ކަމަށް އޭނާ ވިދާޅުވި އެވެ.

މީގެ އިތުރުން ގްރީން ޒޯނުގެ ގޮތުގައި ކަނޑައަޅަނީ ރައީސް އަބްދުﷲ ޔާމީން ބޭނުންފުޅުވާ ތަނެއް ކަމަށާއި އެއްވެ އުޅުމާއި ހިޔާލު ފާޅުކުރުމުގެ ހައްގު "ސަސްޕެންޑް" ކޮށްފައި އޮތްކަން ދެ ކޮމިޝަނަށް އެންގި ކަމަށް އޭނާ ވިދާޅުވި އެވެ.

އެސްޓީއޯގެ ކުރީގެ މެނޭޖިން ޑިރެކްޓަރު އަދި އިއްތިހާދުގެ ހިޔަނި ކެބިނެޓްގެ ޓްރޭޑް އެންޑް ޓްރާންސްޕް މިނިސްޓަރު އާދަމް އާޒިމް ވިދާޅުވީ އިއްތިހާދުން މަސައްކަތް ކުރާނީ ހަމައެކަނި ސިޔާސީ ޕާޓީތަކުން ހަރަކާތް ހިންގުމުގެ ހައްގު ހޯދައި ދިނުމަށް ނޫން ކަމަށާއި ފުލުހުންގެ ހިމާޔަތުގައި ވެސް އިއްތިހާދު އޮންނާނެ ކަމަށެވެ.

އިދިކޮޅު އިއްތިހާދުން ވަނީ ކިތަންމެ ދަތިތަކެއް ހުރި ކަމަށް ވިޔަސް މާދަމާ ރޭ ބާއްވާ އެމްޑީޕީގެ އަހަރީ ދުވަހުގެ ހިނގާލުމާއި އަންނަ ބުރާސްފަތި ދުވަހު ބާއްވާ އިއްތިހާދުގެ ޖަލްސާ އޮންނާނެކަން ހާމަކޮށްފަ އެވެ. އަދި ހިނގާލުމާއި ޖަލްސާގައި ވީހާ ވެސް ގިނަ ބަޔަކު ބައިވެރިވުމަށް އިއްތިހާދުން ވަނީ ގޮވާލާފަ އެވެ.

ހުރަވީ ބިލްޑިން ބޭރުގައި އިއްތިހާދުން ނޫސްވެރިންގެ ބައްދަލުވުން ބާއްވަން މަސައްކަތް ކުރި ނަމަވެސް، ފުލުހުން ވަނީ ނޫސްވެރިންނަށް ހުރަސް އަޅައި ގްރީން ޒޯނުން ބޭރަށް ދިއުމަށް އިންޒާރުކޮށްފަ އެވެ.

މީގެ އިތުރުން މުލިއާގެ ކައިރި އާއި ވެލާނާގޭ ކައިރީގައި ނޫސްވެރިންގެ ބައްދަލުވުން ބާއްވަމުން ދަނިކޮށް ފުލުހުން އަނެއްކާ ވެސް އައިސް އެ ސަރަހައްދުން ފޮނުވާލުމުން އިއްތިހާދުން ނޫސްވެރިންގެ ބައްދަލުވުން ބޭއްވީ ރާއްޖެ ޓީވީ ހުންނަ އިމާރާތް ކުރިމަތީގަ އެވެ.