އައްޑު އަށް ދިޔައީ ބަލައިލަން، މަރުވީ ގެއަށް ދިޔަ މަގުމަތީގައި

އުމުރުން 13 އަހަރުގެ އަރުޝާން އިބްރާހިމް އައްޑު އަށް އިއްޔެ ދިޔައީ ފުރަތަމަ ފަހަރަށެވެ. ބޭބެއަކާ އެކު އިންޖީނު ދޯންޏެއްގައި އެ ރަށަށް ގޮސް ބޭބެ ދޯނީގައި މަޑުކުރީ އެވެ. މަރަދޫގައި ހުންނަ ރަހުމަތްތެރިޔާގެ ގެ އަށް ހެނދުނު އޭނާ ދިޔައީ ރަހުމަތްތެރިޔާގެ ސައިކަލުގައި އޭނާއާ އެކުގަ އެވެ.

އެކަމަކު މާ ގިނަ އިރުތަކެއް ނުވެ، ހިނގި އެކްސިޑެންޓެއްގައި އަރުޝާން މަރުވީ އެވެ.

އަރުޝާނަކީ ވާދޫ ސްކޫލުގެ ގްރޭޑް އަށެއްގައި ކިޔަވަމުން އައި ދަރިވަރެކެވެ. މިއީ ސްކޫލް ބަންދު ދުވަސްވަރުކަމުން، މަޖާކޮށްލަން އޭނާ އައްޑު އަށް ދިޔައީ އެވެ. އެކަމަކު ރަށުގައި ގިނަ ބަޔަކާ ގުޅިގެން އުޅޭ އަދި މޮޅަށް ރާޅާ އަޅާ މި ކުއްޖާ މަރުވުމުން ވާދު އަށް ވަނީ ބޮޑު ހިތާމައެއް ކުރިމަތިވެފަ އެވެ.

މަންޒަރު ދުށް މީހުން ބުނާ ގޮތުން އެކްސިޑެންޓްވީ ސައިކަލްގެ ފަހަތުން ދުއްވާފައި އައި ޕިކަޕަކުން ސައިކަލުގައި ޖެހިގެންނެވެ. ސައިކަލު ފަހަތުގައި އިން އަރުޝާން ވިއްސައިގެން ގޮސް ބޯ ޖެހުމުގެ އިތުރުން އޭނާގެ ފައި ވެސް ބިނދުނެވެ.

އެކްސިޑެންޓުވިތާ މާ ގިނަ އިރުތަކެއް ނުވަނީސް އަރުޝާން ހިތަދޫ ރީޖަނަލް ހޮސްޕިޓަލަށް ގެންދިޔަ ނަމަވެސް އޭނާގެ ފުރާނަ ސަލާމަތް ކުރެވޭ ގޮތެއް ނުވި އެވެ. އޭނާ މަރުވީ ހޮސްޕިޓަލަށް ގެންދިޔަތާ ހައެއްކަ ގަޑިއިރު ފަހުންނެވެ.

މި އެކްސިޑެންޓުގައި އަރުޝާންގެ އެކުވެރިޔާ އަށް ވެސް ބޮޑެތި އަނިޔާތަކެއް ލިބުނެވެ. އިތުރު ފަރުވާ އަށް އޭނާ މިއަދު ވަނީ މާލެ ގެނެސްފަ އެވެ. އުމުރުން 21 އަހަރުގެ އެ ޒުވާނާ ގިނަ ދުވަސްތަކެއް ވާންދެން ވާދޫގައި ދިރިއުޅުނެވެ.

އަރުޝާންގެ އާއިލާގެ ވާހަކަ މީގެ ކުރިން ވެސް "މިހާރު"ގައި ވަނީ ލިޔެފަ އެވެ. އެއީ ރާޅާ އެޅުމަށް ވާދޫގައި މަޝްހޫރު އާއިލާއެކެވެ. އޭނާގެ އާއިލާގައި ދިހަ ކުދިން ތިބޭއިރު، އެ ކުދިންނާ އެކު އެ މީހުންގެ މަންމަ ވެސް ރާޅާ އަޅަ އެވެ.

ކޮންމެ ބަންދު ދުވަހެއްގައިހެން އަރުޝާން މޫދަށް އެރި ރާޅާއަޅާއިރު ރަށުގައި ބާއްވާ ރާޅާ އެޅުމުގެ އެކި މުބާރާތްތަކުގައި ވެސް ބައިވެރިވެ އެވެ.

"އަދިވެސް ގަބޫލެއް ނުކުރެވޭ އޭނާ މަރުވީކަން. އެހާ ޅައުމުރުގައި އެހާ މޮޅަށް ރާޅާ އަޅާކުއްޖެއް މަދުވާނެ،" ވާދޫގައި ކުޑަކުދިންނަށް ރާޅާ އަޅަން ދަސްކޮށްދޭ އިންސްޓްރަކްޓަރަކު ބުންޏެވެ.

އާއިލާގައި ހަތަރު ވަނަ އަށް އެންމެ ދޮށީ ކުއްޖާ، އަރުޝާން ވަރަށް ކުޑައިރު އޭނާގެ ބައްޕަ ވަނީ މަރުވެފަ އެވެ. އެހެންކަމުން ހުރިހާ ކުދިން ވެސް ބަލައިބޮޑުކުރަމުން އަންނަނީ އޭނާގެ މަންމަ އެކަންޏެވެ.