އައްޑޫ ހިތަދޫގައި އެކްސިޑެންޓެއްގައި ޒުވާނަކު މަރުވެއްޖެ

އައްޑޫ ހިތަދޫގައި ރޭ ދަންވަރު ހިނގި އެކްސިޑެންޓެއްގައި މީހަކު މަރުވެއްޖެ އެވެ.

ބާރު ސްޕީޑުގައި އެކަނި ދުއްވި ސައިކަލެއް ކޮންޓްރޯލް ނުވެ ފާރެއްގައި ޖެހިގެން ރޭ ދަންވަރު 12:30 ހާއިރު ހިނގި މި އެކްސިޑެންޓުގައި މަރުވީ ހިތަދޫ ރަހަދޫގޭ މުހައްމަދު އަލްތާފް، 24 އެވެ.

އައްޑޫ ހޮސްޕިޓަލުން ބުނިގޮތުގައި އެ ޒުވާނާ މަރުވީ އެކްސިޑެންޓުގައި ބޮލަށް ލިބުނު އަނިޔާތަކާ ގުޅިގެން ރޭ ދަންވަރު 12:57 ގަ އެވެ.

އެކަމަކު، މި އެކްސިޑެންޓާ ގުޅޭ ގޮތުން ފުލުހުން އަދި ވަކި އެއްޗެއް ނުބުނެ އެވެ.

އައްޑޫގައި މީގެ ކުރިން ވެސް މަގުމަތީގެ ނުރައްކާތެރި އެތައް ހާދިސާއެއް ހިނގައި އެތައް ބަޔަކު މަރުވެފައިވެ އެވެ.