އިންޑިއާ މީހުންނަށް އެންމެ މަގުބޫލް ހަނީމޫން މަންޒިލްތަކުގެ ތެރޭގައި ރާއްޖެ

އިންޑިއާ މީހުންގެ މެދުގައި އެންމެ މަގުބޫލް ހަނީމޫން ތިން މަންޒިލްގެ ތެރޭގައި ރާއްޖެ ހިމެނިއްޖެ އެވެ.

ދުނިޔޭގެ އެންމެ ވަރުގަދަ ސާޗް އިންޖީން، ގޫގުލް އިންޑިއާއާ ހަވާލައިދީ އެ ގައުމުގެ ނޫހެއްގައި ބުނެފައި ވަނީ އެންމެ މަގުބޫލް ހަނީމޫން މަންޒިލްތަކުގެ ތެރޭގައި ހިމެނެނީ ރާއްޖޭގެ އިތުރުން ސީޝެލްސް އާއި އިންޑޮނޭޝިއާގެ ބާލީ ކަމަށެވެ.

އިންޑިއާގެ ނޫހުގައި ބުނެފައި ވަނީ މި އަހަރުގެ ފިނިމޫސުމާ ދިމާކޮށް ޗުއްޓީ ހޭދަކުރަން ގޫގުލް މެދުވެރިކޮށް މަންޒިލްތައް ހޯދާ އަދަދު 27 ޕަސެންޓް އިތުރުވެފައިވާ ކަމަށެވެ. އެގޮތުން އެންމެ ގިނަ ބަޔަކު ބަލަނީ އަގު ބޮޑު ޗުއްޓީ ހޭދަކުރުމަށާއި ހަނީމޫން އަދި ސަފާރީ ޑެސްޓިނޭޝަންތައް ކަމަށް ވެސް އެ ނޫހުގައި ބުނެފައިވެ އެވެ.

ގޫގުލް އިންޑިއާ އިން ބުނެފައި ވަނީ އިންޑިއާގެ އެންމެ ގިނަ މީހުން ޗުއްޓީ ހޭދަކުރަން ހޯދަނީ ދުބާއީގެ ތަންތަން ކަމަށެވެ. އޭގެ އިތުރުން ދެން އެންމެ ގިނަ ބަޔަކު ދަތުރުކުރަނީ ތައިލެންޑްގެ ބެންކޮކާއި އެމެރިކާގެ ޑިޒްނީ ލޭންޑް ބަލައިލަން ކަމަށް ވެސް ގޫގުލް އިން ބުނެފައިވެ އެވެ.

ޓޫރިޒަމް މިނިސްޓްރީން އެންމެ ފަހުން އާއްމުކުރި ތަފާސްހިސާބުތައް ދައްކާ ގޮތުން މިދިޔަ ނޮވެމްބަރު 7،231 މީހުން ޒިޔާރަތްކޮށްފައިވެ އެވެ. މިއީ މިދިޔަ އަހަރުގެ އެ މުއްދަތާ އަޅާބަލާއިރު 4.9 ޕަސެންޓް އިތުރު އަދަދެކެވެ.