ޕްރައިމަރީ އަކާ ނުލައި ރައީސް ޔާމީނަށް ޓިކެޓެއް ނުދެވޭނެ: އިދިކޮޅު ފަރާތްތައް

މި އަހަރުގެ ރިޔާސީ އިންތިޚާބަށް ޕްރައިމަރީ އަކާ ނުލައި ރައީސް އަބްދުﷲ ޔާމީނަށް ޕީޕީއެމްގެ ރިޔާސީ ޓިކެޓް ދޭން އެ ޕާޓީން ވިސްނި ނަމަވެސް އެއީ ގަވައިދާ އެއްގޮތަށް ކުރެވޭނެ ކަމެއް ނޫން ކަމަށް އިދިކޮޅު ފަރާތްތަކުން މިއަދު ބުނެފި އެވެ.

އިދިކޮޅު ހަރަކާތުގެ މައި ޖަގަހަ އަދި ޖުމްހޫރީ ޕާޓީގެ އޮފީސް މ. ކުނޫޒްގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން، ވެރިކަން ކުރާ ޕާޓީ، ޕީޕީއެމްގެ މެމްބަރެއްގެ ގޮތުގައި ކުރިން ހުންނެވި މުހައްމަދު އަމީތު ވިދާޅުވީ ޕްރައިމަރީއަކާ ނުލައި ރައީސް ޔާމީނަށް ޓިކެޓް ދިނުން، އެ ޕާޓީގެ އަސާސީ ގަވައިދާ ވެސް ޚިލާފު ކަމަށެވެ.

އިދިކޮޅު ހަރަކާތުން އެހެން ބުނި ނަމަވެސް، ޕީޕީއެމްގެ ކައުންސިލްގެ ގިނަ ބޭފުޅުންގެ ވިސްނުން މިހާރު ވެސް ހުރީ، ޕްރައިމަރީއަކާ ނުލައި ރައީސް ޔާމީނަށް ޓިކެޓް ދިނުމަށެވެ. އެހެންވެ، މި އަހަރުގެ ރިޔާސީ އިންތިޚާބަށް އެ ޕާޓީން ވަނީ ރައީސް ޔާމީންގެ ކެމްޕޭން ފަށައިފަ އެވެ.

ޕީޕީއެމްގެ އެތެރޭގެ މައްސަލަތައް ވެސް ގޯސްވީ، ޕްރައިމަރީއަކާ ނުލައި ރައީސް އަބްދުﷲ ޔާމީނަށް މި އަހަރުގެ ރިޔާސީ ޓިކެޓް ދޭން އެ ޕާޓީގެ ކައުންސިލަށް ގަރާރެއް ހުށަހަޅަން އުޅުނު ހިސާބުންނެވެ. އޭރުކަމާ ދެކޮޅަށް އެންމެ ބޮޑަށް ވާހަކަ ދެއްކެވި ކުރީގެ ރައީސް މައުމޫން އަބްދުލްގައްޔޫމު ވެސް ޕާޓީން ވަކި ކުރެއްވީ އެ މައްސަލަގަނޑުގެ ތެރެއިންނެވެ.

މި މައްސަލާގައި އަމީތު ވިދާޅުވީ ޕީޕީއެމްގައި އިޚުލާސްތެރިކަމާއެކު މަސައްކަތް ކުރަމުން ދިޔަ ގިނަ ބަޔަކު އެ ޕާޓީން ބޭރު ކުރީ ވެސް އެކަމާ ދެކޮޅު ހެދުމުން ކަމަށާއި ޕީޕީއެމް ފުނޑުފުނޑުވި އެންމެ ބޮޑު ސަބަބަކީ ވެސް އެއީ ކަމަށެވެ.

އިދިކޮޅު ކޯލިޝަނުގެ ފަރާތުން ވާހަކަ ދައްކަވަމުން، މަޑުއްވަރީ ދާއިރާގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ އަމީތު ވިދާޅުވީ، ވަކި ފެކްޝަނެއްގެ ގޮތުގައި ހިންގި ނަމަވެސް، ޕީޕީއެމް ވެސް ދެމި އޮންނަން ޖެހޭނީ ޑިމޮކްރެޓިކް އުސޫލުތަކުގެ ދަށުން ކަމަށެވެ. އަދި ޚާއްސަކޮށް ގައުމެއްގެ ރައީސަކު ދެވަނަ ދައުރަކަށް ކުރިމަތިލާއިރު، އެއީ ޑިމޮކްރަޓިކް އުސޫލުތަކާއި ހަމަތަކުގެ ދަށުން ކުރަން ޖެހޭނެ ކަމެއް ކަމަށް ވެސް އޭނާ ވިދާޅުވި އެވެ.

ޕްރައިމަރީއަކާ ނުލައި ރައީސް ޔާމީނަށް ޓިކެޓް ދިނުން އަމީތު ސިފަ ކުރެއްވީ "ޑިމޮކްރަސީއާ ބީރައްޓެހި، ހުދުމުހުތާރު ވެރިކަމެއްގެ" ގޮތުގަ އެވެ.

ޓޫރިޒަމް މިނިސްޓަރު އަދި ޕީޕީއެމްގެ ނައިބު ރައީސް މޫސާ ޒަމީރު ކުރިން ވިދާޅުވެފައިވާ ގޮތުގައި ޕްރައިމަރީއަކަށް ނުގޮސް ރައީސް ޔާމީނަށް ފުރުސަތު ދެއްވަން ޖެހޭ ކަމަށް އޭނާ ގަބޫލުކުރައްވަ އެވެ. އެގޮތަށް ނިންމުމަށް އެދިި ކައުންސިލަށް ހުށަހެޅުއްވުމުގެ ވިސްނުން ވެސް ގެންގުޅުއްވާ ކަމަށް ޒަމީރު ވިދާޅުވި އެވެ.

އަމީތު ވިދާޅުވީ ޕީޕީއެމްގެ އަސާސީ ގަވައިދަށް ބެލިކަމުގައި ވިޔަސް، ޕްރައިމަރީއަކާ ނުލާ ވަކި މީހަކަށް ޓިކެޓް ދީގެން، ޕީޕީއެމްގެ ނަމުގައި ވާދަކުރުމުގެ ފުރުސަތެއް ނެތް ކަމަށެވެ.

ޕީޕީއެމްގެ އަސާސީ ގަވައިދު ބުނާ ގޮތުން ނަމަ، ރިއާސީ އިންތިހާބުގައި ވާދަކުރާ ކެންޑިޑޭޓަކަށް ވާނީ އެކަމަށް ކުރިމަތިލާ މީހުންގެ މެދުގައި ބާއްވާ ޕްރައިމަރީގައި އެންމެ ގިނަ ވޯޓު ލިބޭ މީހެކެވެ.

ޕީޕީއެމްގެ މެންބަރަކު ރައީސުލްޖުމްހޫރިއްޔާގެ މަގާމުގައި ފުރަތަމަ ދައުރު ފުރިހަމަކޮށް ނިމޭ އިރު ބާއްވާ އިންތިހާބުގައި، އަމަލުކުރާނެ ގޮތް ބަޔާންކުރާ މާއްދާގައި ބުނެފައި ވަނީ، ޕީޕީއެމްގެ ޓިކެޓްގައި ރައީސުލްޖުމްހޫރިއްޔާގެ މަގާމަށް އިންތިހާބުވެ، ފަސް އަހަރުގެ ދައުރެއް އަދާކުރައްވާ ބޭފުޅަކު، ދެ ވަނަ ދައުރަކަށް ޕާޓީގެ ޓިކެޓްގައި ވާދަކުރައްވަން އެދިވަޑައިގަންނަވާ ނަމަ، ޕްރައިމަރީއެއް ނުބާއްވައި އެ ބޭފުޅަކަށް ޓިކެޓް ދެވިދާނެ ކަމަށެވެ.

ޕްރައިމަރީއެއް ބާއްވަން ޖެހޭނީ، ޕްރައިމަރީ ބާއްވަން ފެންނަ ކަމަށް ކޮންގްރެސްގެ ބައްދަލުވުމުން ފާސްކޮށްފި ނަމަ އެވެ.

"...މިއި ރާއްޖޭގެ ގާނޫނުއަސާސީ ކަނޑައަޅާފައިވާ އުސޫލުތަކުގެ ތެރެއިން އުފެދިފައިވާ ކަމަށް ބުނާ އަދި ޕާޓީއެއްގެ އޯނާޝިޕަށް ކްލެއިމް ކުރާ ފެކްޝަނަކުން ދައްކަމުން އަންނަ ވާހަކަތަކެއް. މި އުސޫލުގެ ތެރެއިން، ފުރަތަމަ ކަމަކީ ރައީސް ޔާމިނަށް ޕްރައިމަރީއަކާ ނުލައި ޓިކެޓް ދޭ ވާހަކަ މި ބޭފުޅުން މި ދައްކަވަނީ ޕީޕީއެމްގެ އަސާސީ ގަވައިދަށް ބެލުމެއް ނެތި. ދެވަނަ ނުކުތާ އަކީ، ރައީސް ޔާމީނަށް ރިޔާސީ ޓިކެޓް ދިނުމަކުން އަދި ފަރަކު ނުޖެއްސޭނެ. ސަބަބަކީ އެ ޓިކެޓަށް ދެވެނީ ގާނޫނުތަކާ ހިލާފަށް ޕާޓީއެއްގެ އޯނާޝިޕަށް ކްލެއިމް ކުރާ ބަޔަކު ހިންގާ ޕާޓީއެއްގެ ތެރެއިން،" ޕީޕީއެމް ހިންގަނީ ޕާޓީ ހިންގުމުގެ ގަވައިދުތަކާ ވެސް ހިލާފަށް ކަން ފާހަގަ ކުރައްވައި އަމީތު ވިދާޅުވި އެވެ.

އޭނާ ވިދާޅުވިގޮތުގައި، ޕީޕީއެމްގެ ކައުންސިލްގައި ތިއްބެވި ގިނަ މެމްބަރުންތަކެއް ވަކިކޮށް، ސައްހަ ނޫން ކައުންސިލަކުން، އާއްމުކޮށް އިއުލާނު ކުރުމަކާ ނުލައި ވަކި މީހަކަށް ދޭ ޓިކެޓެއްގައި ގާނޫނީ ސައްހަ ކަމެއް ނޯންނާނެ އެވެ. އަދި އެއީ އިދިކޮޅު ފަރާތްތަކަށް ފަހުން ޗެލެންޖު ކުރެވިދާނެ ކަމެއް ކަމަށް ވިދާޅުވި އެވެ..

ޕީޕީއެމްގެ އިސް ބައެއް ބޭފުޅުން ވިދާޅުވާ ގޮތުން ވެރިކަމުގެ ފުރަތަމަ ދައުރުގެ ތެރޭގައި ރައީސް ޔާމީން ގައުމަށް ގެނެސްދެއްވި ތަރައްގީ އާއި ރައްޔިތުންނަށް ކޮށްދެއްވި ޚިދުމަތްތަކުން، ޕްރައިމަރީއަކާ ނުލައި ޕާޓީގެ ޓިކެޓް ހައްގެވެ. އަދި އިންތިހާބުގައި އެ މަނިކުފާނު ވާދަކުރައްވާއިރު، ޕްރައިމަރީއެއް ބޭއްވުމުގެ ބޭނުމެއް ނެތް ކަމަށް ވެސް އެ ބޭފުޅުން ދެކެވަޑައިގަންނަވަ އެވެ.