ޕޮލިސް ކޮމިޝަނަރު ކަމުން އަރީފް ވަކި ކުރައްވައިފި

ޕޮލިސް ކޮމިޝަނަރު އަހުމަދު އަރީފް މިރޭ މަގާމުން ވަކި ކުރައްވައިފަ އެވެ.

އިދިކޮޅު ލީޑަރުން ދޫކޮށްލުމަށާއި ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅި 12 މެމްބަރުންގެ ގޮނޑި ނުގެއްލޭ ކަމަށް ސުޕްރީމް ކޯޓުން ކަނޑައަޅައި، މިރޭ އަމުރު ނެރުމާ ގުޅިގެން މިރޭ ބޭއްވި ޕްރެސް ކޮންފަރެންސެއްގައި އެޓާނީ ޖެނެރަލް މުހައްމަދު އަނިލް ވަނީ އަރީފް މަގާމުން ވަކިކުރެއްވި ކަން ކަށަވަރުކޮށް ދެއްވައިފަ އެވެ.

އަނިލް ވިދާޅުވީ އެ އަމުރު ނެރުމާ ގުޅިގެން އަރީފާ ގުޅުއްވަން ރައީސް އަބްދުﷲ ޔާމީން މަސައްކަތް ކުރެއްވި ކަމަށާއި އެކަމަކު ގުޅޭ ގޮތެއް ނުވި ކަމަށެވެ. އަރީފް މަގާމުން ވަކި ކުރެއްވުމުން ފުލުހުންގެ އިދާރާ ހިންގެވުން ހަވާލު ކުރައްވާފައިވަނީ ޑެޕިއުޓީ ކޮމިޝަނާ އޮފް ޕޮލިސް އަހުމަދު ސައުދީއާ އެވެ.

ސުޕްރީމް ކޯޓުގެ އެ އަމުރާ ގުޅިގެން ސަރުކާރުން ބުނެފައިވަނީ އެ އަމުރާ ގުޅިގެން ބަލަންޖެހޭ ކަންކަން ސަރުކާރުން ބަލަމުންދާ ކަމަށެވެ.

އެ އަމުރަށް ފަހު އިދިކޮޅު ފަރާތްތަކުން ދަނީ އުފާ ފާޅު ކުރަމުންނެވެ. އިދިކޮޅު ހުރިހާ ލީޑަރުން ވަނީ އެ ހުކުމަށް މަރުހަބާ ކިޔައިފަ އެވެ. ޖަލުގައި ތިއްބެވި އިދިކޮޅު ލީޑަރުން މާލެ ގެނައުމުގެ މަސައްކަތް ދަނީ ކުރަމުންނެވެ.