ހައްޔަރު ކުރިއަސް އިސްލާހީ މަސައްކަތް ކާމިޔާބު ކުރާނަން: މައުމޫން

ހައްޔަރު ކުރިއަސް އިސްލާހީ މަސައްކަތް ކާމިޔާބު ކުރައްވާނެ ކަމަށް ކުރީގެ ރައީސް މައުމޫން އަބްދުލްގައްޔޫމް މިރޭ ވިދާޅުވެއްޖެ އެވެ.

މައުމޫން މިހެން ވިދާޅުވީ އެ މަނިކުފާނު ހައްޔަރުކުރަން ފުލުހުން އެންދެރިމާގެ އަށް ވަދެ އުޅެނިކޮށް، ވީޑިއޯ މެދުވެރިކޮށް ރައްޔިތުންނަށް ދެއްވި މެސެޖެއްގަ އެވެ. މައުމޫނަށް ތުހުމަތު ކުރަނީ ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދެއްވަން އުޅުއްވުމާއި ވެރިކަން ވައްޓާލަން އުޅުއްވުމުގެ ތުހުމަތެވެ.

މިއީ، މައުމޫންގެ ދަރިކަލުން އަދި ދިއްގަރު ދާއިރާގެ މެމްބަރު އަހްމަދު ފާރިސަށް ވެސް ކޮށްފައިވާ ތުހުމަތެވެ. އެ ތުހުމަތުގައި އޭނާ ބަންދުކޮށްފައި ހުންނަތާ ހަ މަސް ދުވަހަށް ވުރެ ގިނަ ދުވަސް ވެއްޖެ އެވެ.

މައުމޫން ވިދާޅުވި ގޮތުގައި އެމަނިކުފާނު ހައްޔަރުކުރަން ޖެހޭ ވަރުގެ ކަމެއް ނޯންނާނެ އެވެ.

"އެކަމުގެ ޔަގީންކަން އަޅުގަނޑު އަރުވަން، އަޅުގަނޑު މިހިރީ ހިތްވަރާއި ސާބިތުކަމާ އެކުގައި. އަޅުގަނޑުމެން މި ކުރާ އިސްލާހީ މަސައްކަތް ދުލެއް ނުކުރާނަން، އިރާދަ ކުރެއްވިއްޔާ އެ މަސައްކަތް ކާމިޔާބުކުރާނަން،" މައުމޫން ވިދާޅުވި އެވެ.

މައުމޫން ދެއްވި ކުރު މެސެޖުގައި، ރައްޔިތުން ހިތްވަރާއެކު ތިއްބެވުމަށް އެދިވަޑައިގެންނެވި އެވެ. އެ މަނިކުފާނު ހައްޔަރުކުރަން މީގެ ކުރިން ވެސް އަމުރެއް ހޯދަން ފުލުހުން މަސައްކަތް ކުރި ކަމަށް ވަނީ އަޑުފެތުރިފަ އެވެ.

އެމަނިކުފާނު ހައްޔަރުކުރަން އެންދެރިމާގެ އަށް ފުލުހުން ވަނީ އެންދެރިމާގޭ ދޮރު ހަލާކު ކޮށްލައިގެންނެވެ. މައްސަލައިގެ ތުހުމަތަށް މައުމޫންގެ ފޯނު ހިފަހައްޓާފައިވާ އިރު އެ މަނިކުފާނު ދިރިއުޅުއްވާ ކޮޓަރިކޮޅު ވެސް ބަލައި ފާސްކުރި އެވެ.

ކޮއްކޯފުޅު، ރައީސް ޔާމީން ވެރިކަމަށް ގެންނެވުމަށް އެންމެ ބުރަކޮށް މަސައްކަތްޕުޅު ކުރެއްވި މައުމޫން ސަރުކާރާ ފެއަށް ޖެހިވަޑައިގަތީ، ރައީސް ޔާމީން ވެރިކަން ކުރައްވާ ގޮތުން ގައުމާއި ރައްޔިތުންނަށް ގެއްލުންވަމުންދާ ކަމަށް ވިދާޅުވެ އެވެ.

މި ސަރުކާރުން މައުމޫން ހައްޔަރު ކުރި އިރު، މީގެ ކުރިން ދެ ފަހަރެއްގެ މަތިން، ކުރީގެ ރައީސް އިބްރާހިމް ނާސިރުގެ ވެރިކަމުގައި ވެސް މައުމޫން ވަނީ ހައްޔަރުކޮށްފަ އެވެ. އެގޮތުން ނާސިރުގެ ސިޔާސަތަށް ފާޑުވިދާޅުވެގެން 1973 ގައި ހައްޔަރުކޮށް، ހަތަރު އަހަރަށް އަރުވާލަން ހުކުމްކުރި އެވެ. އެކަމަކު ހދ. މަކުނުދޫގައި ފަސް މަސް ދުވަސް ހޭދަކުރެއްވި ތަނުން، ނާސިރުގެ ދެ ވަނަ ދައުރު ފެއްޓެވުމުގެ މުނާސަބަތުގައި ދެއްވި އަފޫއާންމެއްގައި މިނިވަންވެވަޑައިގެންނެވި މައުމޫން، ދެ ވަނަ ފަހަރަށް ހައްޔަރުކުރީ 1974 ގަ އެވެ. އެ ފަހަރު މާލޭ ޖަލުގައި 50 ދުވަހު އޮންނެވި އެވެ.