މެމްބަރު އަލީ ހުސައިން ފުލުހަށް ހާޒިރުވާން އަންގައިފި

ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން މިރޭ ފުލުސް އޮފީހަށް ހާޒިރުވާން އަންގައިފި އެވެ.

ޖުމްހޫރީ ޕާޓީގެ މެމްބަރު އަލީ ހުސެއިން ފުލުހަށް ހާޒިރުވާން އަންގައި، ޗިޓް ހަވާލުކުރީ އިދިކޮޅު ފަރާތްތަކުން ރޭ ބޭއްވި މުޒާހަރާ ތެރެއިން އޭނާ ހައްޔަރު ކުރުމަށް ފަހު ދޫކޮށްލުމުގެ ކުރިންނެވެ. އޭނާ ރޭ ދޫކޮށްލީ ހައްޔަރުކޮށް، ފުލުސް އޮފީހަށް ގެންގޮސް ޗިޓް ހަވާލު ކުރުމަށް ފަހު އެވެ.

އަލީ ހުސައިން ފުލުހަށް ހާޒިރުވާން އެންގިއިރު، މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް އިއްޔެ އާއި މިދިޔަ ހުކުރު ދުވަހު ވެސް ވަނީ ފުލުހަށް ހާޒިރުކޮށްފަ އެވެ. އޭނާ ހާޒިރުކުރީ އޭނާގެ މައްޗަށް ތުހުމަތު ކުރެވޭ އެކި މައްސަލަތަކާ ގުޅިގެން ސުވާލު ކުރުމަށެވެ.

އަލީ ހުސައިނާއި މަހްލޫފް ފުލުހަށް ހާޒިރު ކުރާއިރު، އިދިކޮޅު ކޯލިޝަންގެ މަޖިލީހުގެ ތިން މެމްބަރަކު މިވަގުތު ވެސް ތިއްބެވީ ބަންދުގަ އެވެ. އެއީ ދިއްގަރު ދާއިރާގެ މެމްބަރު އަހުމަދު ފާރިސް މައުމޫނާއި މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ސިނާނާއި ދަނގެތި ދާއިރާގެ މެމްބަރު އަހުމަދު އިލްހާމެވެ.

މި މަހުގެ ފަސްވަނަ ދުވަހުގެ ރޭ ކުއްލި ނުރައްކަލުގެ ހާލަތު އިއުލާން ކުރުމަށް ފަހު، ކުރީގެ ރައީސް މައުމޫން އަބްދުލްގައްޔޫމާއި އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދާއި އިތުރު ބައެއް ބޭފުޅުން ވަނީ ހައްޔަރުކޮށްފަ އެވެ.