ޗެނަލް 13ގެ ނޫސްވެރިޔާ ލަޔާލް އަށް ފުރައްސާރަ ކުރި މައްސަލަ ޕީޕީއެމުން ކުށްވެރިކޮށްފި

އިދިކޮޅު ފަރާތްތަކުން މިއަދު ހަވީރު މާލޭގެ މަޖީދީ މަގުގެ އެކި ސަރަހައްދުތަކުގައި ބޭއްވި އެއްވުން ކަވަރު ކުރަން އުޅުނު "ޗެނަލް 13" ގެ ނޫސްވެރިޔާ އާމިނަތު ލަޔާލް އަށް އެ އެއްވުމުގެ ބައެއް މީހުން ފުރައްސާރަކޮށް، ޖެއްސުން ކުރި މައްސަލަ ޕީޕީއެމުން ކުށްވެރިކޮށްފި އެވެ.

ލަޔާލް އެ އެއްވުން ލައިވް ކުރަމުން ދަނިކޮށް، އިދިކޮޅު ފަރާތްތަކުގެ ބައެއް މީހުން ވަނީ އޭނާ އަށް ޖެއްސުންކޮށް، އަޑުގަދަކޮށް އަދި ލައިވަށް ވެސް ހުރަސް އަޅައިފަ އެވެ. ލަޔާލް އޮން ކެމެރާގައި ވާހަކަ ދައްކަމުން ދަނިކޮށް، އެއްވުމުގެ އަންހެން ބައިވެރިއަކު ވަނީ މައިކް ކައިރި އަށް ގޮސް ވާހަކަ ދެއްކުމަށް ލަޔާލް އަށް ހުރަސް އަޅައިފަ އެވެ. އަދި އެ އަންހެންމީހާ ވަނީ ޗެނަލް 13 ގެ ކެމެރާގެ ކުރިމައްޗަށް ވެސް އަރައި ލަޔާލް އަށް އުނދަގޫކޮށްފަ އެވެ.

އެކަމާ ގުޅިގެން، ވެރިކަން ކުރާ ޕާޓީ ޕީޕީއެމުން މިރޭ ނެރުނު ބަޔާނެއްގައި ބުނީ ރައްޔިތުންނަށް ތެދު މައުލޫމާތު ފޯރުކޮށް ދިނުމަށް ޗެނަލް 13 ގެ ރިޕޯޓަރު މަސައްކަތް ކުރަނިކޮށް އޭނާއާ ހުތުރު ބަހުން މުއާމަލާތްކޮށް ފުރައްސާރަ ކޮށްފައިވާ ކަމަށެވެ. އެކަން ހަރުކަށި އިބާރާތުން އެ ޕާޓީން ވަނީ ކުށްވެރިކޮށްފަ އެވެ.

"އިދިކޮޅު ފަރާތްތަކުން ގާނޫނާއި ގަވައިދާ ހިލާފަށް ވެރިރަށް މާލޭގެ މަގުތަކަށް ނުކުމެ ރައްޔިތުންނަށް އުނދަގޫވާ ފަދަ އަމަލުތައް ހިންގަމުން ގެންދިއުމާއި، ހާއްސަކޮށް މިނިވަން ނޫސްވެރިކަމުގެ ދާއިރާގައި ހަރަކާތްތެރިވެ ލައްވާ ފަރާތްތަކަށް ކުރަމުން ގެންދާ ފުރައްސާރަތައް ވަގުތުން ހުއްޓާލައި މިނިވަން ނޫސްވެރިކަމަކަށް ޖާގަ ދިނުމަށް މި ޕާޓީގެ ފަރާތުން ގޮވާލަމެވެ." ޕީޕީއެމުން ބުންޏެވެ.

އެ ޕާޓީން ވަނީ ކޮންމެ ގައުމެއްގައި ވެސް އެ ގައުމެއްގެ ހާލަތު ބުނެދިނުމަށް މިނިވަން ނޫސްވެރިކަން މުހިންމު ދައުރެއް އަދާކުރާކަން ފާހަގަ ކޮށްފަ އެވެ. އަދި ނޫސްވެރިންނަށް މިނިވަންކަމާއެކު ހަރަކާތްތެރިވުމުގެ ފުރުސަތު ހުރިހާ ފަރާތްތަކުން ދޭންޖެހޭނެ ކަމަށް ޕީޕީއެމުން ބުންޏެވެ.

ސަރުކާރަށް ތާއީދު ކުރާ ފަރާތްތަކުން ހިންގާ ޗެނަލް 13 ގެ ނޫސްވެރިންނަށް އިދިކޮޅު ފަރާތްތަކުން މިއަދު ފުރައްސާރަ ކޮށްފައިވާއިރު، އިދިކޮޅު ފަރާތްތަކުގެ މުޒާހަރާތައް ކަވަރު ކުރަމުން އަންނަ ނޫސްވެރިންނަށް ފުލުހުން ހުރަސް އަޅައި ނޫސްވެރިންނަށް އަނިޔާވަމުން ދާތީ މީޑިއާތަކުން ވަނީ ކަންބޮޑުވުން ފާޅުކޮށްފަ އެވެ.