މުޒާހަރާގެ ތެރެއިން ޗެނަލް13 ގެ ނޫސްވެރިއެއްގެ ބޯ ފަޅާލައިފި

ހުޅުމާލޭގެ "ފިޔަވަތި" ގައި ހިނގަމުންދާ ކަންކަމާ ދެކޮޅަށް ކަމަށް ބުނެ އިދިކޮޅު ޕީޕީއެމް/ޕީއެންސީގެ ކޯލިޝަނުން މިރޭ މާލޭގައި ކުރި މުޒާހަރާ ކަވަރުކުރަން އުޅުނު ޗެނަލް 13 ގެ ނޫސްވެރިއެއްގެ ބޯ ފަޅާލައިފި އެވެ.

އެ ޓީވީ ސްޓޭޝަންގެ ސީއޯއޯ އަދި ނޫސްވެރިޔާ މުހައްމަދު ސަމާހުގެ ބޯ ފަޅައިގެން ގޮސްފައި ވަނީ މަޖީދީ މަގާއި ޗާންދަނީ މަގު ގުޅޭ ކަންމަތީގައި އާންމުންނާއި ފުލުހުންނާ ދެމެދު ހިނގި ކުރިމަތިލުންތަކުގެ ތެރެއިންނެވެ.

ސަމާހުގެ އިތުރުން ޗެނަލް 13 ގެ ކެމެރާމަން މުހައްމަދު ޝަހީމަށް ވެސް ވަނީ އަނިޔާވެފަ އެވެ. އެ ދެ ނޫސްވެރިންނަށް ފަރުވާ ދިނުމަށް އޭޑީކޭ ހޮސްޕިޓަލަށް ގެންދިޔަ އެވެ.

މިރޭގެ މުޒާހާރާ ކަވަރުކުރަން އުޅޭ ނޫސްވެރިންނަށް ހުރަސްއަޅަމުންދާ ކަމަށާއި އަނިޔާކުރާ ކަމަށް ވެސް ބައެއް ނޫސްވެރިން ވަނީ ތުހުމަތުކޮށްފަ އެވެ. އަދި މުޒާހަރާ ރޫޅާލުމުގެ ތެރޭގައި ނޫސްވެރިންނަށް އެއްވެސް ވަރަކަށް ބެލުމެއް ނެތި، ފުލުހުން ހަރުކަށިކަން ދައްކައި، މީޑިއާ ފާހަށް ވެސް އިސްކަން ނުދޭ ކަމަށް މުޒާހަރާ ކަވަރު ކުރުމުގައި އުޅުނު ބައެއް ނޫސްވެރިން ބުނެ އެވެ.

ހެންވޭރު ބޮޑުތަކުރުފާނު މަގުގައި ހުންނަ ޕީޕީއެމްގެ އޮފީސް ކުރިމަތިން މުޒާހަރާ ފެށި ނަމަވެސް ވަކި ހިސާބަކުން ފުލުހުން ވަނީ މުޒާހަރާ ކުރަން ފުރުސަތު ނުދޭނެ ކަމަށް ބުނެ، ގާނޫނީ އިންޒާރު ދިނުމަށް ފަހު ބާރުގެ ބޭނުންކޮށްގެން މުޒާހަރާ ރޫޅާލައިފަ އެވެ. އެއާކު މުޒާހަރާގެ ބައިވެރިން ރަށު ތެރޭ އެކި ދިމާތަކަށް ބެހިގަތެވެ.

މުޒާހަރާ ރޫޅާލަން ފުލުހުން ވަނީ ޝީލްޑާއި ޕެޕާ ސްޕްރޭ ބޭނުންކޮށްފަ އެވެ. މި ކުރިމަތިލުންތަކުގައި ބައެއް މީހުންނަށް އަނިޔާވެގެން ފަރުވާ އަށް ގެންދިޔަ އެވެ. މި މުޒާހަރާގެ ތެރެއިން ބައެއް މީހުން ވަނީ ހައްޔަރު ވެސް ކޮށްފަ އެވެ.

މި މުޒާހަރާގައި އިދިކޮޅު ކޯލިޝަންގެ ބައެއް އިސްވެރިންނާއި ސަޕޯޓަރުން ވެސް ބައިވެރިވެ އެވެ. ފިޔަވަތީގައި ހިނގާ ކަންކަމާ ދެކޮޅަށް ބާއްވާ މުޒާހަރާއެއް ކަމަށް ބުނި ނަމަވެސް، މުޒާހަރާގެ ބައިވެރިން ވަނީ ރައީސް އަބްދުﷲ ޔާމީން މިނިވަން ކުރުމަށާއި އަދުލު އިންސާފު ގާއިމް ކުރުމަށް ވެސް ގޮވާލައިފަ އެވެ.