ގާސިމް ޖަލަށްލި މައްސަލާގެ އިސްތިއުނާފް ޝަރީއަތް އާދިއްތަ ދުވަހު ފަށަނީ

ގާސިމް އިބްރާހިމް ތިން އަހަރަށް ޖަލަށްލާން ކްރިމިނަލް ކޯޓުން ކުރި ހުކުމުގެ އިސްތިއުނާފް މައްސަލައިގެ ޝަރީއަތް އާދިއްތަ ދުވަހު ފަށަން ހައި ކޯޓުން ތާވަލް ކޮށްފި އެވެ.

ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދިނުމަށް ހުށަހެޅިކަން ސާބިތުވެ، ގާސިމް ޖަލަށްލާން މިދިޔަ އަހަރު ކުރި ހުކުމް އިސްތިއުނާފް ކުރަން ގާސިމްގެ ފަރާތުން ހުށަހެޅި އިސްތިއުނާފް އެ މައްސަލައިގެ ޝަރީއަތް އާދިއްތަ ދުވަހަށް ތާވަލް ކޮށްފައިވާ ކަމަށް ހައި ކޯޓުގެ ޝެޑިއުލްގައި އޮތްއިރު، ގާސިމް މިހާރު ހުންނެވީ ޖަރުމަނުވިލާތުގަ އެވެ. އާންމު އުސޫލުން ހައި ކޯޓުން ޖިނާއީ މައްސަލަތައް ކުރިއަށް ގެންދަނީ ކުށުގެ ތުހުމަތު ކުރެވޭ މީހާ ނުވަތަ ކުށް ސާބިތުވެފައިވާ މީހާގެ ހާޒިރުގަ އެވެ.

ގާސިމް ތިން އަހަރާއި ދެ މަހާއި 12 ދުވަހަށް ޖަލަށްލާން ހުކުމް ކުރިޔަސް، އޭނާގެ ސިއްހީ ހާލަތު ހުރިގޮތުން ސަރުކާރުން ވަނީ އޭނާ ސިންގަޕޫރަށް ބޭސް ފަރުވާއަށް ފޮނުވައިފަ އެވެ. ސިންގަޕޫރުގައި ހުންނެވުމަށް ފަހު ގާސިމް ޖަރުމަނަށް ވަޑައިިގަތީ އެ ގައުމުގެ ޚާއްސަ ހުއްދައެއް ލިބިވަޑައިގެންނެވެ.

ގާސިމް ޖަލަށްލާން ހުކުމްކުރީ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމަށް އިދިކޮޅު ފަރާތްތަކުން މަޖިލީހަށް މިދިޔަ އަހަރު ހުށަހެޅި މައްސަލާގައި މަސީހާ ދެކޮޅަށް ވޯޓު ދީފި ނަމަ އިތުރު ދައުރަކަށް ހޮވައިދޭނެ ކަމަށް އޭނާ ޖަލްސާއެއްގައި ވިދާޅުވި މައްސަލާގަ އެވެ.

ގާސިމްގެ އިސްތިއުނާފް ޝަރީއަތް އާދިއްތަ ދުވަހު ތާވަލް ކުރިއިރު ރިޝްވަތުގެ ތުހުމަތެއްގައި އޭނާގެ ދަރިކަލުން ސިޔާދް ގާސިމްގެ މައްޗަށް ދައުވާ އުފުލައި، އޭނާ ވެސް ހުރީ ބަންދުގަ އެވެ.