ޓްރަމްޕްއާ ގުޅުން ބޭއްވި މޮޑެލްއަކު މެލަނިއާގެ ކިބައިން މައާފަށް އެދިއްޖެ

ވޮޝިންޓަން (މާޗް 24) - ރައީސް ޑޮނަލްޑް ޓްރަމްޕާ އެކު ގުޅުންތަކެއް ބޭއްވި މޮޑެލްއެއް ކަމަށްވާ ކަރެން މެކްޑޫގަލް، ޓްރަމްޕުގެ އަނބިކަނބަލުން މެލަނިއާގެ ކިބައިން މައާފަށް އެދިއްޖެ އެވެ.

ސީއެންއެން އަށް ދިން އިންޓަވިއުއެއްގައި ކުރީގެ ޕްލޭބޯއީ މޮޑެލް ބުނީ ޓްރަމްޕާ އެކު 10 މަސް ދުވަސް ވަންދެން ބޭއްވި ގުޅުމަށްޓަކައި މެލަނިއާގެ ކިބައިން މައާފަށް އެދޭނެ ކަމަށެވެ. މެކްޑޫގަލް ބުނީ ޓްރަމްޕާ އެކު ބޭއްވި ފުރަތަމަ ގުޅުމަށް ފަހު ޓްރަމްޕް ހުށަހެޅި ފައިސާއާ މެދު ދަރަވި ކަމަށާއި ގެއަށް ދިޔަ މަގުމަތީގައި ރޮވުނު ކަމަށެވެ.

ރައީސް ޓްރަމްޕާއި ވައިޓް ހައުސް އިން ވަނީ މެކްޑޫގަލްގެ ވާހަކަތައް ދޮގުކޮށްފަ އެވެ.

"އަހަރެން ފަހުން ވިސްނާލުމުން އެނގުނީ މި ކުރެވުނީ ގޯސް ކަމެއްކަން. އެކަމަށް އަހަރެން ވަރަށް ބޮޑަށް މައާފަށް އެދެން،" މެކްޑޫގަލް ބުންޏެވެ.

މެކްޑޫގަލް ވަނީ އޭނާގެ އެ ވާހަކަތައް ޓެބްލޮއިޑް ނޫހަކަށް ކިޔައިދިނުމަށް 2016 ވަނަ އަހަރު 150،000 ޑޮލަރުގެ އެއްބަސްވުމެއްގައި ސޮއިކޮށްފަ އެވެ. ނަމަވެސް އެ އާޓިކަލް ޝާއިއުކޮށްފައެއް ނުވެ އެވެ. މެކްޑޫގަލް މިހާރު ދަނީ ނޫހާ އެކު ހެދި އެއްބަސްވުން އުވާލަން މަސައްކަތް ކުރަމުންނެވެ.

ބަރަހަނާ ފިލްމުތައް ކުޅެން މަޝްހޫރު ސްޓޯމީ ޑެނިއަލްސް ވެސް ވަނީ ޓްރަމްޕާ އެކު 2006 ގައި ގުޅުންތަކެއް ބޭއްވި ކަމަށް ބުނެފަ އެވެ. އަދި އޭނާގެ ވާހަކަތައް އާއްމު ނުކުރާ މަތިން ޓްރަމްޕުގެ ވަކީލް ވަނީ 130،000 ޑޮލަރު ދީފައި ކަމަށް ވެސް ޑެނިއަލްސް ބުންޏެވެ.