4 ވެރިޔަކު ވަކިކުރީ އެޗްއޯޑީން މަދުކުރަން: އެމްޕީއެލް

މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ އިސް މަގާމުތަކުގައި ތިއްބެވި ހަތަރު ވެރިއަކު ވަޒީފާއިން ވަކިކުރީ އެ ކުންފުނީގެ ޑިޕާޓްމަންޓްތަކެއް އެއްކޮށްލައި ވެރިން މަދު ކުރުމަށް ކަމަށް އެ ކުންފުނިން މިއަދު ބުނެފި އެވެ.

ވަޒީފާއިން ވަކިކޮށްފައިވަނީ ގިނަ އަހަރުތަކެއް ވަންދެން އެ ކުންފުނީގައި މަސައްކަތް ކުރައްވައި އިސް މަގާމުތަކެއް ފުރުއްވާފައިވާ ބޭފުޅުންތަކެކެވެ. އޭގެ ތެރޭގައި ހިމެނެނީ، ޑިވިޝަން ހެޑް އިބްރާހިމް ރަޝީދާއި ޓާމިނަލް ވެހިކަލް ޔުނިޓުގެ ހެޑް މުހައްމަދު މަސީހުގެ އިތުރުން ކާގޯ ހެޑް އިބްރާހިމް ވަހީދާއި މާލޭ ނޯތު ހާބަރުގެ ހެޑް މުޖާހިދު އަނީސް އެވެ.

އެމްޕީއެލްގެ ޕީއާރު މެނޭޖާ އަހުމަދު ނަރީޝް ވިދާޅުވީ އެ ހަތަރު ބޭފުޅުން ހަވާލުވެ ތިއްބެވި ޑިޕާޓްމަންޓުތައް އެހެން ޑިޕާޓްމަންޓުތަކާ އެއްކޮށްލާފައިވާ ކަމަށެވެ. ވަކިކުރި ހަތަރު ބޭފުޅުންނަކީ އޭގެ ތެރެއިން ބާކީވި އެޗްއޯޑީން ކަމަށް އޭނާ ވިދާޅުވި އެވެ.

"އަޅުގަނޑުމެން އަލަށް ގެނައި ބަދަލުތަކާއެކު ބޭނުންވީ އެޗްއޯޑީން މަދު ކުރަން،" ނަރީޝް ވިދާޅުވި އެވެ.

އެހެން ޑިޕާޓްމަންޓަކުން މަގާމެއް ނުދީ ވަކިކުރީ ކީއްވެގެންތޯ ސުވާލު ކުރުމުން ނަރީޝް ވިދާޅުވީ މަގާމެއް ދޭނަމަ ދޭން ޖެހެނީ ހުރި މަގާމަށްވުރެ ދަށް މަގާމަކަށްވާތީ އެގޮތަށް ބަދަލުކުރަން ކުންފުނީގެ ވެރިން ބޭނުން ނުވީ ކަމަށެވެ.

ކުއްލިއަކަށް އެމްޕީއެލްގެ އިސް ހަތަރު ބޭފުޅަކު ވަޒީފާއިން ވަކިކޮށްފައިވާއިރު މިދިޔަ މަހު ވަނީ ސޯޝަލް މީޑިއާގައި ސަރުކާރަށް ފާޑުކީ އެ ކުންފުނީގެ މުވައްޒަފަކު ވެސް ވަޒީފާއިން ވަކިކޮށްފަ އެވެ.