ކުޑަރަށް ރިސޯޓް ލަންކާގެ ކުންފުންޏަށް 23 މިލިއަން ޑޮލަރަށް ވިއްކާލައިފި

ވިޔަފާރިވެރިޔާ އަބްދުﷲ ޖާބިރުގެ ޖޭ ހޮޓެލްސް އެންޑް ރިސޯޓްސްއިން އދ. އަތޮޅުގައި ހިންގި ކުޑަރަށް ރިސޯޓު ސްރީލަންކާގެ ކުންފުންޏަކަށް 23 މިލިއަން ޑޮލަރު (354.6 މިލިއަން ރުފިޔާ) އަށް ވިއްކާލައިފި އެވެ.

ލަންކާ ބިޒްނަސް އޮންލައިން ނޫޙުގައި ބުނެފައި ވަނީ އެ ރިސޯޓު ގަނެފައި ވަނީ އެ ގައުމުގެ މަޝްހޫރު ވިޔަފާރި ކުންފުންޏެއް ކަމަށްވާ ހޭލީސް ގްރޫޕުގެ ސަބްސިޑަރީ ކުންފުންޏެއް ކަމަށްވާ ލަގްޒަރީ ރިސޯޓް ޕްރައިވެޓް ލިމިޓެޑުން ކަމަށެވެ.

އެ ނޫހުގައި ބުނެފައި ވަނީ މަޝްހޫރު ޑައިވިން އޭރިއާއެއް ކަމަށްވާ ކުޑަރަށް ތިލަ ކައިރީގައި އޮންނަ 51 ވިލާގެ ރިސޯޓް އަލުން ހިންގާނީ އާމާޔާ ކުޑަރަށް ރިސޯޓް މޯލްޑިވްސްގެ ނަމުގައި ކަމަށެވެ. އަދި އެ ރިސޯޓް ހިންގާނީ "އަމާޔާ ލެޝާ" ކިޔާ ބަޔަކާ ހަވާލުކޮށްގެން ކަމަށް ވެސް ބިޒްނަސް އޮންލައިން ނޫހުގައި ބުނެފައިވެ އެވެ.

މާލެއިން ފުރައިގެން ވައިގެ މަގުން ވިއްސަކަށް މިނެޓުން ދެވޭ ހިސާބުގައި އޮންނަ ރިސޯޓް މަރާމާތުކުރުމަށްފަހު އަލުން ހުޅުވާފައި ވަނީ 2014 ވަނަ އަހަރު އެވެ.