ޔޮޓް ޓުއާސް އަތުން ބީނާފުށި އަތުލީ ރަނގަޅަށް: ހައި ކޯޓު

ޔޮޓް ޓުއާސް ކުންފުންޏަށް ދޫކުރި ހއ. ބީނާފުށި އާއި އެ ރަށް ކައިރީގައި އޮންނަ ކަނޑާލިފިނޮޅު ސަރުކާރުން އަތުލީ ރަނގަޅަށް ކަމަށް ހައި ކޯޓުން ވެސް ހުކުމްކޮށްފި އެވެ.

ރައްޔިތުންގެ މަޖިލީހުުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ޔޮޓް ޓުއާސް ކުންފުންޏަށް ރިސޯޓް ހެދުމަށްޓަކައި ބީނާފުށްޓާއި ކަނޑާލިފިނޮޅު 2013 ގައި ކުއްޔަށް ދިނުމަށް ފަހު 2016 ގައި ސަރުކާރުން އެއްބަސްވުން ބާތިލްކޮށް، އެތަން އަތުލީ ކުލި ނުދައްކާ ކަމަށް ބުނެ އެވެ. އެ މައްސަލަ ޔޮޓް ޓުއާޒް އިން ސިވިލް ކޯޓަށް ހުށަހެޅުމުން އެ ކޯޓުން ނިންމާފައި އޮތީ އެއްބަސްވުން ބާތިލްކުރީ ރަނގަޅަށް ކަމަށެވެ.

އެ މައްސަލަ ޔޮޓް ޓުއާސް އިން އިސްތިއުނާފް ކުރުމުން ހައި ކޯޓުން މިއަދު ކުރި ހުކުމުގައި ވަނީ ކުލި ނުދެއްކުނީ އެ ރަށުގެ ބިން ޓޫރިޒަމް މިނިސްޓްރީން ރަޖިސްޓްރީ ކުރުން ލަސްވެ އަދި އެ މުއްދަތަށް ޖޫރިމަނާ އަރާފައިވާތީ ކަމަށް ޔޮޓް ޓުއާސް އިން ބުންޏަސް، ސަރުކާރުން ފަހުން ޖޫރިމަނާ އަށް ލުއިތަކެއް ދީފައިވާ ކަމަށެވެ. އަދި ޖޫރިމަނާ އަށް ލުއި ދިން ފަހުން އެއްބަސްވުން ބާތިލް ކުރުމާ ހަމައަށް އެއްވެސް މިންވަރަކަށް ކުލި ދައްކާފައިނުވާ ކަމަށް އެ ހުކުމުގައިވެ އެވެ.

ހުކުމުގައި ވަނީ ޖޫރިމަނާއާ މެދު ޔޮޓް ޓުއާސްއިން ދެކޮޅު ހެދިޔަސް، ކުލި ދައްކަން ޖެހޭނެ ކަމާ މެދު އެ ކުންފުނިން ވެސް އިންކާރު ނުކުރާ ކަމަށެވެ. އަދި އެއްބަސްވުން އޮތްގޮތުން ކުލި ދެއްކުމުގެ ޒިންމާއިން އެ ކުންފުންޏަށް ބަރީއަ ނުވެވޭނެ ކަމަށާއި ކުލި ނުދައްކައިފި ނަމަ އެއްބަސްވުން ބާތިލް ކުރެވިދާނެ ކަމަށް އެއްބަސްވުމުގައި އޮންނަ ކަމަށް އެ ހުކުމުގައިވެ އެވެ.

ހައި ކޯޓުގެ ތިން ފަނޑިޔާރުންގެ އިއްތިފާގުން ކުރި ހުކުމުގައި ވަނީ ސިވިލް ކޯޓުގެ ހުކުމަށް ބަދަލު ގެންނަންޖެހޭ ސަބަބެއް ނެތް ކަމަށެވެ.

އެ މައްސަލަ ބެއްލެވީ ފަނޑިޔާރު ޝުއައިބު ހުސައިން ޒަކަރިއްޔާ އާއި ފަނޑިޔާރު ހުސައިން ޝަހީދު އަދި ފަނޑިޔާރު އަލީ ސަމީރެވެ. ރިޔާސަތު ބެލެހެއްޓެވީ ފަނޑިޔާރު ޝުއައިބެވެ.