އުމުރުން 96 އަހަރުގައި ހައި ސްކޫލަށް

ކިޔަވާކަށް ވަކި އުމުރެއް ނޯވެ އެވެ. ފުރުސަތެއް ތަނަވަސްވި އިރަކުން އެކަން ކުރަންވީ އެވެ. މެކްސިކޯގެ ފަގީރު ހިސާބަކަށް ނިސްބަތްވާ، އުމުރުން 96 އަހަރުގެ ގުއަޑްލޫޕް ޕަލާޝިއޯސް ނުވަތަ އާންމު ނަމުން ނަމަ ޑޯނާ ލުޕިޓާއަކީ ކުޑައިރު ކިޔެވުމުން މަހުރޫމުވި އަންހެނެކެވެ. އޭނާ ކުޑަ އިރު އުޅުނީ އާއިލާއާ އެކު ދަނޑުތަކުގައި ޒުވާރި ހައްދާށާއި ކުކުޅު ވިއްކާށެވެ.

އެކަމަކު ތަސައްރަފު ފުދި، ދެ ކައިވެންޏެއްކޮށް ހަ ދަރިން ލިބި މާމައަކަށްވުމަށް ފަހު ވެސް، ސްކޫލަށް ގޮސްގެން ކިޔަވަން ޑޯނާ ލުޕިޓާ ހިތުގައި އޮތް ޝައުގުވެރި ކަމަކަށް އެއްވެސް ބަދަލެއް ނާދެ އެވެ. އާއިލާގެ ފަރާތުން ލިބުނު އެހީތެރިކަމާ އެކު އޭނާ ކިޔަވަން އެންމެ ފުރަތަމަ ސްކޫލަށް ދާން ފެށީ 2015 ގަ އެވެ. ހަތަރު އަހަރު ތެރޭ އޭނާ ވަނީ މެދުމަދަރުސީ ތައުލީމު ފުރިހަމަކޮށްފަ އެވެ.

އެކަމަކު އެވަރަކުން އަދި ޑޯނާ ލުޕިޓާ ހުރީ ހުއްޓައިލާ ގޮތަކަށް ނޫނެވެ. މިދިޔަ ހޯމަ ދުވަހު އޭނާ ވަނީ މަތީ ތައުލީމް ހާސިލު ކުރަން މެކްސިކޯގެ ޓަކްސްލާ ގުޓެރޭޒްގެ ހައި ސްކޫލް ނަމްބާ 2 އަށް ކިޔަވަން ދާން ފަށައިފަ އެވެ.

މި ފުރުސަތާ އެކު ޑޯނާ ލުޕިޓާ ހުރީ އިންތިހާ އަށް އުފަލުންނެވެ. އޭނާ އޭއެފްޕީ އަށް ކިޔައިދިން ގޮތުގައި ބޭނުންވަނީ އުމުރުން 100 އަހަރުވުމުގެ ކުރިން ހައި ސްކޫލް މަރުހަލާ ނިންމާލައި، ނާސަރީ ޓީޗަރަކަށްވާށެވެ.

"އަހަރެން މިހުރީ ކިޔަވައިގެން އަހަރެންގެ ހުވަފެންތައް ހަގީގަތަކަށް ހަދަން ކުރެވުނުހާ މަސައްކަތެއް ކުރަން ތައްޔާރަށް،" ސްކޫލް ޔުނިފޯމްގައި ހުރެގެން ޑޯނާ ލުޕިޓާ ބުންޏެވެ. "އަހަރެން ވަރަށް ގަޔާވޭ ހިސާބާއި ކެމިސްޓްރީ އަށް."

އޭނާ އަދި މަޖަލަކަށް ހަދައިފައި އޭއެފްޕީ އަށް ބުނީ "މިހާރު އަހަންނަށް ކުރީގެ ހުރިހާ ލޯބިވެރިންނަށް ސިޓީ ވެސް ލިޔެވޭ" ކަމަށެވެ.

ބޯ ނުރަވެ، ދަތްތައް ވެރި، ހަންގަނޑު ރޫވެފައި އޮތަސް ޑޯނާ ލުޕިޓާ ބުނި ގޮތުގައި ކުލާހުގެ ހުރިހާ ކުދިން ވެސް އޭނާއާ ދޭތެރޭ ދެކެނީ އެ ކުދިންނާ އެއް އުމުރެއްގެ ދަރިވަރެއްގެ ގޮތުގަ އެވެ. އަދި ހުރިހާ ދަރިވަރުންނާ ވެސް ގުޅުން ވަރަށް ރަނގަޅު ކަމަށް ބުންޏެވެ.

"އަހަރެން ގަބޫލުކުރަން އަހަންނަކީ އެ ކުދިންގެ މާމަ ނޫނީ މުނިމާމަ އުމުރުގެ މީހެއް ކަމަށް. އެކަމަކު ކުލާސްތެރޭގައި އެ ތަފާތު ކަމެއް ނެތް. ފުރަތަމަ ދުވަހު ކުލާހުގެ ކުދިން އަހަންނަށް ވަރަށް ހެޔޮ،" ޑޯނާ ލުޕިޓާ ބުންޏެވެ. "އަހަރެންގެ ހުރިހާ ވެސް ހުވަފެނަކީ ކިޔަވައިގެން މޮޅު މީހަކަށްވުން."