ތަޖުރިބާ ހޯދައިދީގެން ޓީމު ރަނގަޅުކުރެވޭނެ: ކޯޗު

ސެންޓްރަލް ޒޯން ސީނިއާ މެންސް ވޮލީބޯޅަ މުބާރާތުގައި ވާދަކުރި ރާއްޖޭގެ ގައުމީ ވޮލީޓީމުގައި ނިސްބަތުން މި ފަދަ މުބާރާތަކަށް އާ ކުޅުންތެރިންނަށް ކުޅުމުގެ ފުރުސަތު ދިން ކަމަށާއި ކުރިއަށް އޮތް ތަނުގައި މި ކުޅުންތެރިންނަށް އިތުރު ތަޖުރިބާތަކެއް ހޯދައިދީގެން ޓީމު ރަނގަޅު ކުރެވޭނެ ކަމަށް ގައުމީ ވޮލީބޯޅަ ޓީމުގެ ކޯޗު މުހައްމަދު ސާޖިދު (ކާއްޓޭ) ބުނެފި އެވެ.

ރާއްޖެ މުބާރާތުން ކެޓީ ގްރޫޕް ސްޓޭޖުގައި ކުޅުނު ދެ މެޗުން ވެސް ސީދާ ތިން ސެޓުން ބަލިވެގެންނެވެ. ކާއްޓޭ ބުނީ ފުރަތަމަ މެޗުގައި ނޭޕާލާ ދެކޮޅަށް ދެއްކި ކުޅުމަށް ވުރެން މުބާރާތް ބާއްވާ ބަންގްލަދޭޝްއާ ދެކޮޅަށް ރަނގަޅު ކުޅުމެއް ދެއްކި ކަމަށެވެ.

"ނޭޕާލް މެޗަށް ވުރެ ބަންގްލަދޭޝް މެޗުގައި ކުޅުން ރަނގަޅު. ފުރަތަމަ ދެ ސެޓުގައި ތަންކޮޅެއް ދަށްކޮށް ގޮސްފައި ފަހު ސެޓުގައި ހަތަރު ޕޮއިންޓުގެ ލީޑެއްގައި ވެސް އޮތް ސެޓު ނިންމަން ވެސް ލިބުނު. އެކަމަކު މި މެޗުގައި ވެސް ފެންނަނީ އެޓޭކްގައި ޕަވާ ދަށްކޮށް،" ކާއްޓޭ ބުންޏެވެ.

މުބާރާތުގައި ފަށަން އެއް ދުވަހަށް ވެފައި އޮއްވައި ބަންގްލަދޭޝް އަށް ރާއްޖެ ދިޔައީ ތައިލެންޑުގައި ޓްރެއިނިން ކޭމްޕެއް ފުރިހަމަ ކުރުމަށް ފަހު އެވެ. ކާއްޓޭ ބުނީ ކުޅުންތެރިންގެ ކުޅުމަށް އެކި ގޮތްގޮތުން އަސަރުކޮށްފައި ހުރުމުގެ ފުރުސަތު އެބައޮތް ކަމަށެވެ.

މި މުބާރާތުގައި ރާއްޖޭން ކުޅެނީ ދާދި ފަހުން ޓީމުން ރިޓަޔަކުރި އިޝާން މުހައްމަދު (ބަޓިސް)ގެ އިތުރުން މި ފަހަރު ސްކޮޑުގައި އަމިއްލަ ސަބަބެއްގެ ސަބަބުން ބާކީވި އިސްމާއިލް ސާޖިދު (ކުޑަކާއްޓޭ) ނުލަ އެވެ. އޭގެ އިތުރުން މި ފަހަރު ޓީމުން ޖާގަ ނުލިބުނު ކުޅުންތެރިންގެ ތެރޭގައި އިސްމާއިލް ސާޖިދު (ކުޑަކާއްޓޭ) އާއި އަހުމަދު އަހުސަން އަދި މުހައްމަދު ޝާއިން އަދި އަޝްފާގު އާދަމް (އައްކަޅޭ) ހިމެނެ އެވެ. މި ކުޅުންތެރިންނަކީ މީގެ ކުރިން މުބާރާތްތަކުގައި ޓީމަށް ގިނަ ވަގުތު ކުޅުނު ކުޅުންތެރިންނެވެ.

މި ފަހަރުގެ ޓީމުގައި މުޅިން އަލަށް ޓީމުގައި ހިމެނުނު ކުޅުންތެރިން ވެސް އެބަތިއްބެވެ. އޭގެ ތެރެއިން ގިނަ ކުޅުންތެރިންނަށް ކުޅުމުގެ ފުރުސަތު ބޮޑަށް ލިބުނީ މި ފަހަރު އެވެ. ޓީމުގެ ސެޓަރަކަށް ކުޅުނު ހުސެއިން ވިޝާމް (ބުޅިކެ) އާއި އާދަމް ފައިރޫޒް އަދި އާދަމް ނަސީމް (އެޑަމް) އަކީ މީގެ ކުރިން ޓީމުގައި ހިމެނުނު ނަމަވެސް ކުޅުމުގެ ފުރުސަތު އެހާ ގިނައިން ލިބުނު ކުޅުންތެރިންނެއް ނޫނެވެ.

"އާ ކުޅުންތެރިން ވެސް ތަންކޮޅެއް ގިނަކޮށް ތިބީމައާ އެއްކޮށް، އެޑަމް މެން ކަހަލަ. ދެން ނިލާމް މެން ވެސް މި ކަހަލަ މެޗެއް އަދި ފުލްކޮށް އަލަށް މި ކުޅުނީ. ސެޓަރު (ބުޅިކެ) ވެސް މުޅިން އަލަށް މުބާރާތެއްގައި ފުލްކޮށް އެ ކުޅުނީ. އެ ކަހަލަ ކަންތައްތައް ދަށްކޮށް ހުރީމައާ އެކު ކަންނޭނގެ އެހާ ދަށްކޮށް އެ ދިޔައީ،" ކާއްޓޭ ބުންޏެވެ. "ގިނަ މެޗުތަކެއް މި ކަހަލަ މުބާރާތްތަކުގައި ލިބެމުންދިޔަ ވަރަކަށް ރަނގަޅުކުރެވޭނީ."

ބަންގްލަދޭޝްގައި 2016 ވަނަ އަހަރު އޮތް ސެންޓްރަލް ޒޯން މުބާރާތުގެ ތިން ވަނަ ރާއްޖެ އަށް ލިބުނުއިރު، އޭގެ ފަހުން ކުޅުނު ދެ މުބާރާތް ވެސް ރާއްޖޭން ނިންމާލަން ޖެހުނީ މޮޅެއް ނުލިބި އެވެ. އެއީ މާޗް މަހު މާލޭގައި އޮތް މުބާރާތާއި މި ފަހަރުގެ މުބާރާތެވެ.