ޔުނައިޓެޑް ވިކްޓަރީ ބަލިކޮށް ނިއު ހަތަރު ވަނަ އަށް

އުރީދޫ ދިވެހި ޕްރިމިއާ ލީގުގައި މިރޭ ޔުނައިޓެޑް ވިކްޓަރީ 3-0 އިން ބަލިކޮށް ނިއު ރޭޑިއަންޓް ލީގުގެ ހަތަރު ވަނަ އަށް ޖެހިލައިފި އެވެ.

މިރޭގެ މެޗަށް ފަހު މިނިވަން ދުވަހުގެ ހަރަކާތްތަކަށް ލީގު މެދުކަނޑާލާފައިވާއިރު، މާޒިޔާ ލީގުގެ އެއް ވަނައިގައި އޮތީ ނުވަ މެޗުން 20 ޕޮއިންޓާ އެކު އެވެ. ދެ ވަަނައިގައި 17 ޕޮއިންޓާ އެކު އީގަލްސް އޮތްއިރު، ތިން ވަނައިގައި ޓީސީ އޮތީ 14 ޕޮއިންޓް ހޯދައިގެންނެވެ.

ނިއު ހަތަރު ވަނަ އަށް އެރީ ފަސް ވަނައިގައި އޮތް ޔުނައިޓެޑް ވިކްޓަރީއާ އެއްވަރަށް 13 ޕޮއިންޓް ލިބިފައިވީ ނަމަވެސް ފައިދާ ލަނޑުން ކުރި ލިބޭތީ އެވެ. ހަ ވަނައިގައި އޮތީ ވެލެންސިއާ އެވެ. އެ ޓީމަށް ލިބިފައިވަނީ 12 ޕޮއިންޓެވެ. ހަތް ވަނައިގައި ހަތަރު ޕޮއިންޓާ އެކު ވިކްޓަރީ އޮތްއިރު، އެންމެ ފުލުގައި އޮތް ބީޖީ އަށް ލިބިފައިވަނީ ތިން ޕޮއިންޓެވެ.

މިރޭގެ މެޗު ފެށިގެން ދެ ވަނަ މިނިޓްގައި ނިއު އޭރިއާ ބޭރުން ލިބުނު ހިލޭ ޖެހުމަކުން ޔުނައިޓެޑް ވިކްޓަރީގެ ކެޕްޓަން ހުސެއިން ޝިމާޒް (ކޮކީ) ފޮނުވާލި ބޯޅަ އަމާޒުވީ ނިއުގެ ކީޕަރު އަބޫ ސުލައިމާން އަތަށެވެ.

ނިއު އިން ލީޑު ނެގީ މެޗުގެ 15 ވަނަ މިނިޓްގައި އިއްޒަތު އަބްދުލް ބާރީ ޖެހި ލަނޑަކުންނެވެ. ކައުންޓަ އެޓޭކެއްގައި އަހުމަދު ނިޔާޒް (ނިޔާ) ނަގައިދިން ހުރަހަކުން އިއްޒަތު ބައިސިކަލް ކިކަކުން ފޮނުވާލި ބޯޅަ އަމާޒުވީ ގޯލުގެ ދުރު ކަނަށެވެ. މިއީ މި ފަހަރު ލީގުގައި ފެނުނު އެންމެ ރީތި އެއް ލަނޑެވެ.

މެޗުގެ 27 ވަނަ މިނިޓްގައި ނަތީޖާ ހަމަހަމަ ކުރަން ޔުނައިޓެޑް ވިކްޓަރީ އަށް ރަނގަޅު ފުރުސަތެއް ލިބުނެވެ. އެ ޓީމުގެ މޫސާ ހަސަން ނިއުގެ އަހުމަދު ނުހާދު ކައިިރިން ނައްޓާލުމަށް ފަހު ހުސްކޮށް އޭރިއާ ތެރެއަށް ވަދެ އެ ޓީމުގެ ކޮކީ އަށް ދިން ބޯޅަ ބާރުވުމުގެ ސަބަބުން އޭނާ އަށް ލިބޭ ގޮތެއްނުވި އެވެ.

ނިއު އިން ދެ ވަނަ ލަނޑު ޖެހީ މެޗުގެ 44 ވަނަ މިނިޓްގަ އެވެ. ޔުނައިޓެޑް ވިކްޓަރީގެ ފަހަތުން ހެދުނު ގޯހެއްގެ ފައިދާ ނަގައި މި ލަނޑު ޖެހީ ހަމްޒާ މުހައްމަދު (ހަމްޕު) އެވެ. ދެ ޑިފެންޑަރުން ކައިރިން ނައްޓާލުމަށް ފަހު ހަމްޕު ފޮނުވާލި ބޯޅަ އަމާޒުވީ ގޯލުގެ ތިރީ ކަނަށެވެ.

ޔުނައިޓެޑް ވިކްޓަރީގެ ސީރިއާގެ ފޯވާޑް ކެރިކް އަންދްރެޖް މިރޭގެ މެޗުގައި ނެތުމުން އެޓީމުގެ ފޯވާޑް ލައިން ފެނުނީ އާދައިގެ ގޮތަކަށެވެ.

ދެ ވަނަ ހާފް ފެށިގެން ނިއު ތިން ވަނަ ލަނޑެއް ޖެހުމާ ގާތަށް ޖެހިލި އެވެ. އޭރިއާ ތެރެއިން އަހުމަދު ސުހެއިލް (ބަމްޕުޗު) ފޮނުވާލި ބޯޅަ ޔުނައިޓެޑް ވިކްޓަރީ ކީޕަރު މުހައްމަދު އަލް ޔޫސުފް ވަނީ މަތަކޮށްފަ އެވެ.

ނިއުގެ ތިން ވަނަ ލަނޑު ކާމިޔާބުކުރީ ނިޔާ އެވެ. މެޗުގެ 60 ވަނަ މިނިޓްގައި ނިޔާ މި ލަނޑު ޖެހީ ޔުނައިޓެޑް ވިކްޓަރީ އޭރިއާ ތެރެއިން އެ ޓީމުގެ ޑިފެންޑަރެއް ކައިިރިން ނައްޓާލުމަށް ފަހު އެވެ.

ޔުނައިޓެޑް ވިކްޓަރީން މެޗުގެ ފަހު 20 މިނިޓް ތެރޭގައި ލަނޑެއް ޖެހުމަށް ގިނަ މަސައްކަތްތަކެއް ކުރި ނަމަވެސް ކާމިޔާބު ވާގޮތެއްނުވި އެވެ. އެ ޓީމުގެ ކޮކީ އާއި އިބްރާހިމް ޝަފްރާޒް ފޮނުވާލި ހަމަލާތަށް ހުރަސް ދަނޑިމަތިން ދިޔައިރު، ނާވީ މުހައްމަދު ބޮލުން ފޮނުވާލި ބޯޅަ ނިއުގެ ކީޕަރު އަބޫ ސުލައިމާން ވަނީ މަތަކޮށްފަ އެވެ.

އެއް ހަފްތާގެ މެދުކެނޑުމަކަށް ފަހު ލީގު އަލުން ދެން ފަށާނީ މި މަހު 29 ވަނަ ދުވަހު މާޒިޔާ އާއި ވިކްޓަރީ ބައްދަލުކުރާ މެޗުންނެވެ.

ނިއު އިން ޓްރާންސްފާގައި ކޮސޯވޯ ފޯވާޑެއް ގެނެސްފައިވީ ނަމަވެސް، އޭނާގެ ނަން ޓީމު ލިސްޓުގައި އަދި ނުޖަހާތީ މިރޭ ނުކުޅެ އެވެ. އޭނާއާ އެކު ނިއުގައި މި ވަގުތު އޭޝިއާ އިން ބޭރުގެ ބިދޭސީ ހަތަރު ކުޅުންތެރިން ތިބިއިރު ލިސްޓުގައި ޖެހޭނީ އޭޝިއާ އިން ބޭރުގެ ތިން ކުޅުންތެރިން އަދި އޭޝިއާގެ އެއް ކުޅުންތެރިއެއްގެ ނަމެވެ.