ގެނެސްދީފައިވާ ނުފެންނަ ތަރައްގީ މާ އިތުރު: ޕީޕީއެމް

މިސަރުކާރުން ގެނެސްދީފައި ވަނީ ހަމައެކަނި އުމުރާނީ ތަރައްގީ ނޫން ކަމަށާއި ގެނެސްދީފައިވާ ނުފެންނަ ތަރައްގީ މާ އިތުރު ކަމަށް، ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ މިއަދު ވިދާޅުވެއްޖެ އެވެ.

ޕީޕީއެމުން މިއަދު ބޭއްވި ނޫސްވެރިންގެ ބައްދަލުވުމެއްގައި އަބްދުއްރަހީމު ވިދާޅުވީ ހުޅުލެ އާއި މާލެއާ ދޭތެރޭ އަޅާ ބްރިޖާއި 25 ބުރީގެ ދަރުމަވަންތަ ހޮސްޕިޓަލުގެ އިތުރުން މި ސަރުކާރުން ބޮޑެތި ތަރައްގީތަކެއް ގެނެސްފައިވާ ކަމަށެވެ. އޭގެ ތެރޭގައި ނުފެންނަ ތަރައްގީ ހިމެނޭކަމަށް ވިދާޅުވެ އަބްދުއްރަހީމް މިސާލަކަށް ދެއްކެވީ އަމާންކަމެވެ.

"މާލޭގެ މަގުމައްޗަށް ތިބޭފުޅުން ބައްލަވާލަށްވާ، އަޅުގަނޑުމެންގެ ރައީސުލްޖުމްހޫރިއްޔާ ވެރިކަމާ ހަވާލުވެވަޑައިގެންނެވި އިރު މާލޭގެ މަގުތަކަކީ އެކަނި މީހުން ހިނގާ ބިނގާވެ އުޅެން ބިރުވެރި ތަނަކަށްވެފައި އޮތީ،" އަބްދުއްރަހީމް ވިދާޅުވި އެވެ.

"ގައުމަށް ހަމަޖެހުން އައުމަށް ވުރެ ވަކިން ބޮޑު ތަރައްގީއެއް ހިޔެއްނުވެ އޮންނާނެ ހެނެއް. އަޅުގަނޑުމެން ކޮންމެ ރައްޔިތަކު ވެސް ބޭނުންވާނެ ހަމަޖެހިގެން ނޭވާލާން. އެ ފުރުސަތު ރައީސް ޔާމީންގެ ވެރިކަމުގައި އަޅުގަނޑުމެންނަށް ލިބިގެން ހިނގައްޖެ،"

އޭނާ ވިދާޅުވީ އެމްޑީޕީގެ ވެރިކަމުގައި އިދިކޮޅު ސިޔާސީ ބޭފުޅުންނަށް ބޮޑީގާޑުންނާއެކު ނޫނީ މަގުތަކަށް ނުކުމެ އުޅެން ދަތިވި ކަމަށެވެ.

ރައްޔިތުން ތަރައްގީ ބަލައިގެންފައިވާ ކަމަށް ވިދާޅުވަމުން އަބްދުއްރަހީމް ވިދާޅުވީ މޭ ޑޭގައި އިދިކޮޅު ފަރާތްތަކުން ކުރަން އުޅުނު މުޒާހަރާގައި ބައިވެރިވާނެ ބަޔަކު ނުވި ކަމަށެވެ. މަގުތައް ހަލަބޮލިކުރަން މަސައްކަތްތެރިން ބޭނުން ނުވާ ކަމަށް ވެސް އޭނާ ވިދާޅުވި އެވެ.

އަބްދުއްރަހީމް އެހެން ވިދާޅުވި ނަމަވެސް، މި އަހަރުގެ މޭޑޭ ގައި މުޒާހަރާއެއް ބާއްވާނެ ކަމަށް އިދިކޮޅު ފަރާތްތަކުން އިއުލާނެއް ނުކުރެ އެވެ.