ނަސް ރާއްޖޭގައި؛ ވީޑިއޯގައި ބަައިވެރިވުމުގެ ފުރުސަތު އެބައޮތް

ދުނިޔޭގެ އެކި ގައުމުތަކަށް ދަތުރުކޮށް، ތަފާތު މީހުންނާއި ކަންކަމާ ގުޅޭގޮތުން އެއް މިނިޓްގެ ވީޑިއޯ ހަދައި ގިނަ ބައެއްގެ ސަމާލުކަން ހޯދާފައިވާ ނުސައިރު ޔާސިން (ނަސް) ރާއްޖެ އަތުވެއްޖެ އެވެ.

އިއްޔެ މެންދުރު ފަހު ނަސް ރާއްޖެ އައީ އާދައިގެމަތިން އެއް މިނިޓްގެ ވީޑިއޯއެއް ހަދާށެވެ. މި ވީޑިއޯގައި ބައިވެރިވުމުގެ ފުރުސަތު އޭނާ ވަނީ ހުރިހާ ދިވެހިންނަށް ވެސް ހުޅުވާލައިފަ އެވެ.

"ނަސް ޑެއިލީ"ގެ ނަމުގައި ފޭސްބުކްގައި ކޮންމެ ދުވަހަކު ވެސް އެއް މިނިޓްގެ ވީޑިއޯ އާންމުކުރާ ނަސް، އޭނާގެ އޮފިޝަލް ޕޭޖުގައި ބުނިގޮތުގައި އޭނާ ރާއްޖޭގައި ހޭދަކުރާނީ ގިނަ ވެގެން ހަ ދުވަހު އެވެ. އެއީ މާލޭގައި ދެ ދުވަސް އަދި ރިސޯޓެއްގައި ހަތަރު ދުވަހެވެ.

ވީޑިއޯގައި ބައިވެރިވާ މީހުންނާ އޭނާ ބައްދަލު ކުރުމަށް ހަމަޖެހިފައިވަނީ އަންނަ ހުކުރު ދުވަހު އެވެ. އެހެންވެ، ވީހާ ވެސް ގިނަ ބަޔަކު، ހުކުރު ދުވަހު ހަވީރު 3:00 އިން 4:30 އަށް ޖުމްހޫރީ މައިދާނަށް ދިޔުމަށް އޭނާ އެދެ އެވެ.

ވީޑިއޯ ހެދުމަށް ނަސް ރާއްޖެ އައިކަން އިއުލާން ކުރުމާއެކު ރާއްޖޭގައި ތިބި އޭނާގެ ގިނަ ސަޕޯޓަރުން އަންނަނީ އުފާފާޅުކޮށް، އެކަމުގައި ބައިވެރިވާން ބޭނުންކަމުގެ ޝައުގުވެރިކަން ފާޅުކުރަމުންނެވެ.

ފަލަސްތީނަށް އުފަން އުމުރުން 25 އަހަރު ނަސް ވީޑިއޯ ހަދަން ފެށީ، ދުނިޔޭގެ ގައުމުތަކަށް ދަތުރުކުރުމަށް އޭނާ އަދާކުރަމުން ދިޔަ ސޮފްޓްވެއާ އިންޖިނިއޭރު ކަމުގެ ވަޒީފާ ދޫކޮށްލައިފަ އެވެ. ވަރަށް އާދައިގެ ގޮތަކަށް، ހަމައެކަނި އާއިލާގެ މީހުން ބައިވެރިކޮށްގެން އޭނާ ކުރަން ފެށި އެ މަސައްކަތް ފުޅާވެ، މިހާރު އޭނާ އަންނަނީ އެކި ގައުމުތަކަށް ދަތުރުކޮށް، އެ ގައުމުތަކުގައި ހުރި އާދަޔާހިލާފު ވާހަކަތައް ގެނެސްދެމުންނެވެ.

ކޮންމެ ދުވަހަކު ވެސް، އެއް ޓީޝާޓެއް ލައިގެން އޭނާ ހަދާ މި ވީޑިއޯތަކަށް 100 މިލިޔަނަށް ވުރެ ގިނަ ވިއުސް ލިބެ އެވެ. ފޭސްބުކްގައި ވެސް ހަ މިލިޔަނަށް ވުރެ ގިނަ މީހުން އޭނާ ފޮލޯ ކުރެ އެވެ.

އެމެރިކާގެ ނިއުޔޯކުގައި ދިރިއުޅެމުން އަންނަ ނަސްއަށް، އޭނާގެ ވީޑިއޯތަކުން ބޮޑު އާމްދަނީއެއް ލިބެ އެވެ. އަދި އޭނާ ގެނެސްދޭ ވާހަކަތައް ޝައުގުވެރިކަމުން ދުނިޔޭގެ ގިނަ ބައެއްގެ ލޯތްބާއި ތައުރީފް އޭނާއަށް އަންނަނީ ލިބެމުުންނެވެ.