ރައީސް ޔާމީންގެ ކެމްޕެއިން އޮފީހުން ރޯދަ މަހު ރަށްރަށަށް

ރައީސް އަބްދުﷲ ޔާމީންގެ ކެމްޕެއިން އޮފީހުގެ ފަރާތުން މި ރޯދަ މަހުގެ ތެރޭގައި ރާއްޖޭ ފަސް އަތޮޅެއްގެ ރަށްތަކަށް ޒިޔާރަތްކޮށް ރައްޔިތުންގެ ހާލު ބެލުމަށް ނިންމައިފި އެވެ.

ވެސްޓް ޕާކް ރެސްޓޯރަންޓް ހިންގި ބިމުގައި ހަދާފައިވާ، ރައީސް ޔާމީންގެ ކެމްޕެއިން އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި، އެ ކެމްޕެއިންގައި އިސްކޮށް ހަރަކާތްތެރިވެވަޑައިގަންނަވާ، މިފްކޯގެ މެނޭޖިން ޑިރެކްޓަރު އަދްލީ އިސްމާއިލް ވިދާޅުވީ ށ. އަތޮޅާއި ބ. އަތޮޅާއި ރ. އަތޮޅާއި ވ. އަދި އދ. ގެ ބައެއް ރަށްރަށަށް ޓީމުތައް ދަތުރު ކުރާނެ ކަމަށެވެ.

މި ދަތުރުތަކުގައި، މިނިސްޓަރުންނާއި ރައްޔިތުންގެ މަޖިލީހުގެ ޕީޕީއެމް ކޯލިޝަންގެ ގިނަ އަދަދެއްގެ މެމްބަރުންނާއި ރައީސް ޔާމީންގެ ކެމްޕެއިން އޮފީހުގައި މަސައްކަތް ކުރާ ވަރަށް ގިނަ މީހުން ބައިވެރިވާނެ ކަމަށް އޭނާ ވިދާޅުވި އެވެ.

"މި ދަތުރުގެ އެންމެ ބޮޑު އެންމެ ބޮޑު އަމާޒަކީ އަތޮޅު ތެރެއަށް ގޮސް، ކެމްޕެއިން ހަރަކާތްތައް ހިންގައި ރައްޔިތުންގެ ހާލު ކައިރިން ބެލުން،" އަދްލީ ވިދާޅުވި އެވެ.

ރައީސް ޔާމީންގެ ކެމްޕެއިން އޮފީހުން ބުނި ގޮތުގައި ރަށްރަށަށް ދަތުރު ކުރާނީ އަންނަ ބުދަ ދުވަހުން ފެށިގެންނެވެ.

އިކޮނޮމިކް މިނިސްޓަރު މުހައްމަދު ސައީދު ވިދާޅުވީ ރައީސް ޔާމީންގެ ވެރިކަމަށް ހަތަރު އަހަރާއި ހައެއްކަ މަސްވިއިރު، ރާއްޖެ އަށް އެކި ދާއިރާތަކުން ކުރިއެރުންތައް އައިސްފައިވާ ކަމަށެވެ. އަދި ރޯދަ މަހު ދަތުރުތައް ކުރަނީ ރައްޔިތުންނާ ވީހާވެސް ގާތުގައި ވުމުގެ ބޭނުމުގައި ކަމަށް އޭނާ ވިދާޅުވި އެވެ.

"ވަރަށް ފޯރިގަދަ ދަތުރަކަށް ވާނެ ކަމަށް އަޅުގަނޑުމެން ގަބޫލު ކުރަނީ،" ސައީދު ވިދާޅުވި އެވެ.

ރައްޔިތުންގެ މަޖިލީހުގެ ނައިބު ރައީސް، ހުޅުހެންވޭރު ދާއިރާގެ މެމްބަރު ރީކޯ މޫސާ މަނިކު ވިދާޅުވީ މިދިޔަ އޮގަސްޓް މަހުން ފެށިގެން ރައީސް ޔާމީންގެ ކެމްޕެއިންގެ މަސައްކަތްތައް ކުރިއަށް ގެންދާއިރު، މިހާތަނަށް ބޮޑެތި ހަރަކާތްތަކެއް އެކިއެކި ރަށްރަށުގައި ކުރިއަށް ގެންގޮސްފައިވާ ކަމަށެވެ.

މީގެ އިތުރުން، ވޮލަންޓިއަރުންގެ ގޮތުގައި މަސައްކަތް ކުރާ މީހުންގެ އަދަދު 80،000-90،000 އަށް އަރާފައިވާ ކަމަށާއި ވޯޓުގެ ކުރިން ވީހާ ވެސް ގިނަ ވޮލަންޓިއަރުން ހޯދަމުން އަންނަ ކަމަށް މޫސަ ވިދާޅުވި އެވެ. ވޮލަންޓިއަރުން ގިނަވީ ވީހާވެސް ގާތުން މަސައްކަތް ކުރުމުން ކަމަށް އޭނާ ވިދާޅުވި އެވެ.