ރާއްޖެ-ސެންޓްރަލް އެފްރިކަން ރިޕަބްލިކުން ގުޅުން ގާއިމްކޮށްފި

ރާއްޖެ އާއި ސެންޓްރަލް އެފްރިކަން ރިޕަބްލިކްއާ ދެމެދު އިއްޔެ ސިޔާސީ ގުޅުން ގާއިމުކޮށްފި އެވެ.

ފޮރިން މިނިސްޓްރީގެ ވެބްސައިޓްގައި ބުނެފައިވާ ގޮތުގައި ރާއްޖެ އާއި ސެންޓްރަލް އެފްރިކަން ރިޕަބްލިކާ ދެމެދު ގުޅުން ގާއިމުކުރުމުގެ އެއްބަސްވުމުގައި ދެ ގައުމުން ސޮއި ކުރީ އިއްޔެ އެވެ. މި އެއްބަސްވުމުގައި ދިވެހިރާއްޖޭގެ ފަރާތުން ސޮއި ކުރެއްވީ، ރާއްޖެ އިން އދ. އަށް ކަނޑައަޅާފައި ހުންނަވާ ދާއިމީ މަންދޫބު ޑރ. އަލީ ނަސީރެވެ. ސެންޓްރަލް އެފްރިކަން ރިޕަބްލިކްގެ ފަރާތުން ސޮއި ކުރެއްވީ އެ ގައުމުން އދ. އަށް ކަނޑައަޅާފައި ހުންނަވާ ދާއިމީ މަންދޫބު އެމްބްރޮއިސީން ކްޕޮންގޯ އެވެ.

ދެ ގައުމުގެ ދެމެދުގައި ސިޔާސީ ގުޅުން ގާއިމުކުރުމުގެ އެއްބަސްވުމުގައި ސޮއި ކުރުމުގެ ރަސްމިއްޔާތު އޮތީ، އދ. ގައި ހުންނަ، ރާއްޖޭގެ ދާއިމީ މިޝަންގަ އެވެ.

ސެންޓްރަލް އެފްރިކަން ރިޕަބްލިކާ އެކު ސިޔާސީ ގުޅުން ގާއިމް ކުރުމުން، ރާއްޖެ އިން މިހާތަނަށް ސިޔާސީ ގުޅުން ގާއިމުކޮށްފައިވާ ގައުމުތަކުގެ އަދަދު 169 އަށް އެރީ އެވެ. ސެންޓްރަލް އެފްރިކަން ރިޕަބްލިކަކީ އެފްރިކާ ބައްރުގެ މެދުތެރޭގައި އޮންނަ ގައުމުތަކުގެ ތެރެއިން އެންމެ ބޮޑު އެއް ގައުމެވެ. އެ ގައުމުގެ އާބާދީއަކީ ގާތްގަނޑަކަށް 4.6 މިލިއަނެވެ.

މެދުތެރޭ އެފްރިކާގެ މުހިންމު ގައުމަކާ އެކު ރާއްޖޭން ސިޔާސީ ގުޅުން ގާއިމުކުރި އިރު، ރާއްޖޭން މިހާރު އަންނަނީ އދ.ގެ ސަލާމަތީ މަޖިލީހުގެ އަންނަ ދައުރުގެ ގޮނޑިއެއް ހޯދުމަށް ކެމްޕޭން ކުރަމުންނެވެ. ސަލާމަތީ މަޖިލީހުން ހުސްވާ ބައެއް ގޮނޑިތަކަށް މެމްބަރުން އިންތިހާބު ކުރުމަށް، އދ.ގެ އާންމު މަޖިލީހުގައި ވޯޓު ލުން މިއަހަރުގެ ފަހުކޮޅު އޮންނާނެ އެވެ.