ރައީސްއާ އީދު ސަލާމް ކުރަން ގިނަ އަދަދެއްގެ ބަޔަކު ހިނގައްޖެ

ރައީސް އަބްދުﷲ ޔާމީންގެ ދެކަނބަލުންނާއި އީދު ސަލާމްކުރަން މިއަދު ގިނަ އަދަދެއްގެ ބަޔަކު މިއަދު ރަސްރަނި ބަގީޗާއަށް ޖަމާވެއްޖެ އެވެ.

މިއަދު 9:00 ޖެހުމާ އެކު ރައީސްގެ ދެކަނބަލުން އީދު ސަލާމް ކުރައްވަން ފެއްޓުމާ އެކު ހެދި ކިޔޫ ހުކުރު މިސްކިތަށް ވުރެ ދުރަށް ދެމިގެންދިޔަ އެވެ. ކުރިން އޮތީ ސަލާންކުރެއްވުން ގަޑިއެއްހާ އިރަށް ކުރިއަށް ގެންދާ ގޮތަށެވެ. އެކަމަކު މީހުންގެ އަދަދު ގިނަވުމުން ރައީސް ޔާމީންގެ ދެކަނބަލުން އެ ތަނުގައި ދެ ގަޑިއިރަށް ވުރެ ގިނަ ވަގުތު ހޭދަކުރެއްވި އެވެ.

ރައީސް ޔާމީންގެ ރިޔާސީ ފުރަތަމަ ދައުރުގެ ފަހު ފިތުރު އީދު ސަލާމްކުރެއްވުމުގައި ކުރިއެކޭ އެގޮތަށް ކުޑަކުދިންގެ އިތުރުން އެކި އުމުރުގެ މީހުން ބައިވެރިވި އެވެ. އޭގެ ތެރެއިން ބައެއް މީހުން ވަނީ ރައީސާ އެކު ސެލްފީ ވެސް ނަގައިފަ އެވެ.

އާންމުންގެ އިތުރުން ބޭރުގެ ސަފީރުންނާއި އިއްޒަތްތެރިން ވެސް އީދު ސަލާމުގައި ބައިވެރިވެވަޑައިގަތެވެ. އޭގެ ތެރޭގައި ރާއްޖޭގައި ހުންނަވާ އިންޑިއާ ސަފީރު އަކިލޭޝް މިޝްރާ ވެސް ހިމެނެ އެވެ.

ސަލާމް ކުރުން އިންތިޒާމްކޮށްފައި އޮތީ ތަފާތު ބުއިންތަކާއި ހަދިޔާ ވެސް ލިބޭ ގޮތަށެވެ.

ރައީސް ޔާމީން މިއަދު ފޮނުއްވި އީދު ތަހުނިޔާގެ މެސެޖްގައި ވިދާޅުވެފައި ވަނީ މުސްލިމުން އެކަކު އަނެކަކާ ބައްދަލުވެ ހެޔޮއެދުމުގެ ޝުޢޫރުތައް ފާޅުކުރުމަކީ، އިސްލާމީ ރިވެތި އަހުލާގުގެ މަތިވެރި ނަމޫނާއެއް ކަމަށެވެ.

ފިތުރު އީދުގެ އުފާ ފާޅުކުރަމުން ދާއިރު، ދުނިޔޭގެ އެކި ކަންކޮޅުތަކުގައި ހިޔާވަހިކަމެއް ނުލިބި، ބަނޑުހައިހޫނުކަން ތަހައްމުލް ކުރަމުންގެންދާ ނިކަމެތި މުސްލިމުންނަށް ހަމްދަރުދީވެ، އެމީހުންނަށް ހެޔޮދުއާ ކުރުމަކީ މުހިންމު ކަމެއް ކަމަށް ވެސް ރައީސް ޔާމީން ވިދާޅުވި އެވެ.