އީދު ނަމާދު ވަގުތަށް މާލޭގެ ތިން ސަރަހައްދެއްގެ ޓްރެފިކަށް ބަދަލު ގެންނަނީ

އަންނަ ހޯމަ ދުވަހު އީދު ނަމާދު ވަގުތަށް މާލޭގެ ތިން ސަރަހައްދެއްގެ ޓްރެފިކަށް ބަދަލު ގެންނަން ނިންމައިފި އެވެ.

ފުލުހުން ބުނީ ބޮޑު ޖަމާއަތުގައި އީދު ނަމާދުކުރާ މާފަންނު ސްޓޭޑިއަމް ސަރަހައްދާއި އިސްލާމީ މަރުކަޒުގެ ސަރަހައްދާއި އަދި މިފަހުން ހުޅުވި ސަލްމާން މިސްކިތުގެ ސަރަހައްދުގެ ޓްރެފިކަށް އެ ދުވަހު ބަދަލުތަކެއް ގެންނަން ނިންމާފައިވާ ކަމަށެވެ.

އިސްލާމީ މަރުކަޒުގެ ސަރަހައްދުން ބޮޑުތަކުރުފާނުމަގާއި އަމީރް އަހްމަދު މަގާއި އަދި ޝަހީދު އަބްދުﷲ ޒުހައިރު ހިނގުމުގެ ކަންމަތިން މެދުޒިޔާރަތް މަގަށް، ހަތަރު ފުރޮޅުލީ އުޅަނދުތަކަށް ނުވަދެވޭ ގޮތަށް ބަންދުކުރަން ވަނީ ނިންމައިގަ އެވެ. އީދު ނަމާދު ވަގުތުގައި ސައިކަލް ޕާކްކުރަން އެ ސަރަހައްދުގައި ހަމަޖެހިފައި ވަނީ ބޮޑުތަކުރުފާނު މަގުގަ އެވެ.

އެހެންވެ، އިސްލާމީ މަރުކަޒުގެ ދެކުނަށް އޮންނަ ޕާކިން ޒޯނުގައި މިހާރު ޕާކްކޮށްފައި ހުރި އުޅަނދުތައް ނަގަން ވަނީ އަންގައިފަ އެވެ.

މާފަންނު ސްޓޭޑިއަމް ސަރަހައްދުން މާފަތްތަކުރުފާނުމަގާއި އަމީނީމަގާއި ހިލާލީމަގާއި އެ މަގުތަކަށް ވަދެވޭ ކުދި މަގުތައް ވެސް ބަންދުކުރަން ނިންމާފައިވެ އެވެ. އެ ސަރަހައްދުގައި ވެސް ސައިކަލު ޕާކްކުރާނީ ބޮޑުތަކުރުފާނުމަގުގަ އެވެ. ސްޓޭޑިއަމްގައި ފިރިހެނުން ނަމާދުކުރަން ހަމަޖައްސާފައި ވަނީ ޓާފް ދަނޑުގަ އެވެ. އަދި އަންހެނުންނަށް ހާއްސަކޮށްފައި ވަނީ ދުވާ ޓްރެކެވެ.

ސަލްމާން މިސްކިތުގެ ސަރަހައްދުގައި ހުޅުމާލެ ފެށީ ޓާމިނަލު ހުންނަ ހިސާބުން ފެށިގެން މަޖީދީ މަގު ކަންމައްޗާ ހަމަ އަށް ހަތަރު، ފުރޮޅުލީ އުޅަނދުތަކަށް ވަނުން މަނާވާނެ އެވެ. އަދި އެ ހިސާބަށް ވަދެވޭ އެހެން މަގުތައް ވެސް ބަންދުކުރާނެ އެވެ. އެ ސަރަހައްދުގައި ވެސް ސައިކަލު ޕާކްކުރަން ހަމަޖައްސާފައި ވަނީ ބޮޑުތަކުރުފާނުމަގުގަ އެވެ.

މިއީ 2018 ގެ ފަހުން މާލޭގައި ފިތުރު އީދު ބޮޑު ޖަމާއަތެއްގައި ކުރާ ފުރަތަމަ ފަހަރެވެ. މޫސުން ގޯސްވުމުގެ ސަބަބުން 2019 ވަނަ އަހަރު ބޮޑު ޖަމާއާތް ނުބޭއްވުނުއިރު، މިދިޔަ ދެ އަހަރު އެކަން ނުވީ ކޮވިޑް-19ގެ ސަބަބުންނެވެ.

މި އީދަށް ހަފުތާއެއްގެ ބަންދު ލިބޭތީ ގިނަ ބަޔަކު މިހާރު ވާނީ މާލެއިން ބޭރަށް ވެސް ދަތުރުކޮށްފަ އެވެ.