ވަކީލް ޝަމީމްގެ ސަސްޕެންޝަން އުވާލައިފި

ކުރީގެ ޑެޕިއުޓީ ޕްރޮސެކިއުޓާ ޖެނެރަލް ހުސައިން ޝަމީމްގެ ސަސްޕެންޝަން މިއަދު އުވާލައިފި އެވެ.

ރާއްޖޭގެ އެއްވެސް ކޯޓެއްގައި ވަކާލާތު ނުކުރެވޭ ގޮތަށް މިދިޔަ ފެބްރުއަރީ މަހު ޝަމީމް ސަސްޕެންޑްކުރީ އޭނާއާ ގުޅޭ މައްސަލައެއް ފުލުހުން ބަލަމުންދާތީ އެވެ.

ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން(ޑީޖޭއޭ) އިން ނެރުނު ބަޔާނެއްގައި ބުނީ ޝަމީމްގެ މައްސަލަ ފައިލް ކޮށްފައިވާ ކަމަށް ސުޕްރީމް ކޯޓަށް ފުލުހުން އަންގާފައިވާ ކަމަށެވެ. އެހެންވެ މިއަދުން ފެށިގެން ޝަމީމްގެ ސަސްޕެންޝަން އުވާލަން ސުޕްރީމް ކޯޓުގެ ފަނޑިޔާރުންގެ މަޖިލީހުން ނިންމާފައިވާ ކަމަށް އެ ބަޔާނުގައިވެ އެވެ.

މީގެކުރިން ވެސް ޝަމީމް ސަސްޕެންޑްކުރި އެވެ. ދެ އަހަރު ވަންދެން ސަސްޕެންޝަންގައި ހުރުމަށް ފަހު ޝަމީމްގެ ސަސްޕެންޝަން އުވާލީ މިދިޔަ ޖެނުއަރީ މަހު އެވެ.