ޗާޓުން ބޭރެއް ނުވާނަން، ކުށްވެރިން ދޫކުރެވޭނެ ގޮތެއް ނެތް: ރައީސް ޔާމީން

ތިމަން މަނިކުފާނަކީ ޗާޓުން ބޭރުން ކަންކަން ކުރައްވާނެ ބޭފުޅެއް ނޫން ކަމަށާއި ކުށްވެރިން ދޫކުރެވޭނެ ގޮތެއް ގާނޫނުގެ ހުދޫދުގެ ތެރޭގައި ނެތް ކަމަށް ރައީސް އަބްދުﷲ ޔާމީން މިއަދު ވިދާޅުވެއްޖެ އެވެ.

ހއ. އާއި ހދ. އަތޮޅަށް ކުރައްވާ ދަތުރުފުޅުގައި ހއ. ކެލާ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ގިނަ އަދަދެއްގެ ރައްޔިތުންނާ ބައްދަލުވި އިރު، ކުށްވެރިންތަކެއް ދޫ ނުކޮށްގެން ރައްޔިތުން އެކަމާ ކަންބޮޑުވެ، އެކަން މައްސަލައެއްގެ ގޮތުގައި ހުށަހަޅާފައި ނުވާ ކަމަށެވެ. ރަށްރަށަށް ވަޑައިގަތީމަ، ރައްޔިތުން އެދެނީ، އެ މީހުންނަށް ބޭނުންވެފައި ހުރި ކަންކަން ފުރިހަމަ ކޮށްދިނުމަށް ކަމަށް ރައީސް ވިދާޅުވި އެވެ.

"އެއްވެސް ކަހަލަ ގިންތިއެއް، މިނެއް ނެތި ބަލައި ނުލާ ދޮރު ހުޅުވާފައި އެންމެން ދޫކޮށްލާ ވާހަކަ އަޅުގަނޑުމެންނާ ހަމައަށް ނާދޭ. އެ ތަންތަނުގައި ތިބި މީހުންނަކީ ކޮން ކަހަލަ ގިންތިއެއްގައި ތިބި ކުށްވެރިންތަކެއް ކަން ރައްޔިތުންނަށް އިހްސާސް ކުރެވޭ،" ރައީސް ވިދާޅުވި އެވެ.

"ގިންތިއެއް، މިންވަރެއް، ކުރި ކުށެއް ބަލާ ނުލާ ގޭޓެއްގެ ދޮރު ހުޅުވާލާފައި މިނިވަން ކުރުމަކުން އެއީ ރައްޔިތުން ބޭނުންވާ ކަމެއް ކަމަކަށް އަޅުގަނޑު ގަބޫލެއް ނުކުރަން،"

މީގެއިތުރުން ޑިމޮކްރަސީ ނެތް ވާހަކަ އާއި އިސްލާމް ދީން އޮވެގެން އެކަން ހިމާޔަތް ކުރުމަށް ކުރާ މަސައްކަތާ ދޭތެރޭގައި ހިތްހަމަނުޖެހިގެން ރައްޔިތުން ޝަކުވާ ކުރަމުން ނުދާ ކަމަށް ރައީސް ވިދާޅުވި އެވެ. އެކަމަކު، ރަށް ރަށުގައި ތިބީ އެންމެ ފިކުރެއްގެ މީހުން ނޫން ކަން ވެސް ރައީސް ފާހަގަ ކުރެއްވި އެވެ.

"އިސްލާމް ދީނަށް ބާރުވެރި ކުރުމުގެ ގޮތުން ސަރުކާރުން ކުރަމުންދާ މަސައްކަތަށް ސުވާލު އުފެއްދި ރައްޔިތަކު ނެތް. ތައުލީމީ ނިޒާމު ގޯސްވެގެން އެ ވާހަކަ ދައްކާ ރައްޔިތުންނެއް ނެތް،" ކެލާގެ ނަރުދަމާގެ ނިޒާމު ރަސްމީކޮށް އިފްތިތާހު ކުރުމަށް ބޭއްވި ޖަލްސާގައި ރައީސް ވިދާޅުވި އެވެ.

އެކަމަކު، ރާއްޖޭގެ ސިއްހީ ނިޒާމުގައި އުނި ކަންކަން ހުރީމަ، ސިއްހީ ފަރުވާގެ ފެންވަރު ރަނގަޅު ކުރަން ޖެހޭ ވާހަކަތައް ރައްޔިތުން ދައްކަމުން އަންނަ ކަމަށް ރައީސް ޔާމީން ވިދާޅުވި އެވެ. ރައީސް ވިދާޅުވި ގޮތުގައި ދަރުމަވަންތަ ހޮސްޕިޓަލެއް އަޅަމުން ދާތީ އެކަމާ އުފާ ކުރާ ރައްޔިތުން ތިބިއިރު، އެ ހޮސްޕިޓަލް އެޅި ގޮތާ މެދު ސުވާލު އުފައްދާ ތަނެއް އެމަނިކުފާނަށް ފެނިވަޑައެއް ނުގަންނަވަ އެވެ.

ރައީސް ވިދާޅުވީ ރާއްޖޭގެ އެއްވެސް ރަށަކަށް ކަމެއް ކޮށްދެނީ ވަކި ޝަރުތެއް ކޮށްދީގެން ނޫން ކަމަށެވެ. އެމަނިކުފާނު ކުރެއްވި ހިދުމަތް ރައްޔިތުން ބަލައިގަންނަ ނަމަ، އެވަރު ފުދޭ ކަމަށް ރައީސް ވިދާޅުވި އެވެ.

"މަޝްވަރާ އަށް އައުމަށް 12 ފަހަރަށް ދައުވަތު ދިނިން"

ރާއްޖޭގައި އުފެދިފައި އޮތް ކަމަށް އިދިކޮޅު ފަރާތްތަކުން ބުނަމުން އަންނަ ސިޔާސީ މައްސަލަތައް ހައްލު ކުރުމަށް 12 ފަހަރެއްގެ މަތިން އިދިކޮޅު ފަރާތްތަކާ މަޝްވަރާ ކުރެއްވި ކަމަށް ރައީސް ޔާމީން ވިދާޅުވި އެވެ. އެކަމަކު، އިދިކޮޅު ފަރާތްތަކުން މަޝްވަރާ އަށް ވަޑައިނުގަންނަވަނީ "ދައްކާނެ ވާހަކައެއް ނެތީމަ" ކަމަށް ވެސް ރައީސް ޔާމީން ވިދާޅުވި އެވެ.

ރައީސް ޔާމީން ވިދާޅުވި ގޮތުގައި އެންމެން މަސައްކަތް ކުރަނީ ރައްޔިތުންގެ ހައްގުގައި އެއް އަމާޒަކަށެވެ. އެއީ ރައްޔިތުންނަށް ތަރައްގީ އާއި ހަމަޖެހުން ހޯދައި ދިނުމަށް ކަމަށާއި އެކަން ކުރެވޭނީ ސިޔާސީ އަމިއްލަ ވިސްނުން ދޫކޮށްލާފައި ގައުމުގެ ހައްގުގައި މަސައްކަތް ކުރަން ކެރިގެން ކަމަށާއި އެކަމުގެ ކެރުމާއި ފޯރުންތެރިކަން ހުންނަން ވާނެ ކަމަށް ވެސް ރައީސް ވިދާޅުވި އެވެ.

"ރައްޔިތުންގެ ހައްގުގައި މަސައްކަތް ކުރާނަމަ، ސިޔާސީ މައްސަލަތަކަށް ހައްލެއް ހޯދަން ޖެހޭ. އެކަމަށް އެ އޮތީ ދައުވަތު ދީފައި،" ރައީސް ޔާމީން ވިދާޅުވި އެވެ.

ރައީސް ޔާމީން ވިދާޅުވި ގޮތުގައި ކަންކަން ހައްލު ކުރަން އަންނަން ވާނީ ޝަރުތުތަކެއް ކުރިމަތިކޮށްފައެއް ނޫނެވެ. ކުށްވެރިން ދޫކުރެވެން އޮތީ ގާނޫނުގެ ހުދޫދުގެ ތެރެއިން ކަމަށާއި ގާނޫނުގައި ނެތް ބާރެއް، އެމަނިކުފާނަށް ބޭނުން ނުކުރެއްވޭނެ ކަމަށް ރައީސް ވިދާޅުވި އެވެ.

ރައީސް ކެލާގައި ވިދާޅުވި ބައެއް ވާހަކަފުޅުތައް:

- މި އަހަރު ކެލާގައި މަލްޓިޕާޕަސް ހޯލެއް އަޅާނަން.

- މި އަހަރު ނިމުމުގެ ކުރިން ބީއެމްއެލްގެ އޭޓީއެމްއެއް ހުންނާނެ.

- މި ސަރުކާރު އައުމުގެ ކުރިން ކެލަ އަށް ހަރަދު ކުރީ އަށް މިލިއަން ރުފިޔާ.

- މި ސަރުކާރުން 105 މިލިއަން ރުފިޔާ ކެލަ އަށް ހަރަދު ކޮށްފި.

ރައީސް ޔާމީން ވިދާޅުވި ގޮތުގައި އެ މަނިކުފާނު ޖަލަށް ލީ މީހަކު ރާއްޖެއަކު ނުހުންނާނެ އެވެ. އަދި ހުކުމުން ފިލައިގެން އުޅޭ މީހުން ދޫކޮށްލަން ގޮވައިލުމަކީ ކުރެވޭނެ ކަމެއް ނޫން ކަމަށް ރައީސް ވިދާޅުވި އެވެ. އެކަން ކުރެވޭނެ ގޮތެއް ހޯދަން މަޝްވަރާ އަށް އައުމަށް ރައީސް މިއަދު ވެސް އެދިވަޑައިގެންނެވި އެވެ.

ރައީސް މިއަދު ވެސް ވިދާޅުވީ މުޖުރިމުން ޖަލުގައި ތިބީ ގާނޫނާއި ޝަރީއަތުގެ ތެރެއިން ހުކުމް އައިސްގެން ކަމަށާއި ރާއްޖޭގައި ގިނައީ މައުސޫމް މީހުން ކަމަށްވާތީ، މުޖުރިމުން ހިމާޔަތް ކުރަން ޖެހޭނެ ކަމަށެވެ.