އަހަރެންނާ އިދިކޮޅު މީހުންނެއް ނުތިބޭނެ: ޑރ. ޝަހީމް

ދިވެހިންގެ ތެރޭގައި އޭނާއާ އިދިކޮޅު ބަޔަކު ނުތިބޭނެ ކަމަށް، މި އަހަރުގެ ރިޔާސީ އިންތިޚާބުގައި ޕީޕީއެމްގެ ކެންޑިޑޭޓް ރައީސް އަބްދުﷲ ޔާމީންގެ ރަނިން މޭޓް، ޑރ. މުހައްމަދު ޝަހީމް އަލީ ސައީދު މިރޭ ވިދާޅުވެއްޖެ އެވެ.

ގއ. އަތޮޅުގެ މީހުން ދިރިއުޅޭ ހުރިހާ ރަށަކަށް ކުރައްވާ ކެމްޕެއިން ދަތުރުގެ ތެރެއިން، އެންމެ ފަހު ރަށް އަދި ޝަހީމް އުފަން މާމެންދޫ ރައްޔިތުންނާ ބައްދަލު ކުރައްވައި އޭނާ ވިދާޅުވީ، ދިވެހި ހުރިހާ ރައްޔިތުންނަކީ ވެސް އޭނާއާ އެއްކޮޅު މީހުން ކަމަށެވެ.

ޚިޔާލު ތަފާތުވާ މީހުން ވެސް އޭނާ އަށް ތާއީދު ކޮށްދިނުމަށް އެދިވަޑައިގަންނަވާ ކަމަށާއި އޭރުން ގައުމު ތަރައްގީ ކޮށްދެއްވާނެ ކަމަށް ޝަހީމް މިރޭ ވައުދުވެވަޑައިގަތެވެ.

"އަހަރެންނަށް އިދިކޮޅު ޕާޓީއެއް ނޯންނާނެ. އިދިކޮޅު މީހުން ނުތިބޭނެ. އަހަރެންގެ ކޮޅަށް އަރަން އެދެން. މި ގައުމު ތަރައްގީ ކުރާނަން." ހުވަދޫ ބަހުރުވައިން ވާހަކަ ދައްކަވަމުން ޝަހީމް ވިދާޅުވި އެވެ.

ގއ. އަތޮޅުގެ ހުރިހާ ރަށަކަށް ކުރެއްވި ދަތުރު ގައި ލިބިވަޑައިގެންނެވި ތަރުހީބު ފާހަގަ ކުރައްވަމުން ޝަހީމް ވިދާޅުވީ، ވަރަށް ބޮޑު އަޣުލަބިއްޔަތަކުން "ލަކިލަކި ޖަހާފައި" ސެޕްޓެމްބަރު 23 ގައި ބާއްވާ ރިޔާސީ އިންތިޚާބު ރައީސް ޔާމީނަށް ކާމިޔާބު ކުރެއްވޭނެ ކަމަށެވެ.

"އަހަރެން މިދަތުރު ނިންމާލަން މި އައީ ވަރަށް އުފަލާ އެކު. އަހަރެން މާލެ އިން ފުރައިގެން މި އައީ ވަރަށް އަޒުމާ އެކު. އަހަރެންނަށް ޔަގީން ވެއްޖެ މި އިންތިޚާބު ކާމިޔާބު ކުރެވޭނެކަން." އިސްލާމިކް ޔުނިވަސިޓީގެ ޗާންސެލަރަކަށް ވެސް ހުންނެވި ޝަހީމް ވިދާޅުވި އެވެ.

އެ ދަތުރު ގައި އެތަކެއް ރައްޔިތުންނާ ބައްދަލު ކުރެއްވިއިރު، އެ މީހުން އެދުނު ކަންކަން ރައީސް ޔާމީނަށް ދައްނަވާނެ ކަމަށާއި އެ ކަންކަން ރައީސް ކޮށްދެއްވާނެ ކަމުގެ 100 ޕަސެންޓް ޔަގީންކަން ދެއްވާ ކަމަށް ޝަހީމް ވިދާޅުވި އެވެ.

އޭނާ ވިދާޅުވި ގޮތުގައި، ރައީސް ޔާމީނަކީ ހުރިހާ ރައްޔިތުންގެ ރައީސެވެ. އަދި ވިދާޅުވީ، އިސްލާމް ދީން ނައްތާލުމުގެ އެއްވެސް އަމަލެއް ރައީސް ޔާމީން ނުކުރައްވާނެ ކަމަށާއި ރައީސްގެ އާއިލާ އަކީ ވެސް އެ ދީނަށް ލޯބި ކުރައްވާ ބޭފުޅުންތަކެއް ތިއްބެވި އާއިލާ އެއް ކަމަށެވެ.

"އިސްލާމް ދީނަށް ގެއްލުން ވާނެ ކަމެއް ރާއްޖޭގެ ރައީސް ނުކުރައްވާނެ. އެމަނިކުފާނުގެ އާއިލާ އަކީ ވެސް މާޒީގައި ވެސް އިސްލާމް ދީނަށް ހިދުމަތް ކުރައްވާފައިވާ އާއިލާއެއް. އެމަނިކުފާނުގެ ބައްޕާފުޅު ވެސް. އެމަނިކުފާންގެ އަނބިކަނބަލުން [ފާތިމަތު އިބްރާހިމް] އަކީ ވެސް ވަރަށް ދީނަށް އިހުތިރާމް ކުރައްވާ ބޭފުޅެއް. އެމަނިކުފާނުގެ ދަރިންނަކީ ވެސް ދީނަށް އިހުތިރާމް ކުރައްވާ، ގަދަރު ކުރައްވާ ބައެއް،" ރައީސް ޔާމީންގެ އާއިލާ އަށް ތައުރީފު ކުރައްވަމުން ޝަހީމް ވިދާޅުވި އެވެ.

އިސްލާމް ދީނުގެ އަދާވާތްތެރިންނާ ގުޅިގެން އުޅެން ބޭނުން ނުވާ ކަމަށާއި އެއީ ގައުމަށް ވެވޭ ވަރަށް ބޮޑު ހިޔާނާތެއް ކަމަށް ޝަހީމް ވިދާޅުވި އެވެ. އިރާގާއި ސީރިއާ ފަދަ އިސްލާމީ ގައުމުތައް ދީނާ ދެކޮޅު ގައުމުތަކުގެ ރޭވުންތަކުން ފަނާކޮށްފައިވާ ކަމަށް ވިދާޅުވެ އެ ފުރުސަތު ނުދިނުމަށް ޝަހީމް ގޮވާލެއްވި އެވެ.

ރައީސް ޔާމީނަށް ރިޔާސީ ދެވަނަ ދައުރެއް ދޭން ޖެހޭ އެއް ސަބަބެއްގެ ގޮތުގައި ޝަހީމް ވިދާޅުވީ، މީގެ ކުރިން ރާއްޖޭގައި ނެތް އެތައް ޚިދުމަތެއް އެމަނިކުފާނުގެ ސަރުކާރުން ފެށުމެވެ. އެގޮތުން، އިސްލާމިކް ޔުނިވާސިޓީއެއް އުފެއްދުމާއި އަރަބި އަދި އިސްލާމީ، އެންމެ މަތީ ތައުލީމް ރާއްޖޭގައި ތިބެގެން ހާސިލް ކުރުމުގެ ފުރުސަތު ރައީސް ޔާމީން ހޯއްދަވައި ދެއްވާފައިވާ ކަމަށް ވިދާޅުވި އެވެ. އަދި، ގުރުއާން ހިތުދަސް ކުރާ މީހުންނަށް ގައުމީ ފެންވަރެއްގެ އިނާމް ދޭން ފެށީ މި ސަރުކާރުން ކަމަށް ވެސް ޝަހީމް ވިދާޅުވި އެވެ.

ކޮންމެ ސަރުކާރެއްގައި ވެސް އިސްލާހުކުރަން ޖެހޭ ކަންތައްތަކެއް ހުންނާނެ ކަމަށާއި އެ ގޮތުން ރައީސް ޔާމީންގެ ސަރުކާރު ގައި އެ ފަދަ ކަންކަން އެބަހުރި ކަމަށް ޝަހީމް ވިދާޅުވި އެވެ. އެ ކަންކަން އިސްލާހު ކުރަން މަސައްކަތް ކުރައްވާނެ ކަމަށް އޭނާ ވިދާޅުވި އެވެ.

ރައީސް ޔާމީންގެ ރިޔާސީ ދެވަނަ ދައުރުގެ ރަނިންމޭޓަކަށް ޝަހީމް ހަމަޖެއްސެވި ފަހުން، އޭނާގެ ފުރަތަމަ ކެމްޕެއިން ދަތުރުގައި ގއ. އަތޮޅުގެ ހުރިހާ ރަށެއްގެ ގިނަ ގޭގެ އަށް ވަޑައިގެން ރައީސް ޔާމީނަށް ވޯޓު ހޯއްދެވުމަށް ގިނަ މަސައްކަތްތަކެއް ވަނީ ކުރައްވައިފަ އެވެ.