މިނިވަންކަން ދަމަހައްޓަން ކޮންމެ ކަމެއް ވެސް ކުރާނަން: ޑިފެންސް މިނިސްޓަރު

ރާއްޖެއަކީ އަމިއްލަ މިނިވަންކަމާއި އިސްތިގުލާލާއި ސިޔާދަތު ދެމެހެއްޓުމުގެ ގާބިލްކަން ލިބިފައިވާ ގައުމެއް ކަމަށާއި އެކަމަށް ކުރަން ޖެހުނު ކޮންމެ ކަމެއް ކުރާނެ ކަމަށް ޑިފެންސް މިނިސްޓަރު އާދަމް ޝަރީފް މިއަދު ވިދާޅުވެއްޖެ އެވެ.

އަންނަ މަހު 23 ގައި އޮންނަ ރިޔާސީ އިންތިހާބު އޮޅުވާލައިފި ނަމަ އިންޑިއާއިން ރާއްޖެ ހިފަން ޖެހޭނެ ކަމަށް އެ ގައުމުގެ ރާޖަ ސަބާގެ މެމްބަރު ސުބްރަމާނިއަން ސުވާމީ މިއަދު ވިދާޅުވުމާ ގުޅިގެން ޑިފެންސް މިނިސްޓަރު ފޭސްބުކް ޕޭޖްގައި ލިޔުއްވާފައި ވަނީ ދިވެހިންގެ ކަންކަން ނިންމަންވާނީ ދިވެހިން ކަމަށެވެ.

"ދިވެހިރާއްޖޭގެ އެއްވެސް ކަމަކަށް ބޭރު ބަޔަކު ވަންނާކަށް ނުވަތަ ވައްދާކަށް ވެސް ނުޖެހޭނެ އެވެ. އެ ފުރުސަތެއް ދިވެހިން ނުދޭނެ އެވެ." އާދަމް ޝަރީފް ވިދާޅުވި އެވެ.

މިނިސްޓަރު ވިދާޅުވީ ދިވެހިންގެ މިނިވަންކަމާއި އިސްތިގުލާލާއި ސިޔާދަތު ދެމެހެއްޓުމަށް ކުރަން ޖެހޭ ކޮންމެ ކަމެއް ވެސް ކުރައްވާނެ ކަމަށެވެ. އަދި ރާއްޖެއާ އަވަށްޓެރި ގައުމުތަކާ ދެމެދު އޮންނަ ރަހުމަތްތެރިކަމުގެ ގުޅުމަށް ބުރޫއަރާ ފަދަ ކަންކަން ނުކުރެއްވުމަށް ގޮވާލާ ކަމަށް ވެސް އާދަމް ޝަރީފް ވިދާޅުވެފައިވެ އެވެ.

ސުބްރަމާނިއަން މިދިޔަ ހަފުތާގައި ސްރީ ލަންކާއަށް ކުރެއްވި ދަތުރުފުޅެއްގައި ކުރީގެ ރައީސް މުހައްމަދު ނަޝީދާއެކު ވަނީ ރާއްޖޭގެ ސިޔާސީ މަސްރަހާ ބެހޭ ގޮތުން މަޝްވަރާކުރައްވައިފަ އެވެ.

ބުދަ ދުވަހު ރައީސް ނަޝީދާއެކު ބޭއްވި އެ ބައްދަލުވުމަށްފަހު ކުރެއްވި ޓުވީޓެއްގައި އޭނާ ވިދާޅުވެފައި ވަނީ ރިޔާސީ އިންތިހާބު އޮޅުވާލަފާނެތީ ނަޝީދު ހުންނެވީ ވަރަށް ކަންބޮޑުވެވަޑައިގެންފައި ކަމަށެވެ. އަދި އަވަށްޓެރިއެއްގެ ހައިސިއްޔަތުން އިންޑިއާ އިން އެ ފުރުސަތު ދޭން ބޭނުން ނުވާ ކަމަށާއި ރައީސް އަބްދުﷲ ޔާމީން ވަނީ އިންޑިއާ "ވަރަށް ދަށްކޮށްލާފައި" ކަމަށް ވެސް ސުބްރަމާނިއަން ވިދާޅުވެފައިވެ އެވެ.

ސިޔާސީ ލީޑަރުން ހިމެނޭ ގޮތަށް ނުވަ ބޭފުޅަކު މިނިވަންކުރަން ސުޕްރީމް ކޯޓުން ފެބްރުއަރީގައި 1 ގައި ނެރުނު އަމުރު ބާތިލްކޮށް ކުއްލި ނުރައްކަލުގެ ހާލަތު އިއުލާންކުރުމުން އިންޑިއާ އިން އެކަމާ ވަރަށް ބޮޑަށް ނުރުހުންވެ، ދިވެހި ސަރުކާރަށް ފާޑު ކިޔާފައިވެ އެވެ. އަދި އެ މައްސަލައާ ގުޅިގެން ދެ ގައުމު ސިޔާސީ ގުޅުން ވަނީ ވަރަށް ބޮޑަށް ގޯސްވެފަ އެވެ.