ނިހާނަށް މަރުގެ އިންޒާރުދިން މައްސަލަ ފުލުހުންނަށް ހުށަހަޅައިފި

ރައްޔިތުންގެ މަޖިލީހުގެ ވިލިމާފަންނު ދާއިރާގެ މެމްބަރު އަދި ޕީޕީއެމްގެ ޕާލަމެންޓްރީ ގްރޫޕުގެ ލީޑަރު އަހުމަދު ނިހާނަށް މަރުގެ އިންޒާރު ދިން ކަމަށް ބުނާ މައްސަލައެއް، ޕީޕީއެމުން މިއަދު ފުލުހުންނަށް ހުށަހަޅައިފި އެވެ.

ޕީޕީއެމުން މިރޭ ބުނިގޮތުގައި ނިހާނަށް މަރުގެ އިންޒާރު ދިނީ، އެމްޑީޕީގެ އިސް އެކްޓިވިސްޓެކެވެ. ނިހާނަށް މަރުގެ އިންޒާރު ދިނީ ކިހިނެއް ކަން ނުބުނި ނަމަވެސް، އެ މައްސަލަ މިއަދު ހަވީރު ފުލުހުންނަށް ހުށަހަޅާފައިވާ ކަމަށް ޕީޕީއެމުން ބުންޏެވެ.

އަދި އެ ޕާޓީން ވަނީ އެކަން އެމްޑީޕީގެ ލީޑާޝިޕުން ކުށްވެރިކޮށް، މާފަށް އެދުމަށް ގޮވާލައިފަ އެވެ.

މިދިޔަ މަހު 23 ވަނަ ދުވަހު ބޭއްވި ރިޔާސީ އިންތިޚާބަށް ފަހު، އިލެކްޝަންސް ކޮމިޝަން (އީސީ)ގެ ސެކްރެޓަރީ ޖެނެރަލް އަބްދުއްރަހުމާން ސޮލާހަށް ވެސް ވަނީ މަރުގެ އިންޒާރު ދީފަ އެވެ. އަދި ރައީސް އޮފީހުގެ ތަރުޖަމާނު އިބްރާހިމް މުއާޒު އަލީއަށް މަރުގެ އިންޒާރު ދިން މައްސަލަ ވެސް އޭނާ ވަނީ ފުލުހުންނަށް ހުށަހަޅާފަ އެވެ.

ރިޔާސީ އިންތިޚާބަށް ފަހު، ސިޔާސީ މައިދާން ހަލަބޮލިވެފައިވާއިރު، އިންތިޚާބު އޮޅުވާލާފައިވާ ކަމަށް ބުނެ ޕީޕީއެމުން އަންނަނީ ކޮންމެ ރެއަކުހެން މުޒާހަރާތައް ބާއްވަމުންނެވެ.