މޫސަ މަގާމުން ވަކި ކުރަން ޕީޕީއެމުން ހުށަހަޅަނީ

ރައްޔިތުންގެ މަޖިލީހުގެ ނައިބު ރައީސް މޫސާ މަނިކުގެ އިތުބާރު ނެތް ކަމުގެ މައްސަލަ ހުށަހަޅުއްވާނެ ކަމަށް ޕީޕީއެމްގެ ޕާލަމެންޓްރީ ގްރޫޕްގެ ޑެޕިއުޓީ ލީޑަރު އިބްރާހިމް ފަލާހު މިއަދު ވިދާޅުވެއްޖެ އެވެ.

އެންޓި ޑިފެކްޝަން ގާނޫނު އުވައިލުމުގެ ބިލް މަޖިލީހަށް ބަލައިގަތުމަށް މިއަދު ކުރި ބަހުސްގައި ފަލާހު ވިދާޅުވީ މޫސަ މަޖިލީހުގެ ނައިބު ރައީސް ކަމުން ވަކި ކުރުމުގެ މަސައްކަތް ކުރަމުންދާ ކަމަށެވެ. ފަލާހު ވަނީ މަޖިލީހުގެ ޖަލްސާތައް ހިނގަމުންދާ ގޮތާ މެދު ހިތްހަމަނުޖެހުން ފާޅު ކުރައްވައިފަ އެވެ.

ފަލާހު ވިދާޅުވީ މިއަދު ޖަލްސާތައް ކުރިއަށް ދަނީ މެމްބަރުންނަށް އެންގުމެއް ނެތި، ބަންދު ދުވަސްތަކާއި ދުވާލާއި ރޭގަނޑުގެ ވަގުތުތަކުގައި ކަމަށެވެ. އަދި މިއަދު އެ ވާހަކަ ދައްކަވާނެ މެމްބަރެއް ނެތް ކަމަށް ވިދާޅުވެ، އޭނާ ވަނީ ކަންބޮޑުވުން ފާޅުކުރައްވައިފަ އެވެ.

މިސާލެއްގެ ގޮތުގައި ފަލާހު ވިދާޅުވީ މިއަދުގެ ޖަލްސާ އޮންނާނެ ކަން އިއްޔެ އެންގުމަށް ފަހު، ކެންސަލް ކުރި ކަމަށެވެ. އަދި އޭގެ ފަހުން، މިއަދުގެ ޖަލްސާ 11 ޖަހާ އިރު އޮންނާނެ ކަން އެނގުނީ 10:45 ގައި ކުރި މެސެޖަކުން ކަމަށް ވެސް ފަލާހު ވިދާޅުވި އެވެ.

ރިޔާސަތުގައި އިންނެވި މޫސަ އަށް ފަލާހު ފާޑު ވިދާޅުވާން ފެއްޓެވުމުން، މޫސަ ވަނީ ފަލާހުގެ ވާހަކަތައް ހުއްޓުވައިފަ އެވެ. އަދި އަމަލު ކުރައްވާނީ ޕީޕީއެމް ނުވަތަ އެމްޑީޕީ މެމްބަރުން ބޭނުންވާ ގޮތަށް ނޫން ކަމަށް ވިދާޅުވެ، ފަލާހަށް މޫސަ ރައްދު ދެއްވި އެވެ.

މޫސަ ވިދާޅުވީ ޖަލްސާ އޮންނަ ގަޑިތައް އަދިވެސް ކަނޑައަޅުއްވަނީ މަސީހު ކަމަށެވެ. އެގޮތުން ޖަލްސާ ނުބޭއްވުމަށާއި މިއަދު އަލުން ޖަލްސާ ބާއްވަން ނިންމީ ވެސް މަސީހު ކަމަށާއި މޫސަ ކުރައްވާ ކަމަކީ މެންބަރުންނަށް އެންގުން ކަމަށް އޭނާ ވިދާޅުވި އެވެ.

މޫސަ ވިދާޅުވި ގޮތުގައި، އެ މަނިކުފާނު އަމަލު ކުރައްވާނީ ގާނޫނުއަސާސީ އާއި ގާނޫނުތަކާ އެއްގޮތްވާ ގޮތަށެވެ. އެހެން ވިދާޅުވުމަށް ފަހު، ފަލާހަށް ވާހަކަ ދެއްކެވުމުގެ ފުރުސަތު "ބަންދު" ކުރެއްވި އެވެ. އޭގެ ފަހުން ފަލާހު ވަނީ ވަރަށް ބޮޑަށް ހިތްހަމަނުޖެހި، ނިޒާމީ މައްސަލަ ނަންގަވަން މަސައްކަތް ކުރައްވައިފަ އެވެ.

މޫސަ ވަކި ކުރުމުގެ މައްސަލަ މަޖިލީހަށް ހުށަހަޅަން ނިންމި އިރު، 51 މެމްބަރުންގެ ސޮޔާއެކު، މަޖިލީހުގެ ރައީސް އަބްދުﷲ މަސީހް މުހައްމަދުގެ އިތުބާރު ނެތް ކަމުގެ މައްސަލަ ވަނީ ވައްދައިފަ އެވެ. އަދި މަސީހް ވަކި ކުރުމުގެ މައްސަލަ އަންނަ މަހުގެ އަށް ވަނަ ދުވަހަށް މިހާރު އޮތީ ތާވަލު ކޮށްފަ އެވެ.

މަޖިލީހުގެ ރައީސްގެ މައްޗަށް އިތުބާރު ނެތް ކަމަށް ފާސްވާނީ، އެ ދުވަހެއްގެ ޖަލްސާގައި ވޯޓުގައި ބައިވެރިވާ މެމްބަރުންގެ އަޣުލަބިއްޔަތުންނެވެ. ރައްޔިތުންގެ މަޖިލީހުގެ ރައީސް ނުވަތަ ނައިބު ރައީސް މަގާމުން ވަކިކުރުމަށް މަޖިލީހުން ފާސް ކުރުމާ އެކު އެމީހަކު އެ މަގާމުން ވަކިވާނެ އެވެ.

މަޖިލީހުގެ ގަވައިދުގައިވާ ގޮތުން މަޖިލީހުގެ ރައީސާއި ނައިބު ރައީސްގެ އިތުބާރު ނެތް ކަމުގެ މައްސަލައެއް ވައްދަން 43 މެމްބަރުންގެ ސޮއި ބޭނުންވާނެ އެވެ.