އިންޑިއާގެ ފުޓްބޯޅަ ތަރި ބައިިޗުން ބުޓިއާގެ ވާހަކަ ބޮޑު ސްކްރީނަށް ގެންނަނީ

އިންޑިއާގެ މަޝްހޫރު ފުޓްބޯޅަ ތަރި ބައިޗުން ބުޓިއާގެ ވާހަކަ ކިޔައިދޭ ފިލްމެއް ބޮޑު ސްކްރީނަށް ގެންނަން ނިންމައިފި އެވެ.

ކްރިކެޓަށް މަރުދޭ އިންޑިއާގައި މި ފަހުގެ ތާރީހެއްގައި ފުޓްބޯޅައިގެ ފޯރި އާއި ހުނަރު ހުރިކަން ދައްކުވައިދިނުމުގައި އިސް ދައުރެއް އަދާކުރި އުމުރުން 41 އަހަރުގެ ބައިޗުންގެ ބައޮގްރިކަލް ޑްރާމާއަކީ "ޖުގާދު" އާއި "ޒިލާ ގަޒީއާބާދު" ފަދަ ފިލްމުތައް ޑައިރެކްޓްކުރި އާނަންދު ކުމާރު ހަދާ ފިލްމެކެވެ.

ބައިޗުންގެ ފިލްމާ އެކު އާނަންދު ޕްރޮޑިއުސަރެއްގެ ޒިންމާ ނަގަން ނިންމާފައިވާ އިރު، ފިލްމުގެ ސްކްރިޕްޓްގެ މަަސައްކަތް މިހާރު އަންނަނީ ކުރަމުންނެވެ. އާނަންދު ބުނި ގޮތުގައި ފިލްމުގައި ބައިޗުންގެ ރޯލް ކުޅޭނެ އެކްޓަރާއި ފިލްމުގެ އިތުރު ކާސްޓުންނާއި ޑައިރެކްޓަރަކީ ކޮބައިކަން ވަރަށް އަވަހަށް އިއުލާން ކުރާނެ އެވެ.

މި ޕްރޮޖެކްޓާ ގުޅޭ ގޮތުން އާނަންދު ވަނީ ބައިޗުންއާ ވެސް ބައްދަލުކޮށް، ފިލްމާ ބެހޭ ވާހަކަތައް ހިއްސާކޮށްފަ އެވެ.

އިންޑިއާގެ އެންމެ ފާހަގަކޮށްލެވޭ ފުޓްބޯޅަ ތަރިންގެ ތެރޭގައި ހިމެނޭ ސްޓްރައިކަރު ބައިޗުން ސިފަ ކުރަނީ ބައިނަލްއަގްވާމީ މައިދާނުގައި އިންޑިއާގެ ފުޓްބޯޅައިގެ ހުނަރު ދައްކައިލި ހުނަރުވެރިޔާގެ ގޮތުގަ އެވެ. އޭނާ އަދި ފާހަގަކުރެވެނީ ޔޫރަޕްގެ ކުލަބަކަށް ސޮއިކުރި އިންޑިއާގެ ދެވަނަ ފުޓްބޯޅަ ތަރީގެ ގޮތުގަ އެވެ.

ނަވާރަ ސަތޭކަ ނުވަދިހަ ތިނެއްގައި ފުޓްބޯޅައިގެ ތެރެއަށް ނުކުމެ ކާމިޔާބު ކެރިއަރެއް ބިނާކުރި ބައިޗުން އިން ފުޓްބޯޅަ ކުޅުން ރަސްމީކޮށް ހުއްޓައިލީ 2011 ގަ އެވެ. އަދި އޭނާ އަންނަނީ އިންޑިއާގައި ފުޓްބޯޅަ ކުރިއެރުވުމަށް މަސައްކަތްތަކެއް ކުރަމުންނެވެ.

އެގޮތުން ދިއްލީގައި ބައިޗުން ބުޓިއާ ފުޓްބޯލް ސްކޫލްގެ ނަމުގައި އެކެޑެމީއެއް އަންނަނީ ހިންގަމުންނެވެ. އިންޑިއާ އަށް ހިދުމަތް ކުރާ އަގުހުރި ޝަހުސިއްޔަތުންގެ އަގުވަޒަން ކުރުމުގެ ގޮތުން ސަރުކާރުންދޭ ޕަދުމާޝްރީ އެވޯޑް ވެސް 2008 ގައި ލިބިފައިވާ ތިން ކުދިންގެ ބައްޕަ އަށް އަރުޖުނާ އެވޯޑް ފޮ ފުޓްބޯލް އަރުވާފައި ވަނީ 1998 ގަ އެވެ.

ބައިޗުންގެ ބައޮގްރަފިކަލް ޑްރާމާ އިއުލާން ކުރި ނަމަވެސް ފިލްމު ރިލީޒް ކުރާނެ ދުވަހެއް އަދި އިއުލާނެއް ނުކުރެ އެވެ.