ބޮލީވުޑްގެ ހަބަރުތައް ކުރުކޮށް

ސަލްމާން ހާން ބޮލީވުޑަށް ނެރެ ދިން ނަމަވެސް ޒަރީން ހާނަކީ މިހާތަނަށް މާ ބޮޑު ކުރިއެރުމެއް ހޯދުނު ބަތަލާއެއް ނޫނެވެ. ސަލްމާނާ އެކު 2010 އިން، ފިލްމު "ވީރު" އިން ތައާރަފުވި ބަތަލާ އަށް މިހާތަނަށް މާ ރަނގަޅު ފިލްމުތަކަކުން ފުރުސަތެއް ވެސް ނުލިބެ އެވެ. އަނެއްކޮޅުން މާ މަޝްހޫރު އެކްޓަރަކާ އެކު މަސައްކަތް ކުރާކަށް ވެސް ނުލިބެ އެވެ.

އެހެންވެ އޭނާއަކީ ކުރިމަގު އުޖާލާ ބަތަލާއެއް ވެސް ނޫނެވެ. ބޮލީވުޑަށް ނުކުތްތާ ކައިރީގައި ކެޓްރީނާ ކައިފާ ވައްތަރު ގޮތެއް ހުންނަ ކަމަށް ބައެއް މީހުން ބުނި ބަތަލާ މިހާތަނަށް ކުޅުނު ފިލްމުތަކުގެ ތެރޭގައި "ހައުސް ފުލް 2"، "ހޭޓް ސްޓޯރީ 3"، "އަކުސަރު 2" އަދި މި އަހަރުގެ ކުރީކޮޅު ރިލީޒް ކުރި "1921" ހިމެނެ އެވެ.

ޒަރީން، 31، މިހާރު އަންނަނީ އަނެއްކާ ވެސް ޕަންޖާބީ ފިލްމެއްގެ މަސައްކަތް ފަށަން ތައްޔާރުވަމުންނެވެ. މި ފަހަރު އޭނާ ކުޅޭ ފިލްމުގެ ނަމަކީ "ޕަތަންކޯޓް" އެވެ. މިއީ 2016 ގައި ޕަތަންކޯޓަށް ދިން ޓެރަރިސްޓް ހަމަލާ އަށް ބިނާކޮށް ހަދާ ފިލްމެކެވެ. ޖައިވީ ދަންޑާ ޑައިރެކްޓް ކުރާ ފިލްމާ ބެހޭ މާބޮޑު ތަފުސީލެއް އަދި ނުލިބެ އެވެ. އެހެންވެ ޒަރީންއާ އެކު ފިލްމުން ފެނިގެން ދާނެ އިތުރު ކާސްޓުންނަކީ ކޮބައި ކަމެއް އަދި ނޭނގެ އެވެ. އޭނާ ކުޅުނު ފުރަތަމަ ޕަންޖާބީ ފިލްމު "ޖަޓް ޖޭމްސް ބޮންޑް" ކުޅުނީ މަޝްހޫރު ޕަންޖާބީ އެކްޓަރު ގިއްޕީ ގަރެވްލާއާ އެކުގަ އެވެ.

ދަނޑުވެރިންގެ ލޯނުތަކެއް އަމީތާބް ދައްކައިފި

އިންޑިއާގެ ވަރަށް ގިނަ ދަނޑުވެރިންނަކީ މަސައްކަތަށް ނަގާ ލޯނު ނުދެއްކިގެން ވަރަށް ގިނައިން އަމިއްލަ ފުރާނަ ވެސް ދުއްވައިލާ ބައެކެވެ. މި މައްސަލަ އަށް ބިނާކޮށްގެން އާމިރު ހާން ވަނީ "ޕީޕްލީ ލައިވް" ގެ ނަމުގައި 2010 ގައި ފިލްމެއް ވެސް ގެނެސް ދީފަ އެވެ.

މަޝްހޫރު އެކްޓަރު އަމީތާބު ބައްޗަން މިހާރު މި ވަނީ އަތްމަތި ހުސްވެގެން ލޯނު ދެއްކޭނެ ގޮތެއް ނެތިފައި ތިބި ހާހަކަށް ވުރެ ގިނަ ދަނޑުވެރިންގެ ލޯނު ދައްކައިދީފަ އެވެ. އޭނާ ކުރި ޓްވީޓެއްގައި ބުނީ އުއްތަރް ޕްރަދޭޝްގެ 1،348 ދަނޑުވެރިއެއްގެ ލޯނު ދައްކައި ދީފައިވާ ކަމަށެވެ. އަމީތާބަކީ ކުރިން ވެސް މިފަދަ އިޖުތިމާއީ މައްސަލަތަކަށް މާލީ ގޮތުން އެހީތެރިކަން ފޯރުކޮށް ދެމުން އަންނަ ތަރިއެކެވެ.

އިންޑިއާގެ ދަނޑުވެރިންނަށް އެހީ ފޯރުކޮށްދޭ މަޝްހޫރު ތަރިންތަކުގެ ތެރޭގައި އާމިރު، އަކްޝޭ ކުމާރު، ޝާހްރުކް ހާން އަދި ނާނާ ޕަޓޭކަރު ފަދަ ތަރިން ހިމެނެ އެވެ.

"މިޝަން މަންގަލް" ގައި ޑިޝާއެއް ނޫޅޭނެ

މިހާރު ޝޫޓިން ފަށާފައިވާ އަކްޝޭ ކުމާރުގެ ޖައްވީ ފިލްމު "މިޝަން މަންގަލް"ގެ ރޯލެއް ބަތަލާ ޑިޝާ ޕަޓްނީ އަށް ހުށަހަޅާފައިވާ ކަމަށް ބުނާ ވާހަކަ އަކްޝޭ ދޮގުކޮށްފި އެވެ.

އޭނާ ބުނީ ފިލްމުގެ އެއްވެސް ރޯލެއް ޑިޝާ އަށް ހުށަނާޅާ ކަމަށާއި އެކަމާ ދޭތެރޭ ސުވާލު ވެސް އުފައްދާނެ ޖާގައެއް ނެތް ކަމަށެވެ. ޖަގަން ޝަކުތީ ލިޔެ، ޑައިރެކްޓް ކުރާ "މިޝަން މަންގަލް"ގެ މައިގަނޑު ކާސްޓުންނަކީ އަކްޝޭ، ވިދިޔާ ބާލަން، ސޮނާކްޝީ ސިންހާ، ޝަރުމަން ޖޯޝީ، ކިރިތީ ކުލްހާރީ، ނިތިޔާ މެނެން އަދި ސަންޖޭ ކަޕޫރެވެ.

އިންޑިއާ އިން މާސް ދާން ކުރިއަށް ގެންދާ މިޝަން މަންގަލިޔާން އަށް ބިނާކޮށް ހަދާ މި ފިލްމު ސިނަމާތަކަށް އަންނާނީ އޮގަސްޓް، 15، 2019 ގަ އެވެ.

ޑިޝާގެ އެންމެ ފަހުގެ ފިލްމަކީ މި އަހަރު ރިލީޒްކޮށް، ބޮކްސް އޮފީހުގައި ބޮޑު ކާމިޔާބީއެއް ހޯދި "ބާގީ 2" އެވެ. އެ ފިލްމުގެ ބަތަލަކީ އޭނާގެ ލޯބިވެރިޔާ ޓައިގާ ޝްރޮފް އެވެ. ޑިޝާ މިހާރު އަންނަނީ ސަލްމާންގެ "ބާރަތު" ގެ މަސައްކަތް ކުރަމުންނެވެ.

އަޖޭ އާއި ކާޖޮލްގެ އެޕިސޯޑް މަޖާ ވާނެ

ކާޖޮލްއަކީ ބޮލީވުޑްގެ ބަތަލާއިންގެ ތެރެއިން އެންމެ މަޖާ ކަމަށް ފާހަގަކޮށްލެވޭ އެއް ބަތަލާ އެވެ. ސްޓާ ވޯލްޑް އިން މިހާރު ގެނެސްދޭ ކަރަން ޖޯހަރުގެ ޗެޓް ޝޯ "ކޮފީ ވިތު ކަރަން" ގެ ހަ ވަނަ ސީޒަނުގައި ކާޖޮލް މި ފަހަރު ބައިވެރި ވަނީ ފިިރިމީހާ އަޖޭ ދޭވްގަންއާ އެކީގަ އެވެ.

އެ އެޕިސޯޑްގެ ޕްރޮމޯއެއް މިހާރު ބެލުންތެރިންނަށް ދައްކާލައިފައިވާ އިރު ދެމަފިރިންގެ ގޮތުގައި ކާޖޮލް އާއި އަޖޭއާ ދެމެދު މުއަމަލާތް ހިނގާ ގޮތްތައް މި ފަހަރު ފެނިގެން ދާނެ އެވެ.

ޔަގީނުން ވެސް މި އެޕިސޯޑް ވަރަށް ވަރަށް މަޖާވާނެ އެވެ. ވަކިން ހާއްސަކޮށް ކާޖޮލްގެ އަޑުގަދަ ކަމާއި އަޖޭގެ ކިބައިގައި ހުންނަ ސީރިއަސްކަމާ އެކު، އެ ހުންނަ ލާނެއްކަން މި ފަހަރު ބެލުންތެރިން ވަރަށް ގަޔާވާ ގޮތަކަށް ކަރަން ގެނެސް ދޭނެ އެވެ.

އިންތިޒާރުކޮށްލަން ޖެހެނީ އަންނަ އާދީއްތަ ދުވަހުގެ ރެއަށެވެ.

"ސާރޭ ޖަހާނ ސެ އައްޗާ" ގެ ޝޫޓިން ފެބުއަރީގައި

އިންޑިއާގެ ކުރީގެ އެސްޓްރޮނޯޓް ރާކޭޝް ޝަރްމާގެ ބައޮގްރަފިކަލް ޑްރާމާ "ސާރޭ ޖަހާނ ސެ އައްޗާ" ގެ ޝޫޓިން އަންނަ ފެބްރުއަރީ މަހުގެ ތެރޭގައި ފަށަން ނިންމައިފި އެވެ.

އެކަން ފިލްމުގެ ސްކްރިޕްޓް ލިޔުނު އަންޖުމް ރާޖަބަލީ ކަށަވަރުކޮށް ދީފައިވާ އިރު، މި ފިލްމުގެ ޑައިރެކްޓަރަކީ މަހޭޝް މަތާއީ އެވެ.

ޝާހްރުކް ހާން، ރާކޭޝްގެ ރޯލް ކުޅޭ ފިލްމުގެ ޕްރޮޑިއުސަރުންނަކީ ރޯނީ ސްކްރޫވާލާ އާއި ސިދާތު ރޯއި ކަޕޫރެވެ. ރިޕޯޓްތައް ބުނާ ގޮތުން "ސާރޭ ޖަހާ ސެ އައްޗާ" ގައި ޝާހްރުކްއާ އެކު ބަތަލާގެ ރޯލް ކުޅޭނީ "ޓޮއިލެޓް: އޭކް ޕްރޭމް ޚަތާ" ފަދަ ފިލްމުތައް ކުޅެފައިވާ ޒުވާން ބަތަލާ ބޫމީ ޕެޑްނޭކަރް އެވެ.

މި ފިލްމު ރިލީޒް ކުރާނެ ތާރީހެއް އަދި އިއުލާނެއް ނުކުރެ އެވެ. ޝާހްރުކް ދެން އެންމެ އަވަހަށް ފެނިގެން ދާނީ އަންނަ މަހުގެ 21 ގައި ރިލީޒް ކުރާ "ޒީރޯ" އިންނެވެ.

"ސާރޭ ޖަހާ ސެ އައްޗާ" އަކީ އެންމެ ފުރަތަމަ އާމިރު ހާނަށް ހުށަހެޅި ފިލްމެކެވެ. އަދި ފިލްމު އުފައްދާ ޓީމުން ޝާހްރުކަށް ފިލްމު ހުށަހެޅީ އާމިރުގެ އެދުމުގެ މަތިންނެވެ. އެހެންވެ އާމިރު ވަނީ ޝާހްރުކަށް ފިލްމުގެ ސްކްރިޕްޓް ކަމުގޮސް، ފިލްމަށް އެއްބަސްވެފައިވާތީ އެކަމަށް ޝުކުރު އަދާކޮށްފަ އެވެ.