އެކްޓް ކުރެވޭކަން ސާބިތުކޮށް ދޭން ބޭނުންވޭ: ސާރާ އަލީ ހާން

ސައިފް އަލީ ހާންގެ ދޮށީ އަންހެން ދަރިފުޅު ސާރާ އަލީ ހާންގެ ފުރަތަމަ ފިލްމު "ކެދަރުނާތު" އަންނަ މަހުގެ 7 ގައި ސިނަމާތަކަށް އަންނާނެ އެވެ. އޭގެ ފަހުން ޑިސެމްބަރު 28 ގައި އޭނާގެ ދެވަނަ ފިލްމު "ސިމްބާ" ރިލީޒް ކުރާނެ އެވެ.

އެހެންވެ ސާރާ މިހާރު ހުރީ ބެލުންތެރިން އޭނާގެ އެކްޓިންއާ ދޭތެރޭ ބުނާނެ އެއްޗެއްގެ އިންތިޒާރުގަ އެވެ. އަނެއްކޮޅުން ސާރާގެ އެކްޓިން ތަޖުރިބާކޮށްލަން ކެތްތެރިކަން ކުޑަވެފައި ތިބި މީހުންނަށް ވެސް އޭނާގެ ގެ ފިލްމުތައް ވަރަށް ހާއްސަ ވާނެ އެވެ. ފާހަގަކުރެވޭ ކަމަކީ "ކެދަރުނާތު" ގެ ޓްރެއިލާ އަށް ގިނަ ބަޔަކު ތައުރީފު ވެސް ކޮށްފައިވާ ކަމެވެ. އަދި ސާރާ ފެންނަފެނުމަށް ވަރަށް މޮޅު ވާނެ ކަމަށް ވެސް ގިނަ ބަޔަކު ބުނެފައިވެ އެވެ.

އުމުރުން 24 އަހަރުގެ މި ބަތަލާ ބޮލީވުޑްގެ ދަތުރު ފަށައި ގަންނަ އިރު، އޭނާ ހުރީ ބެލުންތެރިން ބަލައި ގަންނާނެ ބަތަލާއަކަށް ވާނެ ކަމުގެ އުންމީދުގަ އެވެ. ސާރާ ބުނި ގޮތުގައި އޭނާއަކީ އެކްޓް ކުރެވޭ މީހެއްކަން ދައްކާލައި، ބޮލީވުޑްގެ އެންމެ ވަރުގަދަ ޑައިރެކްޓަރުންގެ ފިލްމުތަކުން ފުރުސަތު ލިބޭނެ ކަމުގެ ހުވަފެނަކީ ކުލަ ޖައްސަން ބޭނުންވާ ކަމެކެވެ.

އެގޮތުން ސަންޖޭ ލީލާ ބަންސާލީ އާއި އިމްތިއާޒު އަލީ އާއި ޑޭވިޑް ދަވަން ފަދަ ކާމިޔާބު ޑައިރެކްޓަރުންގެ ފިލްމުތަކުގައި މަސައްކަތްކޮށްލަން ސާރާ ހުރީ ކެތްމަދުވެފަ އެވެ.

"އަހަރެން ސާބިތުކޮށް ދޭން ބޭނުންވާ އެއް ކަމަކީ އެ ޑައިރެކްޓަރުންގެ ފިލްމުތަކުގައި އެކްޓްކޮށްލެވޭ ފެންވަރު އަހަރެންގެ ހުރިކަން ދައްކުވައި ދިނުން،" ސައިފާއި ކުރީގެ ބަތަލާ އަމްރިތާގެ ސިންގްގެ ދަރިފުޅު ބުންޏެވެ.

ސާރާ ބުނި ގޮތުގައި ކެރިއަރުގެ ފުރަތަމަ ދެ ފިލްމުގައި ވެސް ހުނަރުވެރި ދެ ޑައިރެކްޓަރަކާ އެކު އެއްކޮށް މަސައްކަތްކޮށްލަން ލިބުމަކީ ވަރަށް ބޮޑު ނަސީބެކެވެ. އެގޮތުން "ކެދަރުނާތު" ގެ ޑައިރެކްޓަރު އަބީޝެކް ކަޕޫރާއި "ސިމްބާ" ގެ ޑައިރެކްޓަރު ރޯހިތު ޝެޓީ ބޭނުންވި ފެންވަރަށް ފިލްމުގައި އެކްޓްކޮށްލެވުނު ކަމަށް ގަބޫލު ކުރާ ކަމަށް ބުންޏެވެ.

"އަހަރެން ވަރަށް އުފާވޭ ވަރަށް ތަފާތު ދެ ޖޯންރާއެއްގެ ދެ ފިލްމުގައި މަސައްކަތްކޮށްލަން ފުރަތަމަ ވެސް ލިބުނީމަ. މިއީ ވަރަށް ގިނަ އެއްޗެހި ދަސްވި، ވަރަށް އުފާވެރި ތަޖުރިބާތަކެއް،" އޭނާ ބުންޏެވެ.

"ރޯހިތާއި އަބީޝެކްއަކީ ވަތަށް ތަފާތު ދެ ސްޓައިލްގެ ދެ ޑައިރެކްޓަރުން."

ރިޕޯޓްތައް ބުނާ ގޮތުން ފުރަތަމަ ފިލްމު އަދި ރިލީޒް ނުވަނީސް އިތުރު ތިން ފިލްމަކުން ސާރާ އަށް ވަނީ ފުރުސަތު ލިބިފަ އެވެ. އެއީ އިމްތިއާޒު އަންނަ އަހަރު ހަދަން ނިންމާފައިވާ ފިލްމާއި ޑޭވިޑްގެ ކުރިއަށް އޮތް ފިލްމުގެ އިތުރުން އިރުފާން ހާންގެ "ހިންދީ މީޑިއަމް" ގެ ދެވަނަ ބައެވެ.