ގޯޕީ ބަހޫގެ ރޯލް ކުޅުނު ބަތަލާ ހައްޔަރުކޮށްފި

ސްޓާ ޕްލަސް އިން ގެނެސް ދިން ޓީވީ ސިލްސިލާ "ސާތު ނިބާނާ ސާތިޔާ" ގައި ގޯޕީ ބަހޫގެ ރޯލް ކުޅެގެން ބޮޑު މަޝްހޫރު ކަމެއް ހޯދި ޓީވީ ބަތަލާ ދެވޮލީނާ ބަޓަޗަރުޖީ ހޮނިހިރު ދުވަހު ހައްޔަރުކޮށްފި އެވެ.

އިންޑިއާގެ މީޑިއާތަކުން ބުނި ގޮތުގައި 28 އަހަރުގެ ބަތަލާ ހައްޔަރު ކުރީ ރާޖޭޝްވަރު އުދާނީ ކިޔާ ވިޔަފާވެރިއެއްގެ މަރުގެ މައްސަލައިގެ ތަހުގީގުގެ ތެރޭގައި، އޭނާގެ ކޯލް ރިކޯޑްތައް ޗެކްކުރި އިރު، އޭގެ ތެރޭގައި ދެވޮލީނާގެ ނަން ވެސް ހިމެނިފައިވާތީ އެވެ. އެހެންވެ ތަހުގީގަށް އޭނާ ހައްޔަރު ކުރީ ރާޖޭޝްވަރުއާ ކުރެވުނު މުއާމަލާތްތަކާ ބެހޭ ގޮތުން ސުވާލު ކުރުމަށްޓަކަ އެވެ.

މި މަރާ ގުޅިގެން ދެވޮލީނާގެ އިތުރުން ވެސް ބަޔަކު ވަނީ ހައްޔަރުކޮށްފަ އެވެ. އޭގެ ތެރޭގައި މަހަރާޝްތުރާ ސްޓޭޓްގެ ހައުސިން ޑިޕާޓްމަންޓްގެ ސްޓޭޓް މިނިސްޓަރުގެ މަގާމުގައި ހުންނެވި ޕްރަކާޝް މެހެތާގެ އެހީތެރިއެއްގެ ގޮތުގައި ކުރިން މަސައްކަތްކޮށްފައިވާ ސަޗިން ޕަވަރު ހިމެނެ އެވެ.

ފުލުހުން ބުނި ގޮތުގައި ރާޖޭޝްވަރު، 57، މަރުވެފައި އޮއްވައި ފެނުނީ މިދިޔަ މަހުގެ 29 ގައި އޭނާ ގެއިން ދިޔަ ގޮތަށް އެނބުރި ނައިސް، ފަހުން ފޯނުން ވެސް ނުގުޅޭތީ އެ މައްސަލަ މި މަހުގެ 4 ވަނަ ދުވަހު އާއިލާ އިން ފުލުހުންނަށް ރިޕޯޓްކޮށް ހޯދަމުން ދަނިކޮށް މި މަހުގެ 5 ވަނަ ދުވަހު އެވެ.

ރާޖޭޝްވަރުގެ ހަށިގަނޑު ފެނިފައި ވަނީ ޕޭންވެލްގެ ރައިގާޑް ޑިސްޓްރިކްޓުގެ ވަލުތެރެއިންނެވެ. ނަމަވެސް ހަށިގަނޑުގައި އެއްވެސް ޒަހަމެއް ނެތް ކަމަށް ފުލުހުން ބުންޏެވެ.

މިކަމާ ބެހޭ ގޮތުން ރާޖޭޝްވަރީގެ ޑްރައިވަރު ބުނެފައި ވަނީ ޕަންޓަނަގަރު އަށް އޭނާ ގެންގޮސް ދޭން އެދުމުން ޕަންޓަނަގަރު މާކެޓަށް ދިޔުމާ އެކު ރާޖޭޝްވަރު ކާރުން ފައިބައިގެން އެހެން ވެހިކަލަކަށް އަރައިގެން ދިޔައީ ކަމަށެވެ. އަދި އޭގެ ފަހުން ހަބަރެއް ނުވާ ކަމަށް ވެސް ޑްރައިވަރު ބުންޏެވެ.

މި ހާދިސާ ސީރިއަސް މައްސަލައެއްގެ ގޮތުގައި ފުލުހުން ތަހުގީގު ކުުރަމުން އަންނަ އިރު، ރާޖޭޝްވަރުގެ ކޯލް ރިކޯޑްތަކުން ދައްކާ ގޮތުގައި އޭނާ ގިނަ އަންހެނުންތަކަކާ މުއާމަލާތްކޮށްފައިވާކަން އެނގެ އެވެ.

އެގޮތުން ސަޗިން މެދުވެރިކޮށް، މުނިފޫހިފިލުވުމުގެ ދާއިރާގައި މަސައްކަތް ކުރާ ގިނަ އަންހެނުންތަކަކާ އޭނާ ގުޅުން ބާއްވަމުން ދިޔަކަން މިހާތަނަށް އެނގިފައިވާ ކަމަށް ފުލުހުން ބުންޏެވެ. އަދި ރާޖޭޝްވަރުގެ މަރަކީ ބަޔަކު އޭނާ ކިޑްނެޕް ކުރުމަށް ފަހު ހިންގާފައިވާ ޖަރީމާއެއް ކަމަށް ބެލެވޭ ކަމަށް ފުލުހުން ބުންޏެވެ.