ރޯހިތު ޝެޓީގެ "ސިމްބާ" ވެސް ފްރެންޗައިޒަކަށް ވެދާނެ

ޑައިރެކްޓަރު ރޯހިތު ޝެޓީގެ އަތުގައި މިހާރު ވެސް ވަރަށް ކާމިޔާބު ދެ ފްރެންޗައިޒެއް އެބަ އޮތެވެ. އެއީ މިހާތަނަށް ހަތަރު ބައި ގެނެސް ދިން "ގޯލްމާލް" އާއި ދެ ބައި ގެނެސް ދީފައިވާ "ސިމްގަމް" އެވެ. ކުރިއަށް އޮތް ތަނުގައި މި ފިލްމުތަކުގެ އިތުރު ބައިތައް ބެލުންތެރިންނަށް ގެނެސް ދޭނެ އެވެ.

ހަމަމިއާ އެކު މިހާރު ވަނީ ރޯހިތުގެ އެންމެ ފަހުގެ ފިލްމު "ސިމްބާ" ވެސް ފްރެންޗައިޒަކަށް ވެދާނެ ކަމުގެ އިޝާރާތްތަކެއް ވެސް ދީފަ އެވެ. މި ފިލްމުގެ ޓްރެއިލާ ލޯންޗް ކުރަން ދާދި ފަހުން ބޭއްވި ހަފުލާގައި ޕްރޮޑިއުސަރު ކަރަން ޖޯހަރު ވެސް ވަނީ އެފަދަ އިޝާރާތެއް ދީފަ އެވެ.

މިކަމާ ބެހޭ ގޮތުން ވާހަކަ ދައްކަމުން ރޯހިތު ބުނި ގޮތުގައި ބެލުންތެރިންނަށް "ސިމްބާ" ކަމުގޮސްފި ނަމަ، އޭނާ ހުރީ ފިލްމުގެ އިތުރު ބައިތަކެއް ގެނެސް ދޭން ނިންމައިގެންނެވެ.

"ދެން ހިނގާ ވާ ގޮތެއް ބަލަމާ ދޯ؟" މި މަހުގެ 28 ގައި ރިލީޒް ކުރާ ފިލްމާ ބެހޭ ގޮތުން އޭނާ ބުންޏެވެ. "ބެލުންތެރިންނަށް "ސިމްބާ ކަމުގޮސްފި ނަމަ އަހަރެމެން މިތިބީ މީގެ ވާހަކަ އިތުރަށް ކުރިއަށް ގެންދަން ތައްޔާރަށް."

"ސިމްބާ" ގައި ލީޑް ރޯލް ކުޅެފައި ވަނީ ރަންވީރު ސިންގް އާއި ސާރާ އަލީ ހާނެވެ. މި ފިލްމުގެ ކާމިޔާބުވެއްޖެ ނަމަ އިތުރު ބައިތައް ހެދުމުގެ ވިސްނުން ހުރުމާ އެކު، މިކަންވެގެން ދާނީ ރަންވީރުގެ ފުރަތަމަ ފްރެންޗައިޒަށެވެ. "ސިމްބާ" ގައި އޭނާ ކުޅެފައި ވަނީ ވަރަށް ވަރުގަދަ ފުލުހެއްގެ ރޯލެވެ.

ރޯހިތު ބުނި ގޮތުގައި "ސިންގަމް" ގައި އަޖޭ ދޭވްގަން ކުޅުނު ފުލުސް ކެރެކްޓާ އާއި ރަންވީރުގެ ކެރެކްޓާގައި އެއްހޮތް ކަމެއް ހުއްޓަސް ދެ ފިލްމު ވަރަށް ތަފާތު ވާނެ އެވެ. އަދި "ސިމްބާ" ބެލުންތެރިން ގަޔާވާނެ ހުރިހާ ރަހައެއް އެކުލެވޭ ގޮތަށް ތައްޔާރުކޮށްފައިވާ "100 ޕަސެންޓް ރޯހިތު ޝެޓީ ސްޓައިލްގެ މަސާލާ ފިލްމެއް" ކަމަށް ބުންޏެވެ.

"ފިލްމަށް އަހަރެމެން ވަރަށް މަސައްކަތްކޮށްފައި ހުންނާނެ. އަހަންނަށް ވަރަށް ޔަގީން ރަންވީރު ދެކެ ބެލުންތެރިން ވަރަށް ލޯބި ވާނެ މި ފިލްމު ބަލާފައި،" އެކްޝަނާއި ކޮމެޑީ އާއި ލޯބި މަސްހުނިކޮށްގެން ފިލްމު ގެނެސްދޭން ކުޅަދާނަ ޑައިރެކްޓަރު ބުންޏެވެ.

އަނެއްކޮޅުން ރޯހިތު ފާހަގަ ކުރެވެނީ ޑައިރެކްޓް ކުރާ ކޮންމެ ފިލްމެއް 100 ކްރޯޑް ކުލަބުން ޖާގަ ހޯދާ ޑައިރެކްޓަރެއްގެ ގޮތުގަ އެވެ. މިހާތަނަށް 100 ކްރޯޑަށް ވުރެ ބޮޑު އާމްދަނީއެއް ހޯދި ފިލްމުތައް އެންމެ ގިނަ ޑައިރެކްޓަރަކީ ވެސް އޭނަ އެވެ. އެ އަދަދު 7 އަށް އަރަ އެވެ.

ރޯހިތު އެންމެ ފަހުން ބެލުންތެރިންނަށް ގެނެސް ދިނީ މިދިޔަ އަހަރު ބޮކްސް އޮފީހުގައި 311.05 ކްރޯޑް ރުޕީސްގެ އާމްދަނީއެއް ހޯދި "ގޯލްމާލް އެގެއިން" އެވެ.