މާލެ/ހުޅުމާލެ ބަސް ދަތުރަކަށް ކުރިން ނަގަން ނިންމީ ހަތް ރުފިޔާ: ހަލީމް

މާލެ، ހުޅުލެ އަދި ހުޅުމާލެއާ ދެމެދު ކުރާ ބަސް ދަތުރަކަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހަތް ރުފިޔާ ނަގަން ކުރިން ނިންމި ނަމަވެސް، އެއަށް ވުރެ ކުޑަ އަގެއް ނަގަން ކުރީގެ ރައީސް އަބްދުﷲ ޔާމީން ބޭނުންފުޅުވި ކަމަށް އެ ކުންފުނީގެ ކުރީގެ ސީއީއޯ އަބްދުލްރައްޒާގް ހަލީމް ވިދާޅުވެއްޖެ އެވެ.

މާލެ އާއި ހުޅުލެ ގުޅުވައިލުމަށް ހެދި ސިނަމާލެ ބްރިޖުގެ ދަތުރުތައް ފެށި ފަހުން މިހާތަނަށް ހަތަރު މަސް ދުވަސް ވީއިރު، އެމްޕީއެލް އިން ބަހުގެ ޚިދުމަތް ދެނީ ހިލެ އެވެ. އެކަމަކު އެ ކުންފުނިން ކޮށްފައިވާ އިއުލާނުގައިވާ ގޮތުން އަންނަ މަހުގެ އެކަކުން ފެށިގެން ބަސް ދަތުރުތަކަށް އަގު ނަގާނެ އެވެ.

އެގޮތުން މާލެ-ހުޅުމާލެ، މާލެ-އެއާޕޯޓު، ހުޅުމާލެ-އެއާޕޯޓަށް އެމްޕީއެލްގެ ބަހުގައި ދަތުރު ކުރާނަމަ، ނެގުމަށް ހަމަޖެހިފައި ވަނީ ކޮންމެ މީހެއްގެ އަތުން 10ރ. އެވެ. ބަހުގެ ޚިދުމަތުން އަގު ނަގާނީ އެ ކުންފުނިން އެކަމަށް ތައްޔާރުކޮށްފައިވާ "ޓަޗްލިންކް" ކާޑުންނެވެ. ކާޑެއްގެ އަގަކީ 20ރ. އެވެ.

ނަމަވެސް، ހަލީމް ރޭ ކުރެއްވި ޓުވީޓެއްގައި ވިދާޅުވީ ރައީސް ޔާމީން ބޭނުންފުޅުވީ، ބަސް ދަތުރުތަކަށް ކޮންމެ މީހެއްގެ އަތުން ދެ ރުފިޔާ ނެގުމަށް ކަމަށެވެ. އެކަމަކު، އެމްޕީއެލް އިން 10ރ. ނަގަން ނިންމާފައި އޮއްވައި، ފަހުން ހަތް ރުފިޔާ އަށް ބަދަލު ކުރަން ނިންމި ކަމަށް ވެސް ހަލީމް ވިދާޅުވި އެވެ.

ހަލީމް ކުރެއްވި ޓުވީޓުގެ ތަފްސީލް ދެއްވައި، އޭނާ "މިހާރު" އަށް ވިދާޅުވީ ބަސް ދަތުރަކަށް ދެ ރުފިޔާ ނެގުމަށް ރައީސް ޔާމީން އެންގެވުމުން، އެގޮތަށް ހަމަނުޖެހުނީ އެމްޕީއެލްގެ ފީޒިބިލިއަޓީ އަށް ބަލާއިރު، އެ އަގު ކުޑަވުމުން ކަމަށެވެ. އޭރު އެމްޕީއެލް އިން ގިނަ އަދަދެއްގެ ބަސްތަކެއް ރާއްޖެ ގެނެސް، ބޮޑު އިންވެސްޓްމަންޓަކަށް ތައްޔާރުވެފައި އޮތް ކަން ހަލީމް ފާހަގަ ކުރެއްވި އެވެ.

އޭނާ ވިދާޅުވި ގޮތުގައި، އެންމެ ފުރަތަމަ އެމްޕީއެލުން ނިންމީ ބަސް ދަތުރަކަށް 10ރ. ނެގުމަށެވެ. ބަސް ދަތުރުގެ އަގު ރައީސް އޮފީހަށް ފޮނުވީމަ، ބްރިޖު ކޮމިޓީން އެ އަގު ދިރާސާކޮށް ބެލި ކަމަށް ހަލީމް ވިދާޅުވި އެވެ. ނަމަވެސް، އެ އަގު ނަގަން ޔާމީން ދެކޮޅު ހެއްދެވި ކަމަށް ހަލީމް ވިދާޅުވި އެވެ.

"ބަހުގެ ދަތުރުތަކަކީ ޕަބްލިކް ޓްރާންސްޕޯޓަކަށް ވީމަ، ޔާމީން ބޭނުންފުޅުވީ އެހެން ދަތުރުފަތުރުތަކަށް ބަލާފައި އެ އަގު ވީހާވެސް ކުޑަކުރަން،" ހަލީމް ވިދާޅުވި އެވެ.

އޭގެ ފަހުން، އެމްޕީއެލްގައި މަޝްވަރާ ކުރުމަށް ފަހު، ބަސް ދަތުރަކަށް ހަތް ރުފިޔާ ނަގަން ނިންމި ނަމަވެސް، ރައީސް އޮފީހުގައި އެކަމަށް ގޮތެއް ނުނިމި އެކަން ހުއްޓިފައި އޮތީ ކަމަށް ހަލީމް ވިދާޅުވި އެވެ. ހަލީމް ވިދާޅުވި ގޮތުގައި، ހަތް ރުފިޔާ ނަގާ ނަމަ، ކުންފުންޏަށް ގެއްލުން ނުވެ ހިދުމަތް ދެވޭނެ އެވެ.

ހަލީމް ވިދާޅުވީ ބަސް ދަތުރަކަށް 10ރ. މިހާރު ނަގާނަމަ، އެމްޕީއެލް އަށް ފައިދާވާނެ ކަމަށެވެ. އަދި ހިދުމަތް ފުޅާ ދާއިރާއެއްގައި ދިނުމަށް އަގެއް ނަގަން ޖެހޭ ކަން ހަލީމް ވެސް ފާހަގަ ކުރެއްވި އެވެ.