ސައުދީ ވަލީ އަހުދުގެ ދަތުރަަށް ފަސް ޓްރަކުގެ ސާމާނު

އިސްލާމްއާބާދު (ފެބްރުއަރީ 12) - ސައުދީ ވަލީ އަހުދު މުހައްމަދު ބިން ސަލްމާން ޕާކިސްތާނަށް ކުރައްވާ ދަތުރުފުޅާ ދިމާކޮށް އެމަނިކުފާނުގެ އަމިއްލަ ބޭނުންތަކަށް ފަސް ޓްރަކުގެ ސާމާނު އެ ގައުމަށް އެތެރެކޮށްފި އެވެ.

ޕްރިންސް މުހައްމަދުގެ ދެ ދުވަހުގެ ދަތުރުގައި ޕާކިސްތާން ސަރުކާރާ އެކު އެތައް ބިލިއަން އިންވެސްޓްމަންޓް އެއްބަސްވުންތަކުގައި ސޮއިކުރާނެ އެވެ. ސައުދީގެ ބާރުގަދަ ވަލީ އަހުދުގެ ދަތުރާ ބެހޭ މައުލޫމާތު، ސަލާމަތީ ސަބަބުތަކަށްޓަކައި ވަނީ ސިއްރުކޮށްފަ އެވެ.

ޕާކިސްތާނަށް އެތެރެކުރި މުހައްމަދު ބިން ސަލްމާންގެ އަމިއްލަ ސާމާނުގެ ތެރޭގައި ކަސްރަތު ކުރަން ބޭނުންކުރާ އިކުއިޕްމަންޓާއި ފަރުނީޗަރު ހިމެނެ އެވެ. ބިން ސަލްމާންގެ އަމިއްލަ ސާމާނުގެ ގޮތުގައި ފަސް ޓްރަކުގެ މުދާ ޕާކިސްތާނަށް ގެންދިޔަ ކަމަށް އެ ގައުމުގައި ހުންނަ ސައުދީ އެމްބަސީން ވެސް ވަނީ ޔަގީންކޮށްދީފަ އެވެ.

މުހައްމަދު ވަޑައިގަތުމުގެ ކުރިން އޭނާގެ ސެކިއުރިޓީ ޓީމާއި ސައުދީ މީޑިއާ ޓީމު ވެސް ވަނީ ޕާކިސްތާނަށް ގޮހެވެ. މިއީ ވަލީ އަހުދުކަން ލިބިވަޑައިގެންނެވި ފަހުން މުހައްމަދު ޕާކިސްތާނަށް ވަޑައިގަންނަވާ ފުރަތަމަ ފަހަރެވެ. މީގެ ކުރިން ވަނީ ޑިފެންސް މިނިސްޓަރަކަށް ހުންނެވި އިރު ޕާކިސްތާނަށް ވަޑައިގެންފަ އެވެ.

ވަލީ އަހުދު އިސްލާމްއާބާދުގައި ހުންނަވާނީ ޕްރައިމް މިނިސްޓަ ހައުސްގަ އެވެ. އެކަމަކު ޕްރިންސްގެ ވަފުދުގެ ބޭފުޅުން ތިއްބެވުމަށް އިސްލާމްއާބާދުގެ އެންމެ މަޝްހޫރު ދެ ހޮޓާ އެކުގައި ވަނީ ބުކްކޮށްފަ އެވެ. އަދި އިތުރު ދެ ހޮޓަލެއްގެ ބޮޑު ބައެއް ވެސް ވަނީ ބުކްކޮށްފަ އެވެ.