އިންސްޓަގްރާމްގައި ފައިގެ ފޮޓޯ އެހާ ގިނައީ ކީއްވެ؟

ފޮޓޯ އާއި ވީޑިއޯ ޝެއާކުރުމަށް ހާއްސަ ސޯޝަލް ނެޓްވޯކް، އިންސްޓަގްރާމް ބޭނުންކުރާ މީހުންގެ ތެރޭގައި އެ މީހެެއްގެ ފައިގެ ފޮޓޯއެއް ޝެއާކޮށްނުލާ މީހަކު ވަރަށް މަދުވާނެ އެވެ. މިއީ އިންސްޓަގްރާމް ބޭނުންކުރާ މީހުންގެ މެދުގައި އޮތް ޓްރެންޑެކެވެ. ކީއްވެހެއްޔެވެ؟

އިންސްޓަގްރާމްގައި myfeet# އަދި footphotography# ސާޗްކޮށްލުމުން އެތައް ހާސް ބައެއްގެ ފައި ފެންނާނެ އެވެ. ފައިގެ ފޮޓޯ އަށް ހާއްސަ fromwhereistand އެކައުންޓް ފޮލޯކުރާ 39000 އަށް ވުރެ ގިނަ މީހުން އިންސްޓަގްރާމްގައި އުޅެ އެވެ. އަދި ފައިގެ ފޮޓޯ ނަގާ މީހުންގެ ތެރެއިން ދޮޅު މިލިއަން މީހުން މި އެކައުންޓްގެ ހޭޝްޓެގް ބޭނުންކުރެ އެވެ.

ފައިގެ ފޮޓޯ ނަގާފައި ހުއްޓަސް ގިނަ ފަހަރަށް އެއީ ފަޔަށް އަމާޒުކޮށް ނަގާފައި ހުންނަ ފޮޓޯއެއް ނޫނެވެ. ދައްކަން ބޭނުންވަނީ އެ މީހަކު އެ ހުރި ތަނެކެވެ. ފައި ބޭނުންކޮށްފައި ހުންނަނީ އެ މީހަކު ހުރި ތަން ދައްކާލުމަށް ބޭނުންކުރާ "ތީރެއް"ގެ ގޮތުގަ އެވެ. ބައެއް މީހުން ތަންތަނަށް ގޮސް މޫނު ފެންނަ ގޮތަށް ސެލްފީ ނަގާއިރު އަނެއްބަޔަކު މޫނު ނުދައްކައި ފައި ހާއްސަކުރަނީ އެވެ.

އެކަމަކު ފައިގެ ބައެއް ފޮޓޯ އަކީ ހަމަ ސީދާ ފަޔަށް ކުރާ ފޯކަސް އެވެ.

މި ވާހަކަ ނިންމާލަން ޖެެހެނީ އިންސްޓަގްރާމް އުފެއްދި ކެވިން ސިސްޓްރޮމް 2010 ވަނަ އަހަރު އިންސްޓަގްރާމްގައި އެންމެ ފުރަތަމަ ޝެއާކުރި ފޮޓޯގެ ވާހަކައިންނެވެ. އެއީ އޭނާ ގެންގުޅޭ ކުއްތާގެ ކައިރީގައި ހުރެ، އޭނާގެ ފައި ފެންނަ ގޮތަށް ނަގާފައިވާ ފޮޓޯއެކެވެ.