ބިދޭސީން ވަޒީފާ އަދާކުރަން ދޭ ހުއްދަ ދެ ދުވަހުން ދޫކުރަނީ

ރާއްޖޭގައި ވަޒީފާ އަދާކުރުމަށް އަލަށް ގެންނަ ބިދޭސީންނަށް ދޫކުރާ ހުއްދަ ނުވަތަ އެމްޕްލޯއިމަންޓް އެޕްރޫވަލްއަށް އެދި ހުށަހެޅުމުން، ދެ ދުވަހުގެ ތެރޭގައި އެ ހުއްދަ ދޫކުރުމަށް އިމިގްރޭޝަނުން ނިންމައިފި އެވެ.

މީގެ ކުރިން މި ހުއްދަ ދެނީ ދެ ހަފުތާގެ ތެރޭގަ އެވެ. އެކަމަކު ހުށަހަޅަން ޖެހޭ ހުރިހާ ލިޔެކިޔުމެއް ހަމަވާނަމަ، ދެ ދުވަސް ތެރޭގައި ހުއްދަ ދޫކުރުމަށް މިއަދު ނިންމާފައިވާ ކަމަށް އިމިގްރޭޝަނުން ބުންޏެވެ.

އެ ތަނުން ބުނީ ލިޔެކިޔުންތައް ފުރިހަމަ ނުވި ނަމަވެސް، އެކަން ދެ ދުވަސްތެރޭގައި އެ ފަރާތަކަށް އަންގާނެ ކަމަށެވެ.

"މި ބަދަލު ގެނައީ އިމިގްރޭޝަނުން ދޭ ހިދުމަތްތައް ރައްޔިތުން ގަބޫލު ކުރާ ފެންވަރަކަށް ގެނައުމާއި ކަމާ ގުޅުން ހުރި މަސައްކަތް ކުރާ މީހުންނަށް ލުއި ފަސޭހަކޮށްދިނުމަށެވެ." އިމިގްރޭޝަނުން ނެރުނު ބަޔާނެއްގައި ބުނެފައި ވެ އެވެ.

އެތަނުން ވަނީ، ހުއްދައަށް އެދި ހުށަހަޅާއިރު ހުރިހާ ލިޔެކިޔުންތައް ހަމައަށް ގެނައުމަށް އިލްތިމާސް ކޮށްފަ އެވެ.