ވޯކްވިސާ ގަވައިދު އިސްލާހުކޮށް ގެޒެޓްކުރެވުނީ އޮޅުމަކުން: އިމިގްރޭޝަން

ރާއްޖޭގައި މަސައްކަތް ކުރުމަށް ބިދޭސީންނަށް ދޭ ހުއްދަ ހަމަވުމުން، އަލުން އެ އާކުރުމަށް 6،000 ރުފިޔާ ދައްކަން ނުޖެހޭ ގޮތަށް "ވޯކްވިސާ ގަވައިދު" އިސްލާހުކޮށް، ގެޒެޓް ކުރެވުނީ އޮޅިގެން ކަމަށާއި އެއީ އިކޮނޮމިކް މިނިސްޓްރީގެ މެންޑޭޓްގެ ތެރޭގައި ހިމެނޭ ކަމެއް ކަމަށް އިމިގްރޭޝަނުން ބުނެފި އެވެ.

ރާއްޖޭގައި ވަޒީފާ އަދާކުރަން އަންނަ ބިދޭސީންގެ "ވޯކްވިޒާ"އާ ބެހޭ ގަވައިދުގައި ބުނެފައިވާ ގޮތުން، ގަވައިދާ އެއްގޮތަށް ރާއްޖޭގައި މަސައްކަތްކުރާ ބިދޭސީންނަށް، އެ ހުއްދަ އަލުން ދިނުމުގެ އިހްތިޔާރު އިމިގްރޭޝަންގެ ކޮންޓްރޯލާ ޖެނެރަލަށް ލިބިގެންވެ އެވެ. އެކަމަކު އެއީ ވަޒީފާ ދޭ ފަރާތާއި ބިދޭސީ މީހާއާ ދެމެދު ވެފައިވާ އެއްބަސްވުމެއްގެ އިތުރުން، އިމިގްރޭޝަނަށް 6،000 ރުފިޔާ ދައްކައިގެންނެވެ.

އެކަމަކު އިއްޔެ ވޯކްވިޒާއާ ބެހޭ ގަވައިދުގެ 17 ވަނަ މާއްދާގެ (ވ) އިސްލާހުކޮށް، ބުނެފައިވަނީ ހުއްދަ އަލުން ހޯދުމަށް ހުށަހަޅަން ޖެހެނީ ވަޒީފާ ދޭ ފަރާތާއި ބިދޭސީ މީހާއާ ދެމެދު ވެފައިވާ އެއްބަސްވުން އެކަނި ކަމަށެވެ. ފައިސާ ދައްކާކަށް ނުޖެހެ އެވެ.

އެ އިސްލާހު ގެޒެޓުން މިއަދު ހެނދުނު ނަގާފައިވާއިރު އެކަމާ ގުޅޭގޮތުން އިމިގްރޭޝަނުން ބުނީ އެއީ ކުރިން އެތަނުން ގެންނަން ނިންމި ބަދަލެއް ނަމަވެސް، ބިދޭސީންނަށް ވަޒީފާގެ ހުއްދަ ދިނުން އިކޮނޮމިކް މިނިސްޓްރީ އަށް މިހާރު ބަދަލުކޮށްފައިވާތީ އެއީ މިހާރު އިމިގްރޭޝަންގެ މެންޑޭޓުގެ ތެރޭގައި ހިމެނޭ ކަމެއް ނޫން ކަމަށެވެ. އިސްލާހު ގެޒެޓްގައި އާއްމު ކުރެވުނީ އޮޅިގެން ކަމަށް އެތަނުން ބުންޏެވެ.

އިމިގްރޭޝަނުން ކުރިން ދެމުން އައި ބިދޭސީންގެ ހުރިހާ ހިދުމަތްތަކެއްހެން އިކޮނޮމިކް މިނިސްޓްރީގެ ދަށަށް ބަދަލު ކުރީ މިދިޔަ ހަފުތާގެ ތެރޭގަ އެވެ.

އިމިގްރޭޝަނުން ބުނީ ވަޒީފާގެ ހުއްދަ ދޭއިރު ފައިސާ ދައްކަން ނުޖެހޭ ގޮތަށް އިސްލާހު ގެންނަން އެތަނުން ނިންމީ ރާއްޖޭގައި ގަވައިދާ ހިލާފަށް އުޅޭ ބިދޭސީން، ގަވައިދަށް ފެއްތުމަށް ހިންގި ޕްރޮގްރާމުގައި ވީހާ ވެސް ގިނަ ބަޔަކު ބައިވެރިކުރުމުގެ ބޭނުމުގައި ކަމަށެވެ.

ބިދޭސީންނަށް ވަޒީފާގެ ހުއްދަ ދިނުން އިކޮނޮމިކް މިނިސްޓްރީ އަށް މިހާރު ބަދަލުކޮށްފައިވާއިރު، ގަވައިދާހިލާފަށް ކޯޓާ ހޯދައިގެން ބިދޭސީން އެތެރެކުރި 67 ފަރާތެއްގެ މައްސަލަ ބަލަމުން އަންނަ ކަމަށް އިމިގްރޭޝަނުން ވަނީ ބުނެފަ އެވެ.