އިންތިހާބީ ކޮރަޕްޝަން ހުއްޓުވަން އޭސީސީގެ ކެމްޕޭނެއް

އަންނަ ހޮނިހިރު ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި ވޯޓް ހޯދަން ހިންގަފާނެ ކޮރަޕްޝަންގެ އަމަލުތައް ހުއްޓުވުމަށް މީހުން ހޭލުންތެރި ކުރުމުގެ ސޯޝަލް މީޑިއާ ކެމްޕޭނެއް އެންޓިކޮރަޕްޝަން ކޮމިޝަން (އޭސީސީ) އިން ކުރިއަށް އެބަ ގެންދެ އެވެ.

މިދިޔަ މަހުގެ 26 އިން ފެށިގެން އޭސީސީން ކުރިއަށް ގެންދާ ކެމްޕޭންގައި މިއަދު ވަނީ އޭސީސީން ޓްވީޓްތަކެއް ކޮށް، އިންތިހާބީ ކޮރަޕްޝަނަށް ވާނެ ބައެއް ކަންކަން ކިޔައިދީފަ އެވެ. އެގޮތުން އިންތިހާބަށް ކެމްޕޭންކުރަން ކެންޑިޑޭޓުންނަށް ފައިސާ ބޭނުންކުރެވޭނީ ކިހިނެއްކަން ބުނެދީފައިވެ އެވެ.

"އިންތިހާބާ ގުޅިގެން ކެންޑިޑޭޓަކު ހަރަދުކުރުމަށް ޓަކައި ނުވަތަ ބޭނުންކުރުމަށްޓަކައި، ނަން ހާމަ ކުރަން ބޭނުން ނުވާ ފަރާތަކުން އެހީގެ ގޮތުގައި ދޭ ފައިސާ ނުވަތަ ތަކެތި އެއްވެސް ކެންޑިޑޭޓަކު ނުވަތަ އެ ކެންޑިޑޭޓުގެ ފަރާތުން އެހެން މީހަކު ވިޔަސް ބޭނުންކޮށްގެން ނުވާނެ އެވެ،" އޭސީސީގެ ޓްވީޓެއްގައިވެ އެވެ.

ސިޔާސީ ޕާޓީތަކަށް ދައުލަތުން ދޭ ފައިސާ ފިޔަވައި ދައުލަތުގެ ފައިސާ ކެމްޕޭނަށް ހަރަދުކޮށްގެން ނުވާނެ ކަމަށާއި ސަރުކާރު ހިއްސާވާ ކުންފުންޏެއްގެ ފައިސާ ބޭނުންކޮށްގެން ނުވާނެ ކަމަށް އެހެން މެސެޖުތަކެއްގައިވެ އެވެ.

މިފަހަރުގެ އިންތިހާބުގެ ކެމްޕޭންގައި ބައެއް ކެންޑިޑޭޓުން ރިޝްވަތު ދިން ކަމަށް ތުހުމަތުކުރި މައްސަލަތަކެއް އޭސީސީއަށް ކުރިން ހުށަހެޅި އެވެ. ނަމަވެސް އެފަދަ މައްސަލައެއްގައި ކެންޑިޑޭޓަކަށް ފިޔަވަޅެއް އަޅަން ޖެހޭ ކަން އޭސީސީގެ ތަހުގީގަށް ސާބިތެއް ނުވެ އެވެ.

އިއްޔެ އިލެކްޝަންސް ކޮމިޝަނުން ބޭއްވި ނޫސްކޮންފަރެންސްގައި އެ ކޮމިޝަންގެ ރައީސް އަހުމަދު ޝަރީފް ވިދާޅުވީ އެފަދަ ބައެއް ޝަކުވާތައް ލިބުނު ކަމަށާއި އެ މައްސަލަތައް އޭސީސީއަށް ހުށަހަޅަން އިރުޝާދު ދީފައިވާނެ ކަމަށެވެ.

އަންނަ ހޮނިހިރު ދުވަހު ބާއްވާ އިންތިހާބުގައި 87 ދާއިރާއަށް 300 އަށް ވުރެ ގިނަ ކެންޑިޑޭޓުން ވާދަ ކުރެ އެވެ. އީސީން އިއްޔެ ބުނީ އިންތިހާބަށް ވާން ޖެހޭ ތައްޔާރީ ތަކުގެ 99 ޕަސެންޓް މަސައްކަތް މިހާރު ނިމިފައިވާ ކަމަށެވެ.