ސައުދުގެ ބަންދު އަމުރުގެ އިސްތިއުނާފް ޝަރީއަތެއް ދެ އަހަރު ފަހުން ބާއްވަނީ

ރައްޔިތުންގެ މަޖިލިހުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައި ވަނިކޮށް، މަޖިލިހުގެ އިދާރާއަށް ވަނުމުން ހައްޔަރުކުރި ވިލިނގިލީ ދާއިރާގެ މެމްބަރު ސައުދު ހުސެންގެ ބަންދާ މެދު ގޮތެއް ނިންމުމަށް ހައިކޯޓަށް ހުށަހެޅި މައްސަލައިގެ އިސްތިއުނާފްގެ ޝަރީއަތަށް ހާޒިރުވާން، ދެ އަހަރު ފަހުން އޭނާއަށް ޗިޓު ފޮނުވައިފި އެވެ.

ސައުދު ހާޒިރުވާން އަމުރުކޮށްފައި ވަނީ މާދަމާ ހެނދުނު 9:40 އަށެވެ.

ސައުދާއެކު، މަޑުއްވަރީ ދާއިރާގެ މެމްބަރު މުހައްމަދު އަމީތާއި ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ލޯޔަރު ވައްޑެ) ވެސް އޭރު ހައްޔަރު ކުރި އެވެ. އެކަމަކު އެ ދެ މެމްބަރުން ވަނީ މައްސަލަ އަނބުރާ ނަންގަވާފަ އެވެ.

ސައުދު މިރޭ "މިހާރު"އަށް ވިދާޅުވީ އޭނާ ހައްޔަރުކޮށް، ކްރިމިނަލް ކޯޓުން ބަންދުގެ މުއްދަތު އިތުރުކުރި މައްސަލަ އިސްތިއުނާފް ކުރުމަށް އޭރު ހައި ކޯޓަށް ހުށަހެޅި ކަމަށެވެ. އެކަމަކު އޭނާ ވިދާޅުވީ ބަންދުން ދޫކޮށްލައި، ދެ އަހަރު ފަހުން އިސްތިއުނާފް މައްސަލައިގެ ޝަރީއަތް ކުރިއަށް ގެންދަން ނިމުމުން ރާއްޖޭގައި އިންސާފު ލިބެން ނެތް ކަން އަންގައިދޭ ކަމަށެވެ.

"އޭރު ވެސް ހައިކޯޓުގެ ފަނޑިޔާރުންނަށް އެނގޭ އަޅުގަނޑުމެން ހައްޔަރުކުރީ ގަވައިދާ ހިލާފަށްކަން. އެކަމަކު އެހެން ބުނަން ނުކެރިގެން މައްސަލަ ބާއްވާފައި އޮތީ،" ކުރިއަށް އޮތް މަޖިލީހުގެ ވެސް ވިލިނިލީ ދާއިރާގެ ގޮނޑިއަށް އިންތިޚާބުވެފައިވާ ސައުދު ވިދާޅުވި އެވެ

"މި ހުރިހާ ދުވަހު އަޅުގަނޑަށް އިންސާފު ނުލިބި މިއޮތީ. އެ މައްސަލަ ކުރިއަށް ގެންދަން ހައި ކޯޓުގެ ފަނޑިޔާރުން ނުކުޅެދިފައިވަނީ،"

މަޖިލީހަށް ވަންނަން އުޅެނިކޮށް ސައުދާއި އަމީތު ހައްޔަރުކޮށް ފުރަތަމަ ބަންދު ކުރީ 15 ދުވަހަށެވެ. އެ މުއްދަތު ހަމަވުމުން ފަހުން ވަނީ ހަތަރު ދުވަސް ބަންދަށް އިތުރުކޮށްފަ އެވެ. އަދި އެ މައްސަލައިގެ ތަހުގީގު މި ހަތަރު ދުވަސް ތެރޭގައި ނިންމައި ޕްރޮސެކިއުޓަ ޖެނެރަލްގެ އޮފީހަށް ފޮނުވުމަށް ވެސް ފަނޑިޔާރު އާދަމް އާރިފް އަމުރުކުރި ކަމަށް ވަކީލުން ވިދާޅުވެފައި ވެ އެވެ.