އިންޑިއާގެ ދިގު އިންތިޚާބު ނިމުމަކަށް

ނިއު ދިއްލީ (މެއި 19) - މިދިޔަ މަހު 11 ވަނަ ދުވަހު ފެށި އިންޑިއާގެ އާއްމު އިންތިޚާބުގެ ވޯޓުލުން މިއަދު ނިންމާލާނެ އެވެ.

އިންތިޚާބުގެ ހަތް ވަނަ އަދި ފަހު ބުރުގެ ވޯޓުލުން މިއަދު އެ ގައުމުގެ ގަޑިން ހަވީރު ހައެއް ޖަހާއިރު ނިމޭނެ އެވެ. ޕާލަމެންޓުގެ ދަށު ގޭގެ 543 މެންބަރުންގެ ތެރޭން 59 މެންބަރުން އިންތިޚާބު ކުރުމަށް އުތުރުގެ އަށް ސްޓޭޓްގައި ވޯޓުލާން ދިގު ކިޔޫތައް ހަދާފައިވާ އިރު ސަލާމަތީ ފިޔަވަޅުތައް ވެސް މިއަދު ވަނީ ވަރުގަދަކޮށްފަ އެވެ. ބޮޑު ވަޒީރު ނަރެންދުރަ މޯދީ ވާދަކުރައްވާ އުއްތަރަ ޕްރަދޭޝް ސްޓޭޓުގެ ވަރަނަސިގައި ވެސް މިއަދު ވޯޓުލާނެ އެވެ.

ވެރިކަން ކުރާ ބީޖޭޕީގެ މޯދީ އާއ އިދިކޮޅު ކޮންގްރެސް ޕާޓީގެ ރާހުލް ގާނދީ ވަނީ އިންތިޚާބަށް ވަރަށް ވަރުގަދަ ކެމްޕޭނެއް ކުރައްވައިފަ އެވެ. އުމުރުފުޅުން 68 އަހަރުގެ މޯދީ ވަނީ ކެމްޕޭނާ ގުޅޭ 142 އެއްވުން ބާއްވަވައިފަ އެވެ. ބައެއް ފަހަރު ދުވާލަކު ފަސް އެއްވުން ވެސް ބާއްވާފައިވެ އެވެ. ހަތަރު ރޯޑްޝޯ ބާއްވާފައިވެ އެވެ. މި އެއްވުންތަކުގައި ސީދާ ގޮތުން 15 މިލިއަން މީހުންނާ މުޚާތަބް ކުރައްވާފައިވެ އެވެ.

އުމުރުފުޅުން 48 އަހަރުގެ ރާހުލް ވަނީ މޯދީގެ ސަރުކާރުގައި ކޮރްޕަޝަން އޮތް ކަމަށް ބުނެ އެ މައްސަލަތައް ރައްޔިތުންނާ ހަމައަށް ގެނެސް ދެއްވައިފަ އެވެ.

އިންތިޚާބުގައި ވޯޓުލުމުގެ ހައްގު 900 މިލިއން މީހުންނަށް ލިބިގެންނެ އެވެ. ހަތް ބުރުގެ ހުރިހާ ވޯޓެއް ގުނާނީ ބުރާސްފަތި ދުވަހު އެވެ. ހަމަ އެ ދުވަހު ނަތީޖާ ވެސް އިއުލާން ކުރާނެ އެވެ. އެންމެ ފަހުން 2014 ވަނަ އަހަރު ބޭއްވި އިންތިޚާބުގައި ބީޖޭޕީން ވަނީ 282 ގޮނޑި ކާމިޔާބުކޮށްފަ އެވެ. ޕާލަމެންޓުގެ އަޣުލަބިއްޔަތު ހޯދަން ބޭނުން ވަނީ 272 ގޮނޑި އެވެ.