ކޮންސްޓްރަކްޝަން ސައިޓްތަކުގެ ފެން ހިންދުން ހަރުދަނާކުރަން އެމްޑަބްލިއުއެސްސީއަށް ބިމެއް ދީފި

މާލޭގެ ޑީވޯޓަރިން ނިޒާމު ހަރުދަނާ ކުރުމަށާއި ޕަމްޕް ސްޓޭޝަންތަކެއް ގާއިމު ކުރަން އިންޑަސްޓްރިއަލް ވިލެޖުން އެމްޑަބްލިއުއެސްސީއަށް ބިމެއް ދިނުމަށް ހައުސިން މިނިސްޓްރީން މިއަދު ނިންމައިފި އެވެ.

ހައުސިން މިނިސްޓްރީގައި ބޭއްވި ރަސްމިއްޔާތެއްގައި ޑީވޯޓަރިން ނިޒާމު ހަރުދަނާ ކުރުމަށާއި އިންޑަސްޓްރިއަލް ވިލެޖުން ބިމެއް ދިނުމުގެ ދެ އެއްބަސްވުމުގައި ސޮއިކުރި އެވެ. މިނިސްޓްރީގެ ފަރާތުން މިނިސްޓަރު ޑރ.މުހައްމަދު މުއިއްޒު ސޮއިކުރެއްވިއިރު، އެމްޑަބްލިއުއެސްސީން ސޮއިކުރެއްވީ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އެވެ.

ނޫސްވެރިންގެ ބައްދަލުވުމުގައި މުއިއްޒު ވިދާޅުވީ އެމްޑަބްލިއުއެސްސީން ހަރަދުކޮށްގެން ހިންގާ މި މަޝްރޫއުގެ ސަބަބުން މާލޭގެ ރައްޔިތުންނަށް ވަރަށް ބޮޑު ފަސޭހައެއް ލިބޭނެ ކަމަށެވެ. އަދި މިއީ ދައުލަތުން އެއްވެސް ހަރަދެއްކޮށްގެން ހިންގާ މަޝްރޫއެއް ނޫން ކަމަށް އޭނާ ވިދާޅުވި އެވެ.

ޑީ ވޯޓަރިން ނިޒާމަކީ ކޮންސްޓްރަކްޝަން ސައިޓުތަކުން ފެން ހިންދުމަށް ބޭނުން ކުރާ ނިޒާމެކެވެ. މާލޭގައި މިހާރު ޑީވޯޓަރިން ކުރަނީ މަގުތައް މަތިން ހޮޅިއަޅައިގެންނެވެ.

"ކޮންސްޓްރަކްޝަން މަސައްކަތް ކުރަމުން ޑީވޯޓާ ކުރާއިރު ހޮޅި ޕޭވްމަންޓް މަތިންނާއި މަގު ހުރަސްކޮށް އޮތުމުން އެކަމުގެ ދަތިކަން އާންމުންނަށް ކުރިމަތިވޭ. އެކަމުގެ ސަބަބުން އެކްސިޑެންޓް ދިމާވޭ. ޑީވޯޓަރިން ނިޒާމު ބިމުގެ އަޑިއަށް ދާނެ ގޮތަށް ހަމަޖެހިގެން މިދަނީ،" އޭނާ ވިދާޅުވި އެވެ.

މިނިސްޓަރު ވިދާޅުވި ގޮތުގައި މި މަޝްރޫއުގެ ދަށުން އައިޖީއެމްއެޗާއި ވެސްޓްޕާކް ދިމާލުގައި ހުރި ސީއައުޓް ފޯލްތައް އެ ހުރި ދިމާލުން ކެންސަލްކޮށް އިންޑަސްޓްރިއަލް ވިލެޖްގެ ތެރެއަށް ހޮޅި ޑައިވާޓް ކުރެވޭނެ އެވެ. އަދި މިއީ މާލޭގެ ރައްޔިތުންނަށް ލިބޭނެ ލުޔެއް ކަމަށް ވެސް އޭނާ ވިދާޅުވި އެވެ.

މި ރަސްމިއްޔާތުގައި ފަޒުލް ވިދާޅުވީ އިންޑަސްޓްރިއަލް ވިލެޖްގައި ގާއިމު ކުރާނީ ވަރުގަދަ ޕަމްޕް ސްޓޭޝަނެއް ކަމަށާއި އިންޑަސްޓްރިއަލް ވިލެޖަށް ތިން ޕަމްޕް ސްޓޭޝަނެއްގެ ޕައިޕް ރީލޮކޭޓް ކުރާނެ ކަމަށެވެ. އަދި މިކަމާ ބެހޭ ތަފްސީލު މައުލޫމާތު ފަހުން ހިއްސާ ކުރާނެ ކަމަށް އޭނާ ވިދާޅުވި އެވެ.

ފަޒުލް ވިދާޅުވީ މި މަސައްކަތް އަށް މަސް ދުވަހުގެ ތެރޭގައި ހަމައަކަށް އަޅުވަން މަސައްކަތް ކުރާނެ ކަމަށެވެ. ނަމަވެސް މިކަމަށް ދާ ހަރަދެއް މިނިސްޓްރީ އާއި އެމްޑަބްލިއުއެސްސީން ހާމައެއް ނުކުރެ އެވެ.

މާލޭގެ މަގުތައް އަލުން ރީޑިޒައިންކޮށް ހެދުމުގެ ބޮޑު މަޝްރޫއެއް ވަރަށް އަވަހަށް ފަށަން މިނިސްޓްރީން އަންނަނީ ތައްޔާރުވަމުންނެވެ. މި މަސައްކަތަށް ބޭނުންވާނެ މެޝިނަރީތައް މާލެ ގެނައުމުގެ މަސައްކަތް މިހާރު ކުރަމުން އަންނައިރު، އެ މަޝްރޫއުގެ ސަބަބުން މުޅި މާލޭގެ މަގުތަކަށް ބޮޑެތި ބަދަލުތަކެއް އަންނާނެ ކަމަށް ބެލެވެ އެވެ.