ކްރިސްޓޯފާ ނޯލާންގެ ފިލްމަށް ބޮލީވުޑްގެ ބަތަލާ ޑިމްޕަލް ސޮއިކޮށްފި

ހޮލީވުޑްގެ މަޝްހޫރު ޑައިރެކްޓަރު ކްރިސްޓޯފާ ނޯލާންގެ އާ ފިލްމަށް ބޮލީވުޑްގެ ބަތަލާ ޑިމްޕަލް ކަޕާޑިއާ ސޮއިކޮށްފި އެވެ.

މިއީ ހޮލީވުޑްގެ ފިލްމަކަށް 61 އަހަރުގެ ބަތަލާ ސޮއިކުރި ފުރަތަމަ ފަހަރެވެ.

ވެރައިޓީން ބުނި ގޮތުގައި 2017 ވަނަ އަހަރު "ޑަންކާކް" ގެނެސް ދިން ނޯލާންގެ އާ ފިލްމަކީ ވަރަށް ވަރުގަދަ އެކްޝަން ހާދިސާތަކަކަށް ބިނާކޮށް ހަދާ ފިލްމެކެވެ. އަދި ހަތް ގައުމެއްގައި ޝޫޓްކުރާ ފިލްމުގެ ނަމަކީ "ޓެނެޓް" ކަމަށް ވެސް އެ ނޫހުން ބުންޏެވެ.

މި ފިލްމަށް ކުރިން ސޮއިކޮށްފައިވާ ތަރިންގެ ތެރޭގައި "ޓްވައިލައިޓް" އިން ވިދާލި ބަތަލު ރޮބަޓް ޕެޓިންސަން އާއި އެލިޒަބަތު ޑެބީކީ، ޖޯން ޑޭވިޑް ވޮޝިންޓަންގެ އިތުރުން ކެނެތު ބްރެނާ އަދި އާރޮން ޓޭލާ-ޖޯންސަން ހިމެނެ އެވެ.

ނޯލަން އާއި އަންހެނުން އެމާ ނޯލާން ޕްރޮޑިއުސް ކުރާ "ޓެނެޓް" ގެ ސްކްރީންޕްލޭ ވެސް ލިޔެފައި ވަނީ ނޯލާން އަމިއްލައަށެވެ. ވެރައިޓީން ބުނި ގޮތުގައި މި ފިލްމަކީ "ޑަންކާކް" ގެ ފޮލޯއަޕެއް ގޮތުގައި ހަދާ އެއްޗެކެވެ.

ވޯނާ ބްރަދާޒްއާ ގުޅިގެން ގެނެސްދޭ "ޓެނެޓް" ސިނަމާތަކަށް ގެންނަން ހަމަޖެހިފައި ވަނީ ޖުލައި، 17، 2020 ގަ އެވެ.

އަކްޝޭ ކުމާރުގެ އަންހެނުން ޓްވިންކަލް ކަންނާގެ މަންމަ ނޯލާންގެ ފިލްމަށް ސޮއި ކުރި އިރު އޭނާގެ ކުރިއަށް އޮތް ހިންދީ ފިލްމަކީ އާލިއާ ބަޓާއި ރަންބީރު ކަޕޫރް ލީޑް ރޯލުން ފެނިގެންދާ "ބުރައްމަސްތުރާ" އެވެ. ކުރިން އަންނަ ޑިސެމްބަރުގައި ރިލީޒް ކުރަން އުޅުނު ފިލްމު މިހާރު ވަނީ އަންނަ އަހަރަށް ފަސްކޮށްފަ އެވެ.

ބޮލީވުޑުން ފެނުނު އެންމެ ހުނަރުވެރި ބަތަލާއިންގެ ތެރޭގައި ހިމެނޭ ޑިމްޕަލްއަކީ އޭނާގެ ރަން ޒަމާނުގައި ކާމިޔާބު އެތައް ފިލްމެއް ކުޅެފައިވާ ބަތަލާއެކެވެ. ޑިމްޕަލް ބޮލީވުޑަށް ތައާރަފުވީ ރިޝީ ކަޕޫރާ އެކު 1973 ގެ އައިކޮނިކް ފިލްމު "ބޮބީ" އިންނެވެ.