އެއާޕޯޓް އެޅުމަށް ކުރިން ނިންމި ދިގުލާބަދުއާ އެކު ގދ. ގެ 50 ރަށެއް ވަރުވާ އަށް ދޫކުރަނީ

ޑޮމެސްޓިކް އެއާޕޯޓެއް އެޅުމަށް ކުރިން ނިންމި ގދ. ދިގުލާބަދޫއާއެކު އެ އަތޮޅުގެ 50 ފަޅުރަށެއް ވަރުވާއަށް ދޫކުރުމަށް ސަރުކާރުން ހުޅުވާލައިފި އެވެ.

ފިޝަރީޒް މިނިސްޓްރީން އިއްޔެ ކުރި އިއުލާނެއްގައިވާ ގޮތުން، ދިގުލާބަދޫގެ އިތުރުން ގދ. އަތޮޅުން ވަރުވާ އަށް ދޫކުރުމަށް ހަމަޖެހިފައި ވަނީ ރޮޑައިދުވާ، ކަޅެހުއްޓާ (ފިޔޯރީ ފަޅުތެރެ)، އުހެހުއްޓާ، އުލެގަލާ، އެކެލޮންޑާ، ވައިރެޔާދުވާ (ވާރެޔާދުވާ)، ވެރާވިލިގިއްލާ، ފަރެހުޅުދޫ، ފެނެއެނެހުއްޓާ، ދެކާންބާ، ތިނެހުއްޓާ، ހަވޮޑިގަލާ، ހުނިގޮނޑިރެހާ، ރޮދެވައްރެހާ، ބޮޑެހުއްޓާ (ބޮޑުހުއްޓާ)، ބޮޑުރެހާ، ކާޅެހުއްޓާ (ފަރެހު ފަޅުތެރެ)، ކަނަންދޫ (ކަނަންދުވާ)، ކަންނިގިއްލާ، ކަނޑަހަލަގަލާ، ކަފެނާ، ކަޅެހަމަލަ، ކުދެހުޅެއްދުވާ (ކުދެހުޅެއްދޫ)، ކުދެލިފަދޫ އަދި ކެލައިހުއްޓާ އެވެ. މީގެ އިތުރުން، ކޮޑާނަފުއްޓާ (ކޮޑާނަހުއްޓާ)، ކޮޑުރަޓާ (ކޮޑެރަޓާ)، ކޮޑެދޫ، އުކުރިހުއްޓާ، އެހިވަކާ، އޮޅުރަޓާ، އޮޅިމުއްޓާ، ވިލިގިއްލާ (ފިޔޯރީ ކައިރި)، މައްލާރެހާ (ފެލެގެންއޮންނަރަޓާ)، މަތިކެރަނަހުއްޓާ، މަތައިދުވާ، މާރެހާ (ފަރެހު ފަޅުތެރެ)، މާއެހިވަކާ، މާވާރުލު، މާގޮޑެރެހާ، މާގަލާ، މެރަގިހުއްޓާ، މޭރަގިއްލާ، މީހުންތިބެނެހުއްޓާ، ފެމުނައިދޫ، ދިގުރެހާ، ދޫނިރެހާ (ނަޑެއްލާ ކައިރި)، ދޫނިރެހާ (ފަރެހު ފަޅުތެރެ) އަދި ދެރުކުރެހާ ވެސް ވަރުވާ އަށް ދޫކުރާ ރަށްތަކުގެ ލިސްޓުގައިވެ އެވެ.

މިނިސްޓްރީން ބުނި ގޮތުގައި މި ރަށްތައް ވަރުވާ އަށް ނަގަން ބޭނުންވާ ފަރާތްތަކަށް މި މަހުގެ 19 އިން ފެށިގެން އަންނަ މަހުގެ ހަ ވަނަ ދުވަހުގެ ނިޔަލަށް ބިޑުފޯމު ގަނެވޭނެ އެވެ. ރަށްތަކާ ބެހޭ މައުލޫމާތު އަންނަ މަހުގެ ފަސްވަނަ ދުވަހު ދިނުމަށް ހަމަޖެހިފައިވާ ކަމަށާއި އަންނަ މަހުގެ 17 ގައި ބިޑުފޯމު ހުށަހެޅޭނެ ކަމަށް ވެސް މިނިސްޓްރީން ބުންޏެވެ.

ފަރެސްމާތޮޑާ އާއި ފިޔޯރީއާ ދެމެދު އޮންނަ ދިގުލާބަދޫގައި ދަނޑުވެރިކަން ކުރަން އަމިއްލަ ކުންފުންޏެއް ކަމަށްވާ އެކުއާ ޓްރެޝާ ޕްރައިވެޓް ލިމިޓެޑަށް ދިނުމަށް 2010 ވަނަ އަހަރުގެ ފަހުކޮޅު ކެބިނެޓުން ނިންމުމާ ގުޅިގެން ތިމާވެށި ހިމާޔަތްކުރާ ޖަމިއްޔާތަކުން އެކަމާ ދެކޮޅަށް އޭރު ވެސް އަޑުއުފުލި އެވެ. އަދި އެ ކަންބޮޑުވުންތަކާ ގުޅިގެން ދަނޑުވެރިކަން ކުރަން އެ ރަށް ހަވާލުކުރުން އޭރު ސަރުކާރުން މަޑު ޖައްސައިލި އެވެ.

ގދ. އަތޮޅުން ގިނަ އަދަދެއްގެ ރަށް ވަރުވާ އަށް ދޫކުރާއިރު، ބ. އަދި އދ. އަތޮޅުގެ ރަށްތަކެއް ވެސް މިދިޔަ ޖުލައި މަހު ވަރުވާ އަށް ހުޅުވައިލި އެވެ. އެއީ އދ. ހިޔަފުޓާއި ކުޑަދޫ އަދި އާފިނޮޅާއި ބ. ވެޔޮފުށި އަދި ހިރުންދޫ އެވެ.

ވަރުވާ އަށް ރަށްތައް ދޫކުރަނީ ދައުލަތުގެ ބޭނުމަށް ކަނޑައަޅާފައިވާ ފަޅުރަަށާއި ކުއްޔަށް ދޫކޮށްފައިވާ ފަޅުރަށްތައް ފިޔަވައި ފިޝަރީޒް މިނިސްޓްރީގެ ހަވާލުގެ ދަށުގައި ހުންނަ ފަޅުރަށްތަކުގެ ތެރެއިން އެ މިނިސްޓްރީން ކަނޑައާޅާ ރަށްތަކެވެ. ވަރުވާ އަށް ރަށެއް ދޫކުރެވޭނީ އެންމެ ގިނަ ވެގެން 10 އަހަރަށެވެ.