ޑިވައިޑާތައް ކޮންކްރީޓަށް ބަދަލުކުރަން ފަށައިފި

ސިނަމާލެ ބްރިޖު ހައިވޭގެ މެދުގައި ޖަހާފައި ހުރި ޕްލާސްޓިކް ޑިވައިޑާތައް ކޮންކްރީޓަށް ބަދަލުކުރަން މިއަދު ފަށައިފި އެވެ.

އެ މަސައްކަތް ކުރަމުން އަންނަ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު ސުހެއިލް އަހުމަދު ވިދާޅުވީ، ޑިވައިޑާތައް ކޮންކްރީޓުން ހަދައި ހައިވޭގައި ބަހައްޓަން ފަށާފައިވާ ކަމަށެވެ. އެ މަސައްކަތަށް ހަފުތާއަކަށް ވުރެ ދިގު މުއްދަތެއް ނަގާނެ ކަމަށް ވިދާޅުވި އެވެ.

މިދިޔަ އަހަރު ފަހުކޮޅު ބޭނުންކުރަން ފެށި ހައިވޭގައި ހިނގި އެކްސިޑެންޓުތަކެއްގައި ގިނަ ޑިވައިޑާތަކެއް ވަނީ ފުނޑުފުނޑުވެފަ އެވެ. އެހެންވެ ޑިވައިޑާތައް ކޮންކްރީޓަށް ބަދަލުކުރުމުގެ ވާހަކަ އެންމެ ފުރަތަމަ ދެކެވުނުއިރު ގިނަ ބައެއްގެ ކަންބޮޑުވުން ފާޅުކުރި އެވެ.

ސުހެއިލް ވިދާޅުވީ، ޕްލާސްޓިކް ޑިވައިޑަރުތަކުން، އެއް ލޭނުން އަންނަ ވެހިކަލަކުން، އަނެއް ވޭލުން ދާ ވެހިކަލެއްގައި ޖެހި ގެއްލުންވުމުގެ ފުރުސަތު ބޮޑު ކަމަށެވެ. އެހެންވެ މަޝްވަރާކުރުމަށް ފަހު އެންމެ ރައްކާތެރި ގޮތަކަށް ފެނުނީ ކޮންކްރީޓުން ޑިވައިޑާތައް ހެދުން ކަމަށް އޭނާ ވިދާޅުވި އެވެ.