ސައުދީގައި ބޭއްވި ބައިނަލް އަގުވާމީ ގުރުއާން މުބާރާތުގެ ފަނޑިޔާރަކަށް ޝައިޚް އިލްޔާސް

ސައުދީ އަރަބިއްޔާގައި 1978 ވަނަ އަހަރުން ފެށިގެން ބާއްވަމުން އަންނަ ބައިނަލް އަގުވާމީ ބޮޑު ގުރުއާން މުބާރާތެއްގެ ފަނޑިޔާރުކަން މިފަހަރު ޝައިޚް އިލްޔާސް ހުސައިން ކުރައްވައިފި އެވެ.

"ކިންގް އަބްދުލް އަޒީޒް އިންޓަނޭޝަނަލް ގުރުއާން މުބާރާތް" ބޭއްވީ ސެޕްޓެމްބަރު 7- 11 އަށް މައްކާގަ އެވެ. ޝައިޚް އިލްޔާސް އެ މުބާރާތުގައި ފަނޑިޔާރުކަން ކުރެއްވިކަން ހާމަ ކުރައްވަމުން، ކުރީގެ އިސްލާމިކް މިނިސްޓަރު އަދި އިސްލާމިކް ޔުނިވާސިޓީގެ ކުރީގެ ޗާންސެލަރު ޑރ. މުހައްމަދު ޝަހީމް އަލީ ސައީދު ވިދާޅުވީ "މި މުބާރާތުގެ ފަނޑިޔާރުކަންކުރެއްވުމުގެ ފުރުސަތު ރާއްޖޭގެ ބޭފުޅަކަށް ލިބިވަޑައިގެންނެވުމަކީ ރާއްޖެއަށް ލިބޭ ވަރަށް ބޮޑު ޝަރަފެއް" ކަމަށެވެ.

އެކަމާ އުފާ ފާޅުކުރައްވައި ސޯޝަލް މީޑިއާ ފޭސްބުކްގައި އިލްޔާސްގެ ފޮޓޯއަކާ އެކު ޝަހީމް ލިއުއްވި ލިއުއްވުމުގައި ވިދާޅުވީ ގާތް ބޭފުޅަކަށް އެ ފުރުސަތު ލިބިވަޑައިގެންނެވުމުން އުފާ ކުރައްވާ ކަމަށެވެ. ޝަހީމް ވަނީ 1998 ވަނަ އަހަރު އެ މުބާރާތުގައި ރާއްްޖެ ތަމްސީލު ކުރައްވާފަ އެވެ.

ކިންގް އަބްދުލް އަޒީޒް ގުރުއާން މުބާރާތަކީ 1978 ވަނަ އަހަރުން ފެށިގެން މައްކާގައި ބާއްވަމުން އަންނަ މުބާރާތެކެވެ. އެ އަހަރުގެ މުބާރާތުގައި 6000 އަށް ވުރެ ގިނަ މީހުން ބައިވެރިވި އެވެ. މިއަހަރު ބޭއްވި އެ މުބާރާތުގެ 41 ވަނަ އެޑިޝަންގައި 103 ގައުމަކުން 146 ބައިވެރިން ވާދަކުރި އެވެ.