ދަަގަނޑޭގެ ފަސް ގޯލާ އެކު ގްރީން އަށް ބޮޑު މޮޅެއް

އަލީ އަޝްފާގު (ދަގަނޑޭ) ޖެހި ފަސް ގޯލާ އެކު ޔުނައިޓެޑް ވިކްޓްރީ (ޔޫވީ)ގެ މައްޗަށް 8-2 އިން ގްރީން ސްޓްރީޓްސް އިން ބޮޑު މޮޅެއް ހޯދައިފި އެވެ.

މި މޮޅާ އެކު ގްރީން ސްޓްރީޓްސް ވަނީ ލީގުގެ ދެ ވަނަ ޖެހިލައިފަ އެވެ. ގްރީން ސްޓްރީޓްސް އަށް ފުރަތަމަ ބުރުގެ އަށް މެޗުން ލިބުނީ 15 ޕޮއިންޓެވެ. އެއް ވަނައިގައި އޮތް މާޒިޔާ އަށް މެޗުން ލިބުނީ 18 ޕޮއިންޓެވެ. ގްރީން ސްޓްރީޓްސް އަށް ފުރަތަމަ ބުރުން ދެ ވަނަ ލިބޭނީ ލީގުގައި މާދަމާރޭ ދަ ގްރާންޑޭ އާއި އީގަލްސް ކުޅޭ މެޗުގެ ނަތީޖާ ނުކުންނަ ގޮތަކުންނެވެ.

މިއަދުގެ މެޗުގައި ގްރީން ސްޓްރީޓްސް އިން ޖެހި އަށް ގޯލުގައި ވެސް ދަގަނޑޭ ވަނީ މުހިއްމު ރޯލެއް ކުޅެފަ އެވެ. ފަސް ގޯލު ޖެހިއިރު، އަނެއް ތިން ގޯލު ޖަހަން ފުރުސަތު ތަނަވަސްކޮށްދިނީ ދަގަނޑޭ އެވެ. މެޗުގެ މޮޅު ކުޅުންތެރިޔާގެ މަގާމު ވެސް ހޯދީ އޭނާ އެވެ.

މެޗު ފަށައިގެން ދެ ވަނަ މިނިޓްގައި މުހައްމަދު އުމެއިރު ދިން ބޯޅަ އަކުން ދަގަނޑޭ ވަނީ ގްރީން ސްޓްރީޓްސް އަށް ލީޑުނަގައިދީފަ އެވެ. މެޗުގެ އަށް ވަނަ މިނިޓްގައި ގްރީން ސްޓްރީޓްސްގެ ދެ ވަނަ ލަނޑު ޖެހީ މުހައްމަދު ރިސްވާން (ފުކޭ) އެވެ. ދަގަނޑޭ ހުސްކޮށްލާފައި ދިން ބޯޅަ ފުކޭ ވަނީ ހަމަޖެހިލާފައި ގޯލަށް ފޮނުވާލައިފަ އެވެ. ފުކޭ ލަނޑު ޖެހީ އޮފްސައިޑްގައި ހުރެ ކަމަށް ބުނެ، ޔުނައިޓެޑް ވިކްޓްރީން ވަރަަށް ބޮޑަށް އެޕީލްކުރި އެވެ.

ގްރީން ސްޓްރީޓްސްގެ ގިނަ ހަމަލާތަކެއް ޔުނައިޓެޑް ވިކްޓްރީގެ ހަސަން ތޮލާލް (ތޮލާ) މަތަކުރިއިރު، މެޗުގެ 39 ވަނަ މިނިޓްގައި ޔުނައިޓެޑް ވިކްޓްރީގެ ލަނޑު ޖެހީ އަހުމަދު ނާޝިދު (ނައްޓޭ) އެވެ. އޭރިއާ ބޭރު އަރިމަތިން ނައްޓޭ ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ. އެ ބޯޅަ ގޯލުގެ ތެރެއަށް ވަނީ ގްރީން ސްޓްރީޓްސްގެ ގޯލްކީޕަރު ލަބާން ޝަރީފް އަތްމަތިން ގޮހެވެ.

ޔުނައިޓެޑް ވިކްޓްރީން ލަނޑު ޖަހައި މެޗުގެ ތެރެއަށް އެނބުރި އައިތާ ދެ މިނިޓް ފަހުން ދަގަނޑޭ ވަނީ އަލުން ގްރީން ސްޓްރީޓްސް އަށް ދެ ގޯލުގެ ލީޑެއް ނަގައިދީފަ އެވެ. ފުކޭ ނަގައިދިން ހުރަހަކުން ދަގަނޑޭ ބޮލުން ޖެހި ބޯޅަ ގޯލަށް ވަނީ ހުރަސްދަނޑީގައި ޖެހިފަ އެވެ. ފުރަތަމަ ހާފްގެ އިތުރު ވަގުތުުގައި ދަގަނޑޭ ވަނީ އޭނާގެ ހެޓްރިކް ފުރިހަަމަކޮށް ގްރީން ސްޓްރީޓްސްގެ ހަތަރު ވަނަ ލަނޑު ކާމިޔާބުކޮށްފަ އެވެ. ގާސިމް ސައްމާމު (ސައްމެ) ހުސްކޮށްލާފައި އޭރިއާތެރެއިން ދަގަނޑޭ އަށް ދިން ބޯޅަ އޭނާ ފޮނުވާލުމުން ގޯލަށް ވަނީ ޔުނައިޓެޑް ވިކްޓްރީގެ ޝާފިއު އަހުމަދު (ޝާފީ) ގައިގައި ޖެހިފަ އެވެެ.

ދެ ވަނަ ހާފްގެ ކުޅުން ފެށިގެން ތިން ވަނަ މިނިޓްގައި ގްރީން ސްޓްރީޓްސްގެ ފަސް ވަނަ ލަނޑު ޖެހީ ރިހާމް އަބްދުލް ގަނީ (ބޮބީ) އެވެ. ދަގަނޑޭ ހުސްކޮށްލާފައި ދިން ބޯޅަ ބޮބީ ވަނީ ފަސޭހަކަމާ އެކު ގޯލަށް ފޮނުވާލައިފަ އެވެ. އޭގެ ފަހުން ފުކޭ ޖެހި ބޯޅައެއް ވަނީ ގޯލުގެ ދަނޑިއަށް އަމާޒުވެފަ އެވެ.

ގްރީން ސްޓްރީޓްސްގެ ހަ ވަނަ ލަނޑު ޖެހީ ދަގަނޑޭ އެވެ. މެޗުގެ 56 ވަނަ މިނިޓްގައި ދަގަނޑޭ މި ލަނޑު ޖެހީ ފުކޭ ހުސްކޮށްލާފައި ދިން ބޯޅައަކުންނެވެ. ގްރީން ސްޓްރީޓްސް އިން ކުރިއަށް ޖެހިގެން ކުޅެމުން ދަނިކޮށް މެޗުގެ 67 ވަނަ މިނިޓްގައި ޔުނައިޓެޑް ވިކްޓްރީގެ ދެ ވަަ ލަނޑު ކާމިޔާބުކުރީ ބަދަލު ކުޅުންތެރިއެއްގެ ގޮތުގައި ދެ ވަނަ ހާފްގައި ކުޅެން އެރި މިރާހު މުހައްމަދު (މިރަޓީ) އެވެ. އޭރިއާތެރެއަށް ބޯޅަ ހިފައިގެން ވަދެ މިރަޓީ ވަނީ ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިފަ އެވެ.

ޔުނައިޓެޑް ވިކްޓްރީން މެޗުގެ ފަހު ވިހި މިނިޓް ކުޅުނީ އެއް ކުޅުންތެރިއަކު މަދުކޮށެވެ. އެއީ އެ ޓީމުގެ އިސްމާއިލް ޝަފީއު (އިއްސެ) އަށް ރަތް ކާޑު ދެއްކުމުންނެވެ.

މެޗުގައި ގްރީން ސްޓްރީޓްސްގެ ހަތް ވަނަ ލަނޑު ޖެހީ ދަގަނޑޭ އެވެ. އޭރިއާ ތެރެއިން ހުސްކޮށް ލިބުނު ބޯޅަ ދަގަނޑޭ ވަނީ ތިރިތިރިން ގޯލުގެ ތެރެއަށް ފޮނުވާލައިފަ އެވެ. އޭގެ ކުރިން އަބްދުﷲ މިސްބާހު ޖެހި ބޯޅަ ކީޕަރު ތޮލާ ވަނީ މަތަކޮށްފަ އެވެ. ގްރީން ސްޓްރީޓްސްގެ އަށް ވަަނަ ލަނޑު ޖެހީ ދަގަނޑޭ ދިން ބޯޅަ އަކުން ޒުވާން ކުޅުންތެރިޔާ އަބްދުﷲ ޔާމީން (ޔާން) އެވެ.

ގްރީން ސްޓްރީޓްސްގެ ކޯޗު އަލީ ސުޒޭން ބުނީ ޔުނައިޓެޑް ވިކްޓްރީ އޮތް ފޯމަށް ބަލާއިރު މެޗަށް ނުކުތީ ތިން ޕޮއިންޓް ހޯދުމަށް ކަމަށާއި އެކަން ހާސިލްކުރެވުނުއިރު، ގިނަ ގޯލުތަކެއް ޖެހުމަކީ މި ނަތީޖާއާ މެދު އިތުރަށް ހިތްހަމަޖެހޭ ސަބަބެއް ކަަމަށެވެ.

ޔުނައިޓެޑް ވިކްޓްރީގެ ކޯޗު މުހައްމަދު ނަޒީހު ބުނީ މެޗުގެ ރެފްރީންގެ ފަރާތުން ގިނަ ގޯސްތަކެއް ފެނިގެންދިޔަ ކަމަށާއި ފެނުނީ ހަމައެކަނި ވަކި ކަންތައްތަކެއް ފެނުނު މަންޒަރު ކަމަށެވެ. އެކަމަކު މެޗުން ބަލިވީ ހަމައެކަނި ރެފްރީގެ ގޯސް ނިންމުންތަކެއްގެ ސަބަބުން އެކަނި ނޫން ކަމަށާއި ފަސޭހަ ގޯލުތަކެއް ވެސް ވަނުމުން ކަމަށް ބުންޏެވެ.