ސައިރިކްސް ކޮލެޖުން ސައިކޮލޮޖީގެ ޑިގްރީ ކޯހެއް ލޯންޗުކޮށްފި

ސައިރިކްސް ކޮލެޖުން ސައިކޮލޮޖީ ދާއިރާ އިން ޑިގްރީ ޕްރޮގްރާމް ތައާރަފުކޮށް ކުރިމަތިލާން ހުޅުވާލައިފި އެވެ.

އެ ކޮލެޖުން ބުނީ އެންމެ ފުރަތަމަ ހުށަހަޅާ ދަރިވަނުންނަށް އިސްކަންދޭ ގޮތަށް އޮތް ކޯސް ފަށަން ހަމަޖައްސާފައިވަނީ އަންނަ މަހުގެ ތެރޭގައި ކަމަށެވެ. މިހާރު ވެސް ކޯހަށް ކުރިމަތިލަމުން އަންނަ ކަމަށް ބުންޏެވެ.

ސައިކޮލޮޖީ ކޯހުގެ މުއްދަތަކީ ތިން އަހަރެވެ. އެ ކޯހުގެ ފުރަތަމަ އަހަރު ފުރިހަމަކުރުމުން ޑިޕްލޮމާ ފާހަކާއެކު ބޭނުންވެއްޖެނަމަ ކޯސް ހުއްޓާލެވޭނެ އެވެ. ދެ އަހަރު ނިންމުމުން އެސޯސިއޭޓް ޑިގްރީ ފާހެއް ލިބޭނެ އެވެ.

އެ ކޯހަށް ކަނޑައަޅާފައިވަނީ 20 ޖާގަ އެވެ.

ކޯސް ލޯންޗުކުރުމުގެ ރަސްމިއްޔާތުގައި ވާހަކަދައްކަވަމުން ސޮސައިޓީ ފޯ ހެލްތު އެޑިއުކޭޝަން (ޝީ) ގެ ސީއީއޯ އަދި އެޑިއުކޭޝަންގެ ކުރީގެ ސްޓޭޓް މިނިސްޓަރު އަހުމަދު ޝަފީއު ވިދާޅުވީ ސައިކޮލޮޖީގެ ޑިގްރީ ޕްރޮގްރާމް ރާއްޖެ އަށް ވަރަށް މުހިއްމު ކަމަށެވެ. އޭނާ ވިދާޅުވީ ދިވެހިން ވާންވީ ބަލިވުމުން ބައްޔަށް ފަރުވާ ހޯދުމުގެ ބަދަލުގައި ދުޅަހެޔޮ ސިއްހަތަކަށް މަސައްކަތްކުރާ ބަޔަކަށް ކަމަށެވެ.

ދިވެހީންގެ ނަފްސާނީ ދުޅަހެޔޮކަމަށް މަގުފަހިކުރުމަށް ސައިކޮލޮޖީގެ ކޯސް ފެށުމަކީ ސައިރިކްސް ކޮލެޖުން ފެށި ވަރަށް މުހިއްމު ކަމެއްކަމަށް ވިދާޅުވި އެވެ.

އެ ކޮލެޖުގެ ރެކްޓާ ޑރ. ފަވާޒު ޝަރީފް ވިދާޅުވީ އަލަށް ތައާރަފްކުރި ޕްރޮގްރާމަކީ ނަފްސާނީ ދުޅަހެޔޮކަން ފުޅާކުރުމުގެ މަސައްކަތަށް އިތުރުވި ބޮޅެއް ކަމަށެވެ. އަންނަ އަހަރުގެ ތެރޭގައި ސައިކޮލޮޖީން މާސްޓާސް ފެންވަރަށް ކިޔެވުމުގެ ފުރުސަތު ފަހިކޮށްދިނުމަށް މަސައްކަތް ކުރަމުން އަންނަކަމަށް ވިދާޅުވި އެވެ.

ސައިކޮލޮޖީގެ ދާއިިރާއިން ޑިގްރީ އަށް ހުޅުވާލިއިރު، އެ ކޮލެޖުން އަންނަނީ 2015 ވަނަ އަހަރުން ފެށިގެން ސައިކޮލޮޖީން ޑިޕްލޮމާ އަށް ކިޔަވައިދެމުންނެވެ.